Insalakan ni Jesus dagiti matalek a tattao idi intedna ti biagna kas daton a subbot. (Mateo 20:28) Isu nga awagan ti Biblia ni Jesus kas “Manangisalakan iti lubong.” (1 Juan 4:14) Ibagana pay: “Awan ti asinoman a sabali a pakaisalakanan, ta awan ti sabali a nagan iti baba ti langit a naited kadagiti tattao a masapul a pakaisalakanantayo.”​—Aramid 4:12.

 Napadasan ni Jesus ti ‘matay maipaay iti tunggal tao’ a mangipakpakita iti pammati kenkuana. (Hebreo 2:9; Juan 3:16) Kalpasanna, “imbangon ti Dios manipud kadagiti natay,” sa nagsubli ni Jesus idiay langit kas espiritu a parsua. (Aramid 3:15) Isu a kabaelannan nga “isalakan a naan-anay dagidiay umadani iti Dios baeten kenkuana, agsipud ta isu kankanayon a sibibiag tapno agdawat maipaay kadakuada.”​—Hebreo 7:25.

Apay a kasapulantayo ni Jesus nga agdawat para kadatayo?

 Managbasoltayo amin. (Roma 3:23) Gapu iti basol, arigna adda pader a nangisina kadatayo iti Dios, ket agresulta dayta iti ipapatay. (Roma 6:23) Ngem nagbalin ni Jesus a “manangibabaet” para kadagidiay mangipakita iti pammati iti datonna a subbot. (1 Juan 2:1, Ti Biblia, PBS) Agdawat para kadakuada, nga ipakaasina iti Dios a denggenna dagiti kararagda ken pakawanenna dagiti basolda maibatay iti daton a subbot ni Jesus. (Mateo 1:21; Roma 8:34) Sungbatan ti Dios dagita a pakaasi ni Jesus gapu ta maitunos dagita iti pagayatanna. Imbaonna ni Jesus ditoy daga tapno “ti lubong maisalakan babaen kenkuana.”​—Juan 3:17.

Ti laeng kadi panamati ken Jesus ti kasapulan tapno maisalakantayo?

 Saan. Nupay kasapulan a mamatitayo ken Jesus tapno maisalakantayo, adda pay masapul nga aramidentayo. (Aramid 16:30, 31) Kuna ti Biblia: “No kasano a ti bagi nga awanan espiritu ket natay, kasta met a ti pammati nga awanan ar-aramid natay.” (Santiago 2:26) Tapno maisalakantayo, masapul nga:

•   Adalentayo ti maipapan ken Jesus ken iti Amana a ni Jehova.​—Juan 17:3.

•   Adda pammatitayo kadakuada.​—Juan 12:44; 14:1.

•   Ipakitatayo ti pammati babaen ti panagtulnog kadagiti bilinda. (Lucas 6:46; 1 Juan 2:17) Insuro ni Jesus a saan nga amin a mangawag kenkuana iti “Apo” ket maisalakan no di ket dagidiay laeng “mangar-aramid ti pagayatan ni [Amana] nga adda iti langlangit.”​—Mateo 7:21.

•   Itultuloytayo nga ipakita ti pammatitayo uray adda dagiti pakarigatan. Nalawag dayta a punto ni Jesus idi imbagana: “Ti nakapagibtur agingga iti panungpalan isunto ti maisalakan.”​—Mateo 24:13.