Ti nabaknang a lalaki ken ni Lazaro ket karakter laeng iti estoria nga insalaysay ni Jesus. (Lucas 16:19-31) Iti daytoy nga estoria, irepresentar dagitoy a lallaki ti dua a grupo ti tattao: (1) dagiti natangsit a Judio a lider ti relihion idi kaaldawan ni Jesus ken (2) dagiti napakumbaba ken napudno a tattao a dimngeg iti mensahe ni Jesus.

Iti daytoy nga artikulo

•  Ania ti imbaga ni Jesus maipapan iti nabaknang a lalaki ken ni Lazaro?

•  Talaga kadi a napasamak daytoy nga estoria?

•  Suportaran kadi daytoy nga estoria ti doktrina nga umap-apuy nga impierno?

•  Ania ti kaipapanan ti estoria maipapan iti nabaknang a lalaki ken ni Lazaro?

 Iti Lucas kapitulo 16, inladawan ni Jesus ti dua a lallaki a nakapadas iti dakkel a panagbalbaliw iti kasasaadda.

 Daytoy ti sumario ti estoria nga insalaysay ni Jesus: Nakanamnam-ay ti biag ti nabaknang a lalaki. Ti agpalpalama a ni Lazaro ket adda iti ruangan ti balay ti baknang. Mangnamnama kadagiti maregreg a murkat iti lamisaan ti nabaknang a lalaki. Dimteng ti tiempo a natay ni Lazaro, ket impan dagiti anghel iti abay ni Abraham. Natay met ti nabaknang a lalaki ket naipumpon. Iti estoria, nailadawan dagitoy a lallaki nga ammoda ti mapaspasamak kalpasan ti ipapatayda. Ti nabaknang a lalaki ket matutuok iti dumardarang nga apuy ket impakaasina ken Abraham nga ibaonna ni Lazaro a mangisawsaw iti murdong ti ramayna iti danum tapno palamiisanna ti dilana. Saan a pinatgan ni Abraham ti kiddaw ti baknang ket imbagana a nagsinnukaten ti kasasaadda ken adda dakkel a giwang iti nagbaetanda a saan a maballasiw.

 Saan. Daytoy ket maysa nga ilustrasion nga inusar ni Jesus a mangisuro iti maysa a leksion. Binigbig dayta dagiti eskolar. Kas pagarigan, ibaga ti maysa a subtitulo ti 1912 nga edision ti Biblia ni Luther a maysa daytoy nga ilustrasion. Ken iti maysa a footnote ti Catholic Jerusalem Bible, ibagana a daytoy nga “estoria nga ilustrasion ket saan a tumukoy iti asinoman a tao a nagbiag.”

 Isursuro kadi idi ni Jesus ti maipapan iti biag kalpasan ti ipapatay? Kayatna kadi a sawen a matutuok ti dadduma a tattao iti umap-apuy nga impierno no matayda ken adda idiay langit da Abraham ken Lazaro? Ipakita ti sumagmamano nga ebidensia a saan a kasta.

 Kas pagarigan:

•   No adda ti nabaknang a lalaki iti literal nga umap-apuy a lugar, saan ngata a mamagaan a dagus ti danum iti murdong ti ramay ni Lazaro?

•   Uray no saan a dagus a mamagaan ti danum, umanay ngata ti sangatedted a danum tapno mabang-aran ti nabaknang a lalaki iti pannakatutuokna iti literal nga apuy?

•   Kasano koma a sibibiag ni Abraham idiay langit, idinto ta imbaga ni Jesus nga agingga iti dayta a tiempo nga insalaysayna ti ilustrasion, awan pay ti napan idiay langit?—Juan 3:13.

 Saan. Nupay saan a pudpudno a pasamak daytoy nga estoria, ibaga ti dadduma nga isimbolona ti ideya a mapan idiay langit dagiti nasingpet a tattao ken matutuok iti impierno dagiti dakes a tattao. a

 Rasonable kadi dayta a konklusion? Saan.

 Ti sursuro nga umap-apuy nga impierno ket maikontra iti ibagbaga ti Biblia a kasasaad dagiti natay. Kas pagarigan, saanna nga ibaga a dagiti natay a nasingpet a tattao ket nakaragragsak itan nga agbibiag idiay langit wenno matutuok iti umap-apuy nga impierno dagiti dakes a tattao. Imbes ketdi, nalawag nga ibaga ti Biblia: “Ammo dagiti sibibiag a mataydanto, ngem awan a pulos ti ammo dagiti natay.”—Eclesiastes 9:5.

 Ipakita ti estoria nga adda dandanin dakkel a panagbalbaliw iti kasasaad ti dua a grupo ti tattao.

 Ti nabaknang a lalaki nalawag nga isimbolona dagiti Judio a lider ti relihion a ‘managayat iti kuarta.’ (Lucas 16:14) Dimngegda iti imbaga ni Jesus ngem kinontrada ti mensahena. Nababa ti panagkita dagitoy a lider ti relihion kadagiti ordinario a tattao.—Juan 7:49.

 Ni Lazaro isimbolona dagiti ordinario a tattao nga immawat iti mensahe ni Jesus ken lalaisen dagiti Judio a lider ti relihion.

 Dakkel ti panagbalbaliw iti kasasaad ti dua a grupo.

•   Pampanunoten dagiti Judio a lider ti relihion nga adda kadakuada ti pabor ti Dios. Ngem arigna natayda idi saan ida nga inawat ti Dios ken ti pamay-an ti panagdaydayawda ta saanda nga inakseptar ti mensahe ni Jesus. Ken natutuokda iti mensahe nga inkasaba ni Jesus ken dagiti pasurotna.—Mateo 23:29, 30; Aramid 5:29-33.

•   Dagiti ordinario a tattao—a nabayagen a binaybay-an dagiti lider ti relihion—aw-awatendan ti pabor ti Dios. Adu ti nangawat ken nagunggonaan iti mensahe nga insuro ni Jesus. Addaanda itan iti tsansa a mangtagiragsak iti pabor ti Dios iti agnanayon.—Juan 17:3.