Ibagbaga idi dagiti sientista a masepsep ti dila ti hummingbird ti nektar babaen ti proseso a maawagan iti capillary action—ti natural a puersa a mangipangato kadagiti likido kadagiti naingpis a tubo. Ngem iti nabiit pay a panagadal, nadiskobre dagiti sientista nga adda nasaysayaat a pamay-an nga us-usaren daytoy a billit, ur-urnongenna ti nektar iti dilana.

 Panunotem: No dilpatan ti hummingbird ti nektar, aggudua ti murdong ti dilana. Iti kada murdong, adda babassit a kasla brush a nakakaem. Agnganga dagita no maisawsaw iti nektar. Gapu iti dayta, makaala ti dila ti hummingbird iti nektar uray no saanna a susopen dayta. No agsublin ti dilana, agkaem manen dagiti kasla brush isu a maurnong ti nektar iti uneg dayta.

 Mapasamak amin dagita iti “awan pay 0.1 a segundo,” kuna dagiti researcher a da Alejandro Rico-Guevara, Tai-Hsi Fan, ken Margaret Rubega. Imbagada pay: “Ti murdong ti dilana ket nakasaysayaat nga instrumento a pagurnong iti likido a kayana ti ag-adjust a dagus bayat a maisawsaw iti likido.”

 Maysa pay, maaramid amin dagita daytoy nagbassit a billit a saan nga agusar iti enerhia. Gapu iti shape ken pannakadisenio ti murdong ti dilana, automatic nga aglukat dagiti kasla brush no maisawsaw iti likido ken agserra no agsublin ti dilana.

 Gapu ta nakalalaing ti dila ti hummingbird nga agurnong iti likido, patien dagiti researcher a mausarda ti disenio dayta iti medisina, robotics, ken dadduma pay a field ti siensia. Makatulong pay daytoy iti panangdisenio kadagiti tools a pang-mop kadagiti likido wenno oil spill.

 Panagkunam? Resulta kadi ti ebolusion ti nakakomkomplikado a dila ti hummingbird? Wenno adda nangdisenio iti dayta?