Dagiti balat wenno sea cucumber ket animal nga aggigian iti lansad ti baybay ken kadagiti kadilian wenno coral reef. Ti bagida ket mabalin a rutong-rutongan wenno adu ti tudokna. Nakaskasdaaw ti kinalapiotda. Iti sumagmamano la a minuto wenno uray segundo, mabalin nga agbalin dagiti sea cucumber a kasla iti wax ti kaluknengna wenno kas iti tabla ti kasikkilna, isu a no adda umatake, kabaelanda ti sumelsel kadagiti nakabasbassit nga abut sada sumikkil tapno saan ida a maiguyod ken mairuar dagiti agkaan kadakuada. Ti nakaskasdaaw a kudilda ti sekreto dagiti sea cucumber.

 Panunotem: Ti kudil ti sea cucumber ket mabalin a sumikkil, sumikkil iti kalkalainganna, ken lumukneng. Tapno mapasamak dayta, pagkokonektaren wenno pagsisinaen dagiti sea cucumber dagiti fiber iti kudilda. Us-usarenda dagiti protina a pagpasikkil wenno pagpalukneng.

 Dagiti protina a pagpasikkil ti mamagkonektar kadagiti nagbabassit a kasla rangtay, wenno kadena, iti nagbabaetan dagiti fiber tapno tumangken ti kudil. Dagiti protina a pagpalukneng, pagsisinaenda dagiti fiber tapno lumukneng ti kudil. Kabaelan ti sea cucumber a paluknengen ti kudilna agingga a kasla marunrunawen dayta.

 Mangar-aramid dagiti sientista kadagiti material a mangtulad iti panagbaliwbaliw ti kudil ti sea cucumber. Ikagkagumaanda ti mangaramid kadagiti electrode para iti panagopera iti utek nga umdas ti kinasikkilna tapno eksakto ti panagpuestoda iti pakaikabilanda sa lumapiotto met laeng kalpasanna. No makapagbaliwbaliw dagiti electrode, dakdakkel ti posibilidad nga agballigi ti operasion.

 Panagkunam? Resulta kadi ti ebolusion ti nakaskasdaaw a kudil ti sea cucumber? Wenno adda nangdisenio iti dayta?