Nabayagen a nakita dagiti siruhano a napateg ti pigket iti panagopera ken panangpaimbag kadagiti nasugat a tisyu ti bagi. Adu kadagiti maus-usar ita a pigket ket saan a mabalin nga usaren iti uneg ti bagi. Ngamin, makasabidong ken tumangken dagitoy no agmagada ken saanda a dumket kadagiti nabasa a tisyu ti bagi. Inadal dagiti sientista ti kasla katay a substansia ti slug (kabagian ti moluska a diladila), a ket nakadiskobreda iti solusion kadagita a problema.

 Panunotem: No marikna ti slug a kasla adda umatake, mangiruar iti umdas a napigket a substansia tapno maipigket ti kalabanna iti nabasa a bulong. Dayta ti pangdepensa ti slug ken makakuti latta nupay limitado ti panaggarawna.

 Inadal dagiti researcher daytoy a napigket a substansia ket nakitada ti nadumaduma a rason nga epektibo dayta kas natural a pigket. Kas pagarigan, ti napigket a substansia ket agpadpada nga agusar iti chemical bonding ken electrostatic attraction. Ti substansia ket sumagepsep iti disso a pagkaptan ti slug ken nalap-it uray maguyodguyod. Tinulad dagiti researcher dagiti kualidad ti substansia ti slug ket nakaaramidda iti pigket nga adayo a nakapkapet ngem kadagiti agdama a maus-usar iti medisina ken agkapet iti lalaem wenno nanguneg. Kunada a dumket dayta “uray kadagiti paset ti bagi a kas iti pannakaidekket ti nalukneng a tulang iti natangken a tulang.”

 Patien dagiti eksperto a karamanton daytoy a pigket kadagiti usaren ti amin a siruhano tapno didan agdait wenno agusar iti staple no agoperada. Mabalin met a mausar dayta tapno masimpa dagiti nalukneng a tulang wenno tapno eksakto a maikapet dagiti medical device iti masapul a pakaikabilanda iti bagi. Na-testing dagitan ket nakita nga epektibo ti pigket a pangserra iti abut ti puso ti baboy ken pangseliado kadagiti abut ti dalem dagiti bao wenno utot.

 Masansan a makasarak dagiti sientista kadagiti epektibo unay a solusion kadagiti gagangay a problema babaen ti panangadalda kadagiti parsua ken iti aglawlawtayo. “Depende la dayta no sadino ti pangbirokam ket no nakabirokka, amirisem ti nasayaat a pakausaran dayta,” kuna ni Donald Ingber, direktor ti institusion a nangaramid iti sintetiko a pigket.

 Panagkunam? Ti kadi natural a pigket iti kasla katay a substansia ti slug ket produkto ti ebolusion? Wenno adda nangdisenio iti dayta?