Nabayagen a napaliiw dagiti eksperto kadagiti animal wenno zoologist ti abilidad ti barnacle a kumpet a naimbag kadagiti bato, pier, ken kaha dagiti barko. Ti pigket ti barnacle ket adayo a nakapkapet ngem kadagiti sintetiko a pigket. Ngem itay nabiit, natakuatanen dagiti sientista no kasano a makakapet ti barnacle uray kadagiti nabasa a disso.

 Panunotem: Ipakita dagiti panagadal a no makalangoyen ti ubing pay a barnacle, sukimatenna nga umuna ti nagduduma a disso sakbay a kumpet. No nakapilin iti nasayaat a pagkaptanna, mangiruar iti dua a substansia. Ti umuna ket ti nalanit a likido a mangiwalin iti danum iti napilina a disso. Daytoy a nalanit a likido isaganana met ti disso para iti iruar ti barnacle a maikadua a substansia a buklen dagiti protina a maawagan iti phosphoproteins.

 Ti nagtipon a dua a substansia ti mangbukel iti nakapet a pigket a saan a kabaelan a dadaelen uray dagiti bakteria. Nagpateg daytoy nakapet a pigket ta kumpet ti barnacle iti dayta a disso iti intero a panagbiagna.

 Adayo a mas komplikado ti panangaramid ti barnacle iti pigketna ngem iti impagarup dagiti sientista. Kuna ti maysa a miembro ti grupo a nakadiskobre iti proseso ti barnacle: “Nakaskasdaaw ken nagsayaat dayta a natural a solusion tapno masolbar ti problema no kasano a kumpet ti pigket iti rabaw ti maysa a banag uray no adda iti uneg ti danum.” Dagita a nadiskobre ti mabalin a makatulong kadagiti researcher tapno makaaramidda kadagiti pigket a mausar iti uneg ti danum, agraman kadagiti sintetiko a pigket manipud kadagiti natural a substansia a mausar iti tay-ak ti electronics ken medisina.

 Panagkunam? Resulta kadi ti ebolusion ti pigket ti barnacle? Wenno adda nangdisenio iti dayta?