“Idi nagsinakami iti girlfriend-ko,” kuna ni Steven, “kasla nagpatinggan ti lubongko. Dayta ti kasakitan a nariknak iti intero a panagbiagko.”

 Napadasam kadi metten dayta? No wen, makatulong daytoy kenka.

•  No kasano kasakit

•  Ti mabalinmo nga aramiden

 Agpada a masaktan dagiti agnobio no agsinada.

•  No sika ti nakisina, mabalin a nariknam ti kuna ni Jasmine, “Nasaktak ti maysa nga impatpategko isu a makonkonsiensiaak, ket saankonto koman a pulos marikna ti kasta.”

•  No saan a sika ti nakisina, mabalin a maawatam no apay a maibaga ti dadduma a kaslada la nagminatay gapu iti dayta. “Nagbayag a nakalidlidayak. Adu a proseso ti dimmalanak,” kuna ti balasang a ni Janet. “Diak maawat idi ti napasamak, nakariknaak iti pungtot, kayatko ti makisinnublianan, nalidayanak a permi, agingga a kalpasan ti dandani makatawen, naakseptarko met laeng.”

 Konklusion: Nakasaksakit ken nakalidliday ti panagsina. Kuna ti maysa a mannurat ti Biblia: “Ti espiritu a nadanar [wenno, naliday] magmaganna dagiti tulang [wenno, ibusenna ti pigsam].”—Proverbio 17:22.

•  Makisaritaka iti nataengan a pagtaltalkam. Kuna ti Biblia: “Ti pudno a kadua agayat iti isuamin a tiempo, ken ti kabsat a mayanak no adda rigat.” (Proverbio 17:17) No ibagam ti amin a marikriknam iti nagannak wenno nataengan a gayyemmo, makatulong dayta tapno maaddaanka iti umiso a kapanunotan.

   “Adu a bulan a diak nakikadkadua ken awan pulos nangibagbagaak iti marikriknak. Ngem makatulong dagiti gagayyem iti panag-move on. Nabang-aranak lang idi imbagak kadakuada ti napasamak.”—Janet.

•  Agsursuroka iti napasamak. Kuna pay ti maysa a pagsasao iti Biblia: “Gun-odem ti sirib, gun-odem ti pannakaawat.” (Proverbio 4:5) Gapu kadagiti saan a nasayaat a pasamak iti biagtayo, adu ti masursurotayo maipapan iti bagitayo ken no kasanotayo a sanguen dagiti pannakapaay.

   “Kalpasan ti panagsinami, insaludsod ti maysa a gayyemko, ‘Ania ti nasursurom iti relasionyo, ken kasanom a mausar dayta no makirelasionka manen iti masanguanan?’”​—Steven.

•  Agkararagka. Kuna ti Biblia: “Ipalladawmo ti dadagsenmo ken Jehova a mismo, ket isu saranayennakanto.” (Salmo 55:22) Makatulong ti kararag tapno mailiwliwagmo ti sakit a marikriknam ken agbalin a positibo ti kapanunotam maipapan iti panagsinayo.

   “Kanayon nga agkararagka. Maawatan ni Jehova ti sakit a marikriknam ken mas ammona ti situasionmo ngem sika.”—Marcia.

•  Tulongam ti dadduma. Kuna ti Biblia: ‘Kitaenyo, saan la a ti personal a panaginteres iti bukodyo a bambanag, no di ket kasta met ti personal a panaginteres iti bambanag ti sabsabali.’ (Filipos 2:4) No mas agpokuska iti panangtulong iti dadduma, al-alisto met a maakseptarmo ti napasamak.

   “No nagsinakayo, kasla nagpatinggan ti amin. Nasaksakit pay dayta ngem iti pisikal a sakit. Ngem imbag laengen ta maagasan met laeng dayta. Kasapulam laeng ti panawen tapno umimbagka.”—Evelyn.