Para kadagiti Saksi ni Jehova, ti Biblia ti kapatgan a libro. Regular nga ad-adalen ken us-usarenda dayta a pangisuro maipapan iti naimbag a damag ti Pagarian ti Dios. (Mateo 24:14) Gapu iti dayta, nalaka a madadael dagiti Bibliada. Dayta ti gapuna a sinigurado dagiti Saksi a ti 2013 a rebision ti New World Translation of the Holy Scriptures ket napintas, nalagda, ken agpaut.

Nasken a nalagda ti baro a Biblia. Dagiti pannakabagi dagiti agtrabtrabaho iti pagimprentaan dagiti Saksi idiay Wallkill, New York, U.S.A. inlawlawagda dagiti planoda iti presidente ti maysa a kompania nga agar-aramid iti libro. Ngem imbagana kadakuada: “Imposible a maaramid ti Biblia a kas iti kayatyo.” Kinunana pay, “Nakalkaldaang ngem agpayso a kaaduan a Biblia ket nadisenio a maidispley laeng iti lamisaan wenno estante​—imbes a nakalaglagda koma.”

Saan unay a nagpaut ti dadduma nga immun-una nga edision ti New World Translation. Adda pay ketdi gundaway a nasinasina dagita gapu iti nakabarbara a paniempo. Dagiti agtrabtrabaho iti pagimprentaan sinukimatda dagiti materiales a nausar nga akkub, agraman dagiti pigket ken pamay-an ti panangdait kadagiti libro. Apay? Kayatda ngamin ti mangaramid iti Biblia a nalagda latta iti nadumaduma a klima. Maitunos kadagiti resulta ti panagsukimatda, nangaramidda kadagiti sampol ti Biblia nga ipa-testing-da kadagiti Saksi nga agnanaed kadagiti pagilian a ti klimada ket nakapudpudot agingga iti kalamiisan a kas iti Alaska.

Kalpasan ti innem a bulan, naisubli dagiti Biblia tapno masukimat. Dagiti agtrabtrabaho iti pagimprentaan pinasayaatda ti kalidad dagiti inaramidda a Biblia sada nangipatulod manen kadagiti sampol nga ipa-testing-da. Agdagup iti 1,697 ti Biblia a naipa-testing iti nadumaduma a lugar. Sumagmamano kadagita ti di inggagara a naipasidong iti nadumaduma a dakes a kasasaad. Kas pagarigan, adda Biblia nga agpatnag a nabati iti katuduan. Ti met maysa ket naupran idi naglayus gapu iti bagyo. Dagiti resulta ti pannubok ken dagiti di inggagara a napasamak kadagiti Biblia ket nangipaay iti napateg nga impormasion maipapan iti kinalagda dagita.

Idi 2011, bayat a maipatpa-testing dagiti Biblia iti nadumaduma a lugar, gimmatang dagiti Saksi iti baro a high-speed bindery para kadagiti pagimprentaanda idiay Wallkill ken Ebina, Japan. Apay? Saan laeng a tapno maisambut dagiti Biblia a maiwaras para iti tinawen a miting no di ket tapno agpapada pay ti itsura dagiti Biblia a mayimprenta kadagita a lugar.

Idi rugrugi ti 2012, ti dua a pagimprentaan ket nangrugin nga agpataud kadagiti datin nga edision ti New World Translation iti nangisit ken maroon babaen ti panangusarda iti baro a material a polyurethane a pagakkub. Ngem dagiti baro a makina ket nagusar iti pigket ken liner iti akkub (pangpakidser iti sikigan) a saan pay a na-testing iti nadumaduma a lugar. Gapu iti dayta, medio aglukot dagiti akkub kalpasan a maikabitda iti Biblia. Nagpalia dagiti damo a pamuspusan a mangsolbar iti problema isu a naisardeng ti panagimprenta.

Nadlaw dagiti nagaramid iti maysa kadagiti materiales a ti medio panaglukot ket gagangay a problema kadagiti nalap-it nga akkub ken mabalin a narigat a maliklikan. Ngem imbes nga agusarda iti natangken nga akkub, determinado dagiti Saksi a mangpataud iti Biblia a nalap-it ti akkubna nga agpaut ti kinapintasna. Kalpasan ti uppat a bulan a panang-testing ken panangusar iti adu a kombinasion ti pigket ken liner, naduktalanda met laengen ti maitutop a kombinasion. Gapu iti dayta, naituloy ti panagimprenta kadagiti Biblia nga addaanen iti nalap-it nga akkub a saan nga aglukot.

Idi Septiembre 2012, naibilin kadagiti pagimprentaan nga isardengda ti produksion iti agdama idi nga edision, ipaibusda ti amin a kasta nga edision ti Biblia, ken urayenda a mayimprenta ti rebisado nga edision ti New World Translation a nakaeskediul a mairuar idi Oktubre 5, 2013, iti tinawen a miting ti Watch Tower Bible and Tract Society of Pennsylvania.

Naawat dagiti pagimprentaan dagiti electronic files ti text para iti baro a Biblia idi Biernes, Agosto 9, 2013, ken rinugianda ti nagimprenta kabigatanna. Agosto 15 idi nayimprentada ti kaunaan a kompleto a Biblia. Iti simmaganad a pito a lawas, 24 oras a nagimprenta dagiti agtrabtrabaho iti pagimprentaan idiay Wallkill ken Ebina tapno malpas ken maipatulod ti nasurok a 1,600,000 a Biblia! Umdas dayta a maiwaras iti tunggal maysa a tumabuno iti tinawen a miting.

Nupay napintas ken nalagda ti baro a Biblia, napatpateg nga amang ti makaited-biag a mensahena. Idi naawatna ti baro a Bibliana, insurat ti maysa a babai a taga-United States: “Gapu iti baro nga edision, ad-adda a maawatakon ti Biblia.”