Saan. Regular a mangaskasabakami ngem saanmi a patien a maisalakankami gapu iti panangaramidmi iti dayta a trabaho. (Efeso 2:8) Apay?

 Panunotem daytoy: Ipapanmo a ti maysa a naparabur a lalaki inkarina a mangted iti nangina a regalo iti asinoman a makapan iti lugar ken oras nga imbagana. No talaga a patiem ti kari dayta a lalaki, surotem kadi dagiti instruksionna? Siempre! Mabalin nga ibagam pay ketdi dayta kadagiti gagayyem ken kapamiliam tapno magunggonaanda met. Nupay kasta, naikkanka iti regalo saan a gapu ta napanka iti lugar ken oras nga imbaga ti lalaki. Naikkanka gapu ta kayatnaka nga ikkan.

 Umasping iti dayta, patien dagiti Saksi ni Jehova a magun-odda ti kari ti Dios a biag nga agnanayon no agtulnogda kenkuana. (Roma 6:23) Ikagkagumaanmi nga iranud ti pammatimi kadagiti sabsabali, a mangnamnamakami a magunggonaanda met iti kari ti Dios. Ngem saanmi a patien a ti pannakaisalakanmi ket maigapu laeng iti panangaskasabami. (Roma 1:17; 3:28) Uray no ania ti aramidentayo, saan nga umdas dagita tapno maikaritayo iti nakasaysayaat a bendision manipud iti Dios. “Isalakannatayo, saan a gapu iti aniaman a nasayaat nga inaramidtayo no di ket gapu iti asina kadatayo.”—Tito 3:5, Ti Baro a Naimbag a Damag Biblia.