Nayanakak iti La Ceiba, Honduras. Siak ti inaudi kadakami a lima nga agkakabsat, ken siak ti kakaisuna a lalaki. Siak laeng met ti umel ken tuleng iti pamiliami. Agnanaedkami a sangapamiliaan iti delikado a lugar ken nakapangpanglawkami. Kimmaro ti kasasaad idi natay ni tatangko iti aksidente. Awan pay uppat a tawenko idi.

 Inaramid ni nanangko ti amin a kabaelanna a mangbiag kadakami nga agkakabsat, ngem manmano nga adda igatangna iti badok. No agtudo, malamlamminak ta awan ti naimeng a badok.

 Bayat a dumakdakkelak, nagadalak iti Honduras Sign Language (LESHO). Gapu iti dayta, makasaritakon dagiti padak nga umel ken tuleng. Ngem saan nga ammo ni Nanang ken dagiti kakabsatko ti LESHO, ken makisarsaritada laeng kaniak babaen iti manmano ken inimbentoda a senias. Ay-ayatennak ni Nanang ken protprotektarannak. Uray manmano ti ammona a senias, imbagana kaniak a liklikak dagiti bisio a kas iti panagsigarilio ken panagbartek, isu a dimmakkelak nga awan ti bisiona.

 Idi ubingak, kanayon nga ikuykuyognak ni Nanang iti simbaan, ngem awan ti maaw-awatak ta awan met ti mang-interpret iti sign language. Naumaak isu nga insardengkon ti makimisa idi sangapulo ti tawenko. Ngem kayatko latta a maam-ammo ti Dios.

 Idi 1999, adda naam-ammok a babai a taga-Amerika a miembro ti evangelical church. Agtawenak idi iti 23. Inyadalannak iti Biblia ken sinuruannak iti American Sign Language (ASL). Nagustuak unay ti nasursurok maipapan iti Biblia isu a kayatko ti agbalin a pastor. Immakarak ngarud idiay Puerto Rico tapno ageskuelaak iti Christian training center para kadagiti umel ken tuleng. Idi nagsubliak iti La Ceiba idi 2002, nangipasdekak iti simbaan para kadagiti umel ken tuleng babaen ti tulong ti sumagmamano a gagayyemko. Ni Patricia, a nagbalin nga asawak, ti maysa kadagitoy.

 Kas pastor iti simbaanmi, nangtedak kadagiti sermon iti LESHO. Nangipakitaak kadagiti ladawan dagiti estoria iti Biblia, ken inyaktok dagiti estoria tapno maawatan dagiti umel ken tuleng. Binisitak pay dagiti umel ken tuleng kadagiti asideg nga ili tapno paregtaek ken tulongak ida kadagiti problemada. Napanak pay idiay Amerika ken Zambia kas misionero. Ngem iti kinapudnona, bassit ti ammok maipapan iti Biblia. Imbagak laeng kadakuada dagiti naisuro kaniak ken ti naawatak kadagiti ladawan. Kinapudnona, nakaad-adu ti saludsodko.

 Maysa nga aldaw, pinadpadakesdak dagiti dadduma a miembro ti relihionko. Imbagada a mammartekak ken liniputak ni baketko. Nasuron ken nakapungtotak. Di nagbayag, nagikkatkamin ken ni Patricia iti relihionmi.

 Masansan a bisitaendakami dagiti Saksi ni Jehova, ngem kanayon a likliklikanmi ida ken Patricia. Idi nagikkatkami iti relihionmi, immanamong met laeng ni Patricia a makipagadal kadagiti agassawa a Saksi a da Thomas ken Liccy. Inapresiarko ida ta ammoda ti sign language uray no saanda nga umel ken tuleng. Isu a nakikaduaak ken Patricia nga agadal.

 Sumagmamano a bulan a nagadalkami, nga inusarmi dagiti video iti ASL. Ngem idi imbaga dagiti gagayyemmi a tattao laeng ti lider dagiti Saksi ni Jehova, insardengmi ti nakipagadal. Uray no nangipakita ni Thomas kadagiti ebidensia a saan a tao ti lider dagiti Saksi ni Jehova, diak latta namati.

 Kalpasan ti mano a bulan, naaddaan ni Patricia iti nakaro a depresion. Inkararagna iti Dios nga agsubli koma manen dagiti Saksi ni Jehova. Di nagbayag, adda kaarrubami a Saksi a bimmisita ken Patricia ket kunana nga ibagananto ken Liccy a sarungkaranna ni Patricia. Talaga a pudno a gayyem ni Liccy. Linawas a sinarungkaranna ni Patricia tapno paregtaen ken iyadalanna iti Biblia. Ngem diak latta nagtalek kadagiti Saksi.

 Idi 2012, adda espesial a kampania dagiti Saksi ni Jehova a mangipabuya iti LESHO a video ti Kayatmo Kadi a Maammuan ti Kinapudno? Inikkannakami ni Liccy iti kopia dayta a video. Idi binuyak dayta, nasdaawak ta awan gayam iti Biblia ti adu a doktrina nga isursurok idi, kas iti impierno ken immortalidad ti kararua.

 Iti simmaganad a lawas, napanak iti Kingdom Hall dagiti Saksi ni Jehova tapno kasaritak ni Thomas. Imbagak a kayatko nga isuro ti kinapudno maipapan iti Biblia kadagiti umel ken tuleng, uray saanak nga agbalin a Saksi ni Jehova. Kayatko ti mangbuangay iti baro a relihion para kadagiti umel ken tuleng. Kuna ni Thomas a maragsakan ta interesadoak manen iti Biblia, ngem impabasana ti Efeso 4:5 a mangilawlawag a kasapulan ti panagkaykaysa ti pudno a kongregasion Kristiano.

 Inikkannak pay ni Thomas iti video a Jehovah’s Witnesses—Faith in Action, Part 1: Out of Darkness iti ASL. Mabuya iti daytoy a video ti grupo dagiti lallaki a nangsukimat a naimbag iti Biblia tapno matarusanda ti kinapudno maipapan kadagiti napateg a doktrina. Idi binuyak ti video, nariknak a kapadak dagidiay a lallaki ta agbirbirokak met iti kinapudno. Dayta a video ti nangkombinsir kaniak nga isursuro dagiti Saksi ti kinapudno ta Biblia laeng ti nakaibatayan dagiti patpatienda. Isu nga intuloyko manen ti nagadal iti Biblia, ket idi 2014, nabautisarankami ken Patricia kas Saksi ni Jehova.

 Magustuak ti kongregasion dagiti Saksi ni Jehova. Nadalus dayta iti moral ta ti Dios ket nadalus. Nasayaat ti panagsasao ken pannakilangen dagiti Saksi. Mannakikappiada ken agpipinnaregtada. Agkaykaysa dagiti Saksi ken agpapada dagiti isursuroda a kinapudno maipapan iti Biblia, aniaman ti pagilianda wenno lengguaheda.

 Magusgustuak nga adalen dagiti isursuro ti Biblia. Kas pagarigan, naammuak a ni Jehova ti Mannakabalin-amin a Dios ken ti Kangatuan iti intero a daga. Agpada nga ay-ayatenna dagiti tuleng ken dagiti makangngeg. Agyamyamanak ta ay-ayatennak ti Dios. Naammuak pay a ti daga ket agbalinto a napintas a paraiso. Agbiagtayton iti agnanayon ken awanton ti sakit. Il-iliwek daytan nga aldaw!

 Magusgustuanmi ken Patricia nga isuro ti maipapan iti Biblia kadagiti umel. Iyad-adalanmi itan iti Biblia ti dadduma kadagiti miembro ti dati a relihionmi. Idi pastorak, nakaad-adu ti saludsodko maipapan iti isursurok. Ngem ita, awanen. Nabirokak met laengen ti sungbat dagiti saludsodko babaen ti pannakipagadalko iti Biblia kadagiti Saksi ni Jehova.