Nayanakak iti Ciudad Obregón iti makin-amianan a Mexico. Siak ti maikalima kadagiti siam nga agkakabsat. Agnanaedkami iti away nga asideg iti siudad, nga ayan ti bassit a talon ni tatangko. Nagpintas dayta a lugar, ken agkaykaysa ken naragsak ti pamiliami. Nakalkaldaang ta idi lima laeng ti tawenko, nabagyo ti talonmi isu a masapul nga umakarkami iti sabali nga ili.

 Immadu ti masapsapulan ni Tatang. Ngem nagbalin met a mammartek. Daytoy ti nangdadael iti relasionna ken ni Nanang ken kadakami nga annakna. Nasursuromi ti agsigarilio, a taktakawenmi ken ni Tatang. Innem ti tawenko idi damo a nabartekak. Di nagbayag, nagsina dagiti nagannakko ken kimmaro dagiti bisiok.

 Innalanakami ni Nanang idi nakikabbalay iti sabali a lalaki. Saan a mangmangted ti lalaki iti kuarta ken ni Nanang, ken saan nga umanay a pagbiagmi ti masapsapulan ni Nanang. Isu a nagtrabahokami nga agkakabsat ngem kaskasdi a saan nga umanay. Nagpasilengak kadagiti sapatos ken naglakoak iti tinapay, diario, bubble gum, ken dadduma pay. Nagalaak pay iti makan iti pagbasuraan dagiti baknang iti intero a siudad.

 Idi agtawenak iti sangapulo, adda lalaki a nangawis kaniak nga agtrabaho iti pagbasuraan iti siudad. Inawatko dayta, nagsardengak nga ageskuela, ken pimmanawak iti balaymi. Tinangdanannak iti 10 a Mexican Peso (28 a piso) iti kada aldaw ken inikkannak iti makan a naala iti pagbasuraan. Nagnaedak iti abong-abong a naaramid iti basura. Naalas ti panagsasao dagiti tattao iti aglawlawko ken immoralda. Adu ti adikto iti droga ken mammartek. Dayta ti kadaksan a paset ti biagko, ket rinabii nga agsangsangitak ken agpigpigergerak iti buteng. Gapu ta narigat ti biagko ken nababa ti adalko, mababainak unay. Agarup tallo a tawen a naggigianak iti pagbasuraan, agingga nga immakarak iti sabali nga estado ti Mexico. Nagtrabahoak iti kataltalonan, a nagburasak kadagiti sabong ken kapas, nagpukan iti unas, ken nagapit iti patatas.

 Kalpasan ti uppat a tawen, nagsubliak iti Ciudad Obregón. Nagyanak iti balay ti maysa kadagiti antik nga espiritista. Nabangbangungotak ken nadepresak ket pinampanunotko ti agpakamatay. Maysa a rabii, nagkararagak iti Dios: “Apo, no talaga nga addaka, kayatka a maam-ammo, ket agserbiak kenka iti agnanayon. Kayatko a maammuan no adda ti pudno a relihion.”

 Kanayon nga interesadoak maipapan iti Dios. Uray idi ubingak, napanak iti simbaan ti agduduma a relihion, ngem napaayak kadagita. Awan ti nangisuro iti Biblia wenno timmulong kaniak a mangam-ammo iti Dios. Adda dagiti relihion a kuarta laeng ti napateg kadakuada, ken adda dagiti miembroda nga immoral ti panagbiagna.

 Idi agtawenak iti 19, imbaga ti maysa kadagiti kayongko nga impakita kenkuana dagiti Saksi ni Jehova ti kuna ti Biblia maipapan iti panagusar kadagiti rebulto. Imbasana kaniak ti Exodo 20:4, 5. Kunana a masapul a saantayo nga agaramid kadagiti kinitikitan nga imahen. Kuna ti bersikulo 5: “Dika agruknoy wenno agserbi kadagita, ta siak ni Jehova a Diosmo nga agkidkiddaw iti naipamaysa a debosion.” Kalpasanna, insaludsod kaniak ti kayongko, “No agus-usar ti Dios kadagiti rebulto tapno agaramid kadagiti milagro wenno kayatna nga usarentayo dagita nga agdaydayaw, apay nga iparitna dagita?” Napagpanunotak iti dayta. Kalpasanna, sumagmamano a daras a pinagsaritaanmi ti maipapan iti Biblia. Nagustuak unay dagita a saritaan nga uray la diak napupuotan ti panaglabas ti oras.

 Di nagbayag, inkuyognak iti gimong dagiti Saksi ni Jehova. Naapresiarko ti nakitak ken nangngegko sadiay. Uray dagiti ubbing ket nakiraman iti programa, ken naglalaingda nga agpalawag! Pinampanunotko, ‘Nagsayaat nga edukasion ti maaw-awat dagiti tattao ditoy!’ Uray no atiddog ti buokko ken nagulo ti itsurak, sibabara nga inabrasadak dagiti Saksi. Adda pay maysa a pamilia a nangawis kaniak a makipangrabii kadakuada kalpasan ti gimong!

 Iti pannakipagadalko iti Biblia kadagiti Saksi, nasursurok a ni Jehova a Dios ket naayat nga Ama a maseknan kadatayo aniaman ti kasasaadtayo iti pinansial, kagimongan, puli, wenno adaltayo. Talaga a saan a mangidumduma. (Aramid 10:34, 35) Napennek met laengen ti naespirituan a kasapulak. In-inut met laengen a mariknak nga adda serbi ti biagko.

 Nagdakkel ti nagbalbaliwan ti biagko! Insardengkon ti agsigarilio, agbartek, ken agsao iti dakes. In-inut a naawan ti sakit ti nakem a nariknak manipud idi ubingak. Saanak metten a mabangbangungot. Naaddaanakon iti kompiansa a dati nga awan kaniak gapu kadagiti saan a nasayaat a kapadasak idi ubingak ken gapu iti nababa nga adalko.

 Addaanak itan iti nasayaat nga asawa a mangay-ayat ken Jehova ken dakkel ti maitultulongna kaniak. Agserserbiak itan kas agdaldaliasat a manangaywan dagiti Saksi ni Jehova, a bumisbisita kadagiti kongregasion tapno paregtaen ken suruan ti naespirituan a pamiliak nga imbilangko a kakabsat. Imbag laengen ta naammuak ti makaagas a pannursuro ti Biblia ken ti nagsayaat nga edukasion nga ipapaay ti Dios ta saanko itan nga ibain ti bagik.