Adda lalaki manipud Eritrea a napan iti Norway kas refugee idi 2011. Idi kinasabaan dagiti Saksi ni Jehova, imbagana nga adda nakasarsaritanan a Saksi idiay lugarda. Kunana nga idi soldado pay laeng sadiay, nakitana a dagiti Saksi a naibalud gapu iti pammatida ket saanda a napilit nga agsoldado, uray naparparigatda.

 Adda napasamak iti daytoy a lalaki isu a naibalud. Naam-ammona iti pagbaludan dagiti tallo a Saksi a da Paulos Eyasu, Negede Teklemariam, ken Isaac Mogos—nga idi pay 1994 a naibalud gapu iti pammatida.

 Iti pagbaludan, napaneknekan ti lalaki nga iyap-aplikar dagiti Saksi ni Jehova dagiti isursuroda. Nakitana a napudnoda ken ibingbingayanda pay iti makan ti dadduma a balud. Napaliiwna nga inaldaw nga agtitipon dagiti balud a Saksi tapno adalenda ti Biblia ken aw-awisenda pay ti dadduma. Idi naitukon kadakuada a mawayawayaanda no pirmaanda ti dokumento a mangibagbaga a tallikudanda ti pammatida, saanda nga inawat dayta.

 Inapresiar unay daytoy a lalaki dagiti Saksi, ket idi nagyanen iti Norway, kayatna a maammuan no apay a nakatibtibker ti pammati dagiti Saksi ni Jehova. Isu nga idi sinarungkaran dagiti Saksi, dagus a nagpayadal iti Biblia ken nakigimongen.

 Idi Septiembre 2018, isu ket nabautisaran kas maysa a Saksi ni Jehova. Us-usarenna ti tunggal gundaway a mangkontak kadagiti taga-Eritrea ken Sudan tapno paregtaenna ida nga agadal iti Biblia ken maaddaan iti natibker a pammati.