Ni Virginia, a maysa a Saksi ni Jehova ket adda sakitna a maawagan locked-in syndrome. Paralisado ti intero a bagina. Makakita, makangngeg, makamulagat, makakidem, ken maikutina bassit ti ulona. Saan a makasao ken subuanda no mangan. Nasalun-at idi ken naganaygay, ngem iti maysa nga agsapa, idi 1997, nakasaksakit ti teltelna. Impan ni lakayna iti maysa nga ospital ket karabiyanna, na-coma ni Virginia. Dua a lawas kalpasanna, nakariing nga addan iti intensive-care unit, a paralisado ken nakabitan iti ventilator. Sumagmamano nga aldaw nga awan ti malagipna. Saanna pay ketdi nga ammo no asino isuna.

 Iyestoria ni Virginia ti simmaruno a napasamak. “In-inut a nagsubli ti memoriak. Kanayon a nagkarkararagak. Diak pay kayat idi ti matay ta ubing pay ti anakko. Tapno tumibker ti pakinakemko, inkagumaak a lagipen ti adu a teksto ti Biblia.

 “Di nagbayag, inruardak dagiti doktor iti intensive care unit. Kalpasan ti innem a bulan iti nagduduma nga ospital ken rehabilitation center, nayawidak met laeng. Paralisadoak pay laeng ket kasapulak ti tulong ti dadduma iti amin nga aramidek. Permi a maup-upayak! Panagriknak, awanen ti serserbik iti dadduma ken kasta met ken Jehova. Pampanunotek met no sino ti mangaywan iti anakko.

 “Binasak ti kapadasan ti dadduma a Saksi a nakaro met ti sakitda a kas kaniak. Nasdaawak ta adu ti maar-aramidanda para ken Jehova isu nga inkagumaak ti agbalin a positibo ken agpokus iti maaramidak. Sakbay a nagsakitak, limitado ti tiempok kadagiti naespirituan nga aktibidad. Ita, inaldawen ken agmalmalemen nga ar-aramidek dagita. Isu nga imbes a madepresak, nagpokusak iti panagtalinaedko a matalek ken Jehova.

 “Sinursurok ti agkompiuter. Makapag-type-ak ta adda software a makadetek iti garaw ti ulok. Makabannog, ngem gapu iti teknolohia, makapagadalak iti Biblia ken maibagak ti namnamak iti dadduma babaen iti surat ken e-mail. Tapno makasaritak ti dadduma, usarek ti board nga addaan iti alphabet. Saggaysa nga itudo ti kaduak dagiti letra. No kamali ti itudona a letra, agmulagatak; no husto ti itudona, agkidemak. Ulit-ulitenmi dayta agingga a makompletomi ti sao ken dagiti sentensia. Dadduma a sister a kanayon a mangkadkadua kaniak mapugtuandan no ania ti kayatko nga ibaga. No dadduma, agkamalida isu nga agkakatawakami.

 “Maragragsakanak a makiraman kadagiti aktibidad ti kongregasion. Kanayon a naka-tie in-ak kadagiti gimong, nga itan ket babaen iti videoconferencing. Mai-type-ko dagiti komentok, sa adda mangibasa bayat ti saludsod ken sungbat a paset ti gimong. Naka-tie in-ak met iti maysa a bassit a grupo dagiti Saksi nga agbuybuya iti binulan a JW Broadcasting. a

 “Duapulo ket tallo a tawenen nga adda locked-in syndrome-ko. No dadduma, malidlidayak. Ngem mailiwliwagko met laeng dayta. Agkararagak, makikaduaak kadagiti kakabsat, ken agbalinak a busy nga agserbi ken Jehova. Kinapudnona, nasuroken nga innem a tawen nga auxiliary pioneer-ak babaen ti tulong ti kongregasion. Inkagumaak ti agbalin a nasayaat nga ulidan iti anakko a ni Alessandro. Addan asawana ken maysan a panglakayen. Agserserbida ken baketna kas regular pioneer.

 “Kanayon a pampanunotek dagiti maaramidkonto idiay paraiso. Ti umuna nga aramidek ket isarsaritak ti maipapan ken Jehova ta makasaoakton. Kayatkonto ti magna iti igid ti waig iti away bayat a buybuyaek ti napintas nga aglawlaw. Duapulo a tawenen a likido laeng ti ipapaunegko a maipadalan iti tubo isu nga il-iliwek ti agpurosto iti mansanas sa kittabek. Ken siempre, gapu ta Italianaak, padpadaanak ti agluto ken mangan kadagiti paboritok a makan iti Italy, agraman ti pizza!

 “Nakatulong ti ‘namnama ti pannakaisalakan’ tapno maprotektaran ti panunotko. (1 Tesalonica 5:8) Uray adda ti sakitko, naragsakak no pampanunotek nga addaakto iti baro a lubong. Siguradoak a dandanin mapukaw ti sakitko. Talaga a padpadaanakon ti ‘pudpudno a biag’ nga inkari ni Jehova nga ipaayna kadatayo babaen ti Pagarianna.”—1 Timoteo 6:19; Mateo 6:9, 10.