Maysa nga aldaw, maysa a babai a Saksi ni Jehova nga agnagan Eliso ti mangyad-adal iti Biblia iti maysa nga interesado a babai. Ngem adda simmangpet a bisita ti babai a dina ekspektaren—maysa a padi a kaduana ti asawana. Naammuan ni Eliso a nabiit pay a natay ti kakaisuna nga anakda.

 Idi imbaga ni Eliso a makipagladingit iti ipapatay ti anakda, nagsangit ti padi ken ti asawana. Idi kuan, makapungpungtot nga imbaga ti padi: “Diak maawatan no apay nga impalubos ti Dios ti kastoy a pannubok! Apay nga innalana ti kakaisuna nga anakko? Duapulo ket walon a tawen nga agserserbiak iti Dios. Adun ti naimbag nga inaramidko, ngem kastoy ti insubadna kaniak! Apay a pinatay ti Dios ti anakko?”

 Imbaga ni Eliso iti agassawa a saan nga innala ti Dios ti anakda. Inlawlawagna pay ti maipapan iti subbot, panagungar, ken dagiti rason nga ipalpalubos ti Dios ti dakes a bambanag. Kinuna ti padi ken ti asawana a dagiti imbaga ni Eliso ti sungbat dagiti kararagda.

 Iti simmaruno a lawas, nagsubli ti padi ken ti asawana ket nakikaduada iti panagadal ti babai. Ti kapitulo nga iyad-adal ni Eliso ket “Ti Pudno a Namnama Dagiti Natayen a Patpatgem iti Biag” iti libro nga Ania a Talaga ti Isursuro ti Biblia? Aktibo a nakipaset ti agassawa iti panagadal.

 Idi agangay, immatenderda iti special convention dagiti Saksi ni Jehova iti Tbilisi, Georgia. Natukay ti pusoda iti nakitada a nagpaiduma nga ayat ken panagkaykaysa, a nabayagen nga isursuroda kadagiti karelihionanda ngem saanda a nagballigi.