ÞAÐ er nöturleg staðreynd að margir eru sólgnir í að eignast allt sem hægt er að kaupa þó að þeir séu við það að missa vinnuna, heimilið og jafnvel ævisparnaðinn.

Þegar fólk hugsar þannig er það auðvelt skotmark auglýsenda sem reyna að telja okkur trú um að við verðum að eiga stærra hús, betri bíl og vera í réttu fötunum. Og það er ekkert mál þó að þú eigir ekki fyrir því – þú kaupir bara út í reikning. Fyrir mörgum er aðalmálið að líta út fyrir að vera í góðum efnum þótt þeir séu skuldugir upp fyrir haus.

Fyrr eða síðar þarf að sjálfsögðu að horfast í augu við veruleikann. „Að kaupa sér íburðarmiklar vörur til að líta vel út í augum sjálfra sín og annarra er eins og að reykja krakk til að láta sér líða vel,“ segir í bókinni The Narcissism Epidemic. „Hvort tveggja er tiltölulega ódýrt í byrjun og áhrifin eru mjög góð – en þau vara stutt. Það líður ekki á löngu þar til maður stendur uppi allslaus og þunglyndur.“

Biblían sýnir fram á að „oflæti vegna eigna“ sé heimskulegt. (1. Jóhannesarbréf 2:16) Staðreyndin er sú að ef við erum of upptekin af eigum okkar dregur það athyglina frá því sem mestu máli skiptir í lífinu og ekki er hægt að kaupa fyrir peninga. Lítum á þrennt.

Brianne * er bandarísk unglingsstúlka. Henni finnst pabbi sinn leggja of mikla áherslu á vinnuna og peningana sem hann aflar. „Við höfum allt sem við þurfum og meira til,“ segir hún, „en pabbi er aldrei heima því að hann er alltaf á ferðalögum. Ég veit vel að það er vegna vinnunnar en mér finnst hann líka hafa ábyrgð gagnvart fjölskyldunni.“

Til umhugsunar: Hverju sér pabbi Brianne hugsanlega eftir seinna meir? Hvaða áhrif hefur það á samband þeirra feðgina að hann leggur svona mikið upp úr efnislegum hlutum? Hvers þarfnast fjölskyldan frá honum annars en peninga?

Biblían segir þetta um málið:

• „Fégirndin er rót alls ills. Við þá fíkn hafa nokkrir ... valdið sjálfum sér mörgum harmkvælum.“ – 1. Tímóteusarbréf 6:10.

• „Betri er einn skammtur kálmetis með kærleika en alinaut með hatri.“ – Orðskviðirnir 15:17.

Kjarni málsins: Samheldin fjölskylda fæst ekki fyrir peninga. Samheldni kemur af því að verja tíma með fjölskyldunni og gefa henni næga ást og athygli. – Kólossubréfið 3:18-21.

„Mamma er alltaf að segja mér að ég verði að ná mér í ríkan mann en læra til öryggis einhverja handiðn til að geta fengið góða vinnu ef ég þarf á því að halda,“ segir Sara sem er 17 ára. „Það eina sem virðist skipta hana máli er hvernig hún geti grætt peninga.“

Til umhugsunar: Hvaða réttmætu áhyggjur hefurðu varðandi framtíð þína? Hvenær eru áhyggjurnar hættar að eiga rétt á sér og komnar út í öfgar? Gæti mamma hennar Söru sýnt meira jafnvægi í því hvernig hún hugsar um fjárhagslegt öryggi?

Biblían segir þetta um málið:

• „Safnið yður ekki fjársjóðum á jörðu þar sem mölur og ryð eyðir og þjófar brjótast inn og stela.“ – Matteus 6:19.

• „Þið vitið ekki hvernig líf ykkar verður á morgun.“ – Jakobsbréfið 4:14.

Kjarni málsins: Það er ekki nóg að sanka að sér peningum til að tryggja framtíð sína. Peningum er hægt að stela og þeir geta ekki læknað sjúkdóma eða haldið í manni lífinu. (Prédikarinn 7:12) Biblían kennir að ósvikið öryggi felist í því að þekkja Guð og fyrirætlanir hans. – Jóhannes 17:3.

„Foreldrar mínir kenndu mér að lifa einföldu lífi,“ segir Tanya sem er 24 ára. „Okkur tvíburasystrunum leið vel heima þó að við ættum sjaldnast meira en það nauðsynlegasta.“

Til umhugsunar: Hvers vegna getur verið erfitt að gera sér að góðu það nauðsynlegasta? Hvernig lítur þú á peninga og hvaða fordæmi ertu að setja fjölskyldu þinni með því?

Biblían segir þetta um málið:

• „Ef við höfum fæði og klæði þá látum okkur það nægja.“ – 1. Tímóteusarbréf 6:8.

• „Eigi lifir maðurinn á einu saman brauði heldur á hverju því orði sem fram gengur af Guðs munni.“ – Matteus 4:4.

Kjarni málsins: Lífið er meira en peningar og það sem fæst fyrir peninga. Biblían hittir naglann á höfuðið: „Enginn þiggur líf af eigum sínum þótt auðugur sé.“ (Lúkas 12:15) Það gefur lífinu raunverulegt gildi að fá svör við mikilvægum spurningum eins og þessum:

• Hver er tilgangur lífsins?

• Hvað ber framtíðin í skauti sér?

• Hvernig get ég nært minn andlega mann?

Útgefendur þessa tímarits eru meira en fúsir til að hjálpa þér að finna svörin við þessum spurningum.