„Hann ætti … að leggja hart að sér og vinna heiðarleg störf með höndum sínum svo að hann hafi eitthvað til að gefa þeim sem eru hjálparþurfi.“ – EFESUSBRÉFIÐ 4:28.

Skapari okkar hvetur okkur til að temja okkur jákvætt viðhorf til vinnu. Hvers vegna? Sá sem er vinnusamur gleðst vegna þess að hann getur séð sér og fjölskyldu sinni farborða. Hann gæti jafnvel verið í aðstöðu til að hjálpa einhverjum sem er í kröggum. Vinnuveitandi hans mun líka hafa mætur á honum. Vinnusamur einstaklingur er líklegri til að halda vinnu sinni. Ritningin segir með réttu að vinna sé „gjöf Guðs“. – Prédikarinn 3:13.

„Við erum sannfærðir um að við höfum góða samvisku og viljum vera heiðarlegir í öllu sem við gerum.“ – HEBREABRÉFIÐ 13:18.

Ef við erum heiðarleg höfum við líka sjálfsvirðingu, njótum innri friðar og sofum betur. Auk þess njótum við trausts og virðingar annarra. Þeir sem eru óheiðarlegir ræna sjálfa sig þessum gæðum. Samviskan ónáðar þá og þeir þurfa að búa við nagandi ótta um að það komist upp um þá einhvern daginn.

„Látið ekki ást á peningum stjórna lífi ykkar heldur látið ykkur nægja það sem þið hafið.“ – HEBREABRÉFIÐ 13:5.

Við þurfum peninga til að eiga fyrir mat og öðrum nauðsynjum. En „ást á peningum“ er hættuleg. Hún getur orðið til þess að maður fari að nota mestallan tíma sinn og krafta í að þéna meiri peninga. Þessi eftirsókn í peninga getur reynt á hjónabandið, rænt tíma sem hefði mátt nota með börnunum og komið niður á heilsunni. (1. Tímóteusarbréf 6:9, 10) Auk þess er þeim sem elska peninga hætt við að freistast til óheiðarleika. Vitur maður sagði: „Trúfastur maður hlýtur ríkulega blessun en sá sem vill verða ríkur í flýti verður ekki saklaus til lengdar.“ – Orðskviðirnir 28:20.

„Varðveittu visku og skarpskyggni.“ – ORÐSKVIÐIRNIR 3:21.

Góð menntun gerir okkur að ábyrgu fullorðnu fólki og líka að góðum foreldrum. En góð menntun ein sér getur ekki tryggt okkur varanlegt öryggi né hamingju. Til að vera farsæl á öllum sviðum lífsins þurfum við þá menntun sem Guð gefur okkur. Biblían segir um þann sem hlustar á Guð: „Allt sem hann gerir tekst vel.“ – Sálmur 1:1–3.