Í þessari grein

•  Að tala augliti til auglitis

•  Að byrja samræður

•  Hvað segja jafnaldrarnir?

 Sumum finnst erfitt og stressandi að tala við aðra augliti til auglitis og miklu auðveldara að senda bara textaskilaboð.

 „Maður getur ekki eytt eða breytt því sem maður segir augliti til auglitis eins og þegar maður skrifar textaskilaboð.“ – Anna.

 „Textaskilaboð er eins og upptaka en að tala augliti til auglitis við einhvern er eins og að vera í beinni útsendingu. Ég er allan tímann að passa hvað ég segi.“ – Jean.

 Fyrr eða síðar þarftu að kunna að tala við fólk augliti til auglitis. Það er nauðsynlegt að tileinka sér þessa færni ef þig langar til dæmis til að eignast nýja vini, fá vinnu og halda henni eða kynnast væntanlegum maka þegar þú ert tilbúinn til þess.

 Góðu fréttirnar eru þær að það er ekkert að óttast. Þú getur lært samræðulistina, jafnvel þótt þú sért feiminn.

 „Það er óhjákvæmilegt að verða stundum vandræðalegur og hitta ekki í mark með því sem maður segir. Það er gott að taka sig ekki of alvarlega.“ – Neal.

•   Spyrðu spurninga. Hugsaðu um eitthvað sem fólk gæti haft áhuga á og notaðu það til að brydda upp á samræðum. Þú gætir til dæmis spurt:

   „Fórstu eitthvert síðasta sumar?“

   „Þetta er frábær vefsíða. Hefurðu séð hana?“

   „Varstu búinn að frétta …?“

   Til að vera enn markvissari geturðu látið þér detta í hug hvað þú átt sameiginlegt með manneskjunni. Eruð þið til dæmis í sama skóla eða vinnið við það sama? Þá gætirðu spurt út í það.

   „Spyrðu spurninga sem þér finnst áhugaverðar og þú vildir fá svör við.“ – Maritza.

   Varnaðarorð: Passaðu þig að yfirheyra ekki fólk með spurningaflóði. Sýndu nærgætni og spyrðu ekki spurninga sem gætu gert fólk vandræðalegt eins og: „Hvað óttast þú mest?“ eða: „Af hverju ertu alltaf í bláum fötum?“ Slíkar spurningar gætu virkað of persónulegar. Seinni spurningin gæti jafnvel hljómað eins og gagnrýni.

   Þú gætir líka sagt þeim sem þú ert að tala við þína skoðun áður eða eftir að þú spyrð spurningar. Þá líður fólki ekki eins og það sé í viðtali heldur verða þetta þægilegar samræður.

   Meginregla Biblíunnar: „Hugsanir mannshjartans eru eins og djúp vötn en hygginn maður dregur þær fram.“ – Orðskviðirnir 20:5.

•   Hlustaðu vel. Til að geta átt samræður við aðra er mikilvægara að hlusta en að tala.

   „Ég reyni að læra eitthvað nýtt um þann sem ég er að tala við. Síðan reyni ég að leggja á minnið það sem viðkomandi sagði svo að ég geti fundið góða spurningu til að spyrja hann næst þegar við tölum saman.“ – Tamara.

   Varnaðarorð: Hafðu ekki áhyggjur af því hvað þú ætlar að segja næst. Ef þú hlustar af athygli er auðveldara fyrir þig að vita hvað þú getur lagt til málanna.

   Meginregla Biblíunnar: „Hver og einn á að vera fljótur til að heyra, seinn til að tala.“ – Jakobsbréfið 1:19.

•   Sýndu einlægan áhuga. Samræðurnar verða skemmtilegri ef þér er annt um þann sem þú ert að tala við.

   „Ef fólk finnur að þér er einlæglega annt um það verða samræðurnar ánægjulegar, jafnvel þótt það komi vandræðalegar þagnir inn á milli.“ – Marie.

   Varnaðarorð: Farðu ekki yfir strikið. Það gæti verið ókurteisi að segja: „Þetta er flottur jakki? Hvað kostaði hann?“

   Meginregla Biblíunnar: „Hugsið ekki aðeins um eigin hag heldur einnig hag annarra.“ – Filippíbréfið 2:4.

 Hvernig geturðu endað samræður? „Reyndu að ljúka á jákvæðum nótum,“ segir ungur maður sem heitir Jordan. „Að segja eitthvað eins og: ‚Það var gaman að tala við þig‘ eða: ‚Gangi þér vel‘ gæti auðveldað þér að taka aftur upp þráðinn næst þegar þið hittist.“