LESN 2
A Uu A di Chuu Gad?
1. Wa mek wi fi sorv Gad?
Di bigis riizn a dat im a di Kriyieta, so di laif we wi liv kom fram im. An im a di onggl Wan we gi wi di gud nyuuz we wi fain iina di Baibl.—1 Timoti 1:11.—Riid Revilieshan 4:11.
2. Gad—a uu im bi?
Gad a wan Spirit, so wi kyaahn si im. An dat miin se im aiya dan evribadi an evriting we liv pan di ort. (Jan 1:18; 4:24) Bot wi stil kyan lorn bout im wiez dem, laik im lov, im wizdom, an im powa. Ou? Bai di tingz dem we im mek, laik di priti flowaz dem an di difrant difrant kain-a fruut dem we wi kyan iit.—Riid Ruoman 1:20.
Wi kyan lorn nof nof muor tingz bout Gad wen wi riid di Baibl. Iina it, it tel wi we im laik, we im no laik, an ou im chriit piipl.—Riid Luuk 6:36; Jiemz 5:11.
3. So wa a Gad niem?
Piipl se Gad av uol iip a difrant niem laik “Laad,” “Gad,” “Faada,” “Almaiti.” Bot dem word de jos diskraib Gad; dem a jos taikl. Iina di ‘Owa Faada’ prieya, Jiizas se: “Wi Faada we iina evn, mek piipl av nof rispek fi yu an yu niem.” (Matyu 6:9) A we im did a taak bout? Di Baibl shuo se a onggl wan niem Gad av, an da niem de a Jeuova. Iina fi wi langwij, wi se “Jeuova,” an som piipl se “Yaawe.”—Riid Psalm 83:18.
Nof piipl wuda sopraiz fi nuo se di fos taim wen di Baibl rait, Gad niem did in de uova 7,000 taim. Bot yu mait wanda wai wi no si’it so moch taim iina nof a di Baibl dem. Dem swich out Gad niem an put taikl laik “Laad” an “Gad” we di niem “Jeuova” fi de. Bot wen Jiizas tiich piipl bout Gad, im mek dem nuo Gad niem.—Riid Jan 17:26.
Wach da vidiyo ya Wa a Gad Rait Niem?
4. Yu tingk Jeuova riili kier bout wi?
Jos laik da faada ya we lov im pikni, wa Gad a du nou a-go bi fi wi uona gud
Nof piipl biliiv se aal a di wikidnis an sofarieshan we a gwaan a bikaa Gad no kier bout wi. Som piipl fiil se wen dem a sofa, a Gad a tes dem fiet, bot dat no chuu.—Riid Jiemz 1:13.
Gad no fuos piipl fi du notn we dem no waahn du—nat iivn fi sorv im. (Joshua 24:15) Bot no chuu se nof a di sofarin a bikaa piipl chuuz fi du di wikid ting dem? An wen Jeuova si aal a di wikidnis we a gwaan, it ort im tu im aat.—Riid 1 Piita 5:7.
Bikaa Jeuova kier bout wi, im riili waahn wi enjai laif, an dat a di riizn wai im suun get rid a sofarin an aal a dem de uu kaaz it. Iina Lesn 8 we a-go kom op, wi a-go lorn wa mek sofarin stil a gwaan rait nou.—Riid 2 Piita 2:9; 3:7, 13.
5. Wa wi kyan du fi get iivn kluosa tu Gad?
Jeuova tel wi se ef wi waahn get kluos tu im, wi afi prie tu im. An im lov wen yu prie tu im. (Psalm 65:2; 145:18) Im si an nuo wen wi a chrai fi du di rait, iivn ef wi jrap shaat somtaim, an im wilin fi paadn wi. Iivn duo non a wi no porfek, wi kyan stil get kluos tu im.—Riid Jiemz 4:8; 1 Jan 1:9.
A Jeuova gi wi laif, an bikaaz a dat, wi fi lov im wid aal a wi aat. (Maak 12:30) Shuo Gad se yu lov im, lorn muor bout im, an du we im aks yu fi du. A so yu a-go jraa kluos tu im.—Riid 1 Timoti 2:4; 1 Jan 5:3.
