Gad did gyada Iebriyam jinarieshan dem tugeda fi bi wan nieshan an gi dem wan set a laa fi fala. Im did kaal da nieshan de “Izrel.” Dem a did di onggl nieshan we stik tu di worship a di chuu Gad, an a dem im did put inchaaj fi protek an tek kier a im wod. (Psalm 147:19, 20) So piipl fram aal a di ada nieshan dem kuda get blesn chuu di nieshan a Izrel.​—Riid Aks 3:25.

Gad did pik di Izrelait dem fi bi di nieshan fi mek piipl nuo bout im bai wa dem du an se. Di tingz we dem did du an go chuu fram wie bak wen shuo ou piipl kyan get blesn wen dem du we Gad se. (Deuteronomy 4:6) So evriting bout di Izrelait dem kuda shuo ada piipl ou fi get fi nuo di wan chuu Gad.

Afta a taim, di Izrelait dem luuz Gad sopuot an blesn, so insted a dem, Jeuova gi im sopuot an blesn tu di gruup a piipl we fala Krais an worship Gad. (Matyu 21:43; 23:37, 38) A dem chuu Kristiyan de Jeuova a yuuz fi mek piipl nuo bout im.​—Riid Aks 15:14, 17.

Jiizas put tingz tugeda so dat im falara dem kuda work tugeda az wan fi priich aal uova di ort so dat ada piipl kyan ton im falara tu. (Matyu 10:7, 11; 24:14; 28:19, 20) Gad a-go suun get rid a di wikidnis we a gwaan iina di worl. So, di work suun don. Fi di fos taim iina ischri, Jeuova a gyada tugeda miliyanz a piipl fram aal uova di ort fi worship im iina chuut. (Revilieshan 7:9, 10) Bikaaz dem a work tugeda az wan, Jiizas chuu falara dem kyan bil op an elp dem wan aneda. Aal uova di worl, dem get di siem tiichin fram di Baibl wen dem go a dem miitn dem.​—Riid Iibruu 10:24, 25.

Iina di 1870s, wan sumaal gruup a piipl we did a stodi di Baibl did staat fi si som Baibl chuut we did iina di daak. Dem did nuo se Jiizas did put di fos gruup a Kristiyan dem tugeda fi priich, so dem staat priich bout di Kindom aal uova di worl. Iina 1931 dem tek aan an staat yuuz di niem Jeuova Witnis.​—Riid Aks 1:8; 2:1, 4; 5:42.

Di Kristiyan dem we did liv afta Jiizas ded did de iina uol iip a difrant plies, an dem did av wan speshal gruup we gaid di uol a dem. Da gruup de did aksep se a Jiizas a di Ed a im falara dem. (Aks 16:4, 5) A siem wie so tide, di Jeuova Witnis dem aal uova di worl a get gaidans fram wan gruup a elda we av uol iip a ekspiiriyens we a di Govanin Badi. Dem luk afta di tingz dem we gwaan iina di afis dem we di Jeuova Witnis dem yuuz fi chransiliet, print, an mek shuor piipl av aal di tingz we piipl niid fi stodi di Baibl iina uova 1,000 langwij. So di Govanin Badi kyan gi gaidans fram di Baibl an elp bil op di uova 100,000 kanggrigieshan dem iina di worl. Iina evri wan a di kanggrigieshan dem, dem av som man wid ekspiiriyens we a elda, an dem elda de tek kier a di piipl dem iina di kanggrigieshan wid lov.​—Riid 1 Piita 5:2, 3.

Di Jeuova Witnis piipl work tugeda fi priich di gud nyuuz an elp ada piipl fi ton wan a Jiizas falara tu. Jos laik Jiizas apasl dem, wen wi priich wi go fram wan ous tu di neks wan. (Aks 20:20) An wi aafa fi stodi di Baibl wid piipl uu riili waahn lorn di chuut bout Gad. Bot di Jeuova Witnis dem a muor dan jos wan aaganaizieshan a piipl. Wi a wan fambili wid wan Faada we lov wi. Wi a breda an sista, an wi riili kier bout wi wan aneda. (2 Tesaluoniyan 1:3) Chuu Jeuova piipl dem aaganaiz demself so dat dem kyan pliiz Gad an elp ada piipl, dem a di apiyes fambili iina di uol worl.​—Riid 1 Piita 2:9; Aks 20:35.