1. Wa Salaman did se iina Iikliiziyastiiz 7:20 we a so it go fi chuu?

 SALAMAN did se: “Kaa no man we a du wa rait we de pan ort no aalwiez du wa gud an no sin.” (Iik. 7:20) Dat a chuu! Aal a wi a sina. (1 Jan 1:8) So dat miin se aal a wi du sitn we wi waahn Gad fi paadn wi fa an we wi waahn ada piipl fi paadn wi fa tu.

2. Ou it fiil wen yu du sitn fi ort yu fren an dem paadn yu?

² Yu mait-a kyan memba wan taim wen yu did du sitn fi ort wan a yu gud fren dem. So yu go tel dem sari bikaa yu waahn tingz fi gud wid di tuu a unu agen. Yu did fiil gud wen yu fren did paadn yu, no chuu?

3. Wa wi a-go luk pan iina da lesn ya?

³ Wi waahn Jeuova fi bi wi bes Fren, bot somtaim wi a-go se ar du sitn fi ort im. Dis a wa wi a-go luk pan: Aalduo wi mait-a du sitn fi ort Jeuova, ou wi nuo se im wel waahn fi paadn wi? An ou di wie ou Jeuova paadn sumadi difrant fram di wie ou piipl paadn ada piipl? An a uu Gad a-go paadn?

4. Wa mek wi shuor se Jeuova eva redi fi paadn wi sin dem?

⁴ Di Baibl mek wi nuo se Jeuova eva redi fi paadn piipl. Wen Muoziz did de pan di mountn we niem Sainai, Jeuova mek im nuo uu Im bi. Im sen wan ienjel fi tel  Muoziz dis bout Im: “Jeuova, Jeuova, wan Gad we gud an kain. Im no kwik fi get beks, an im a-go lov yu an stik tu yu fi eva, an im aalwiez du wa im se im a-go du, im lov an stik tu touzn an touzn a piipl, an im a paadn dem sin dem.” (Ek. 34:6, 7) Jeuova Gad gud an kain an im aalwiez redi fi paadn piipl we ton we fram dem sin dem.​—Nii. 9:17; Sa. 86:15.

5. Azkaadn tu Saam 103:13, 14, kaa Jeuova nuo so moch bout wi, wa dat mek im du?

⁵ Jeuova nuo evriting bout wi kaa a im mek wi. Jos tingk bout it! Jeuova nuo evriting bout evribadi we de pan di ort. (Sa. 139:15-17) Im nuo aal a di bad wiez dem we wi get fram wi mada an faada dem. Pan tap a dat, im nuo di sitn dem we wi go chuu iina laif we mek wi stie di wie ou wi stie. Kaa Jeuova nuo evriting bout wi, it mek im gud an kain tu wi an it mek im tek im taim wid wi.​—Sa. 78:39; riid Saam 103:13, 14.

6. Wa Jeuova du fi mek wi si se im wel waahn fi paadn wi?

⁶ Di sitn dem we Jeuova du shuo se im wel waahn fi paadn wi. Im nuo se a kaa a wa Adam did du mek wi en op a sin an ded. (Ruo. 5:12) Non a wi kyaahn tap wi wan aneda fram sin an ded. (Sa. 49:7-9) Bot kaa Gad lov wi so moch an im gud an kain tu, im du sitn we kyan elp wi. Wa yu tingk im du? Jan 3:16 mek wi nuo se Jeuova sen im wan dege-dege Bwai Pikni fi kom ded fi wi. (Mat. 20:28; Ruo. 5:19) Jiizas ded so dat di wan dem we chos iina im na’afi ded. (Iib. 2:9) Jos tingk bout ou it did ort Jeuova fi si im wan dege-dege Bwai Pikni a sofa an ded! Jeuova wudn mek im Bwai Pikni kom ded fi wi ef im neehn waahn paadn wi sin dem.

7. Tel wi bout som piipl we di Baibl se Jeuova paadn.

⁷ Di Baibl tel wi bout nof piipl we Jeuova did paadn. (Ifii. 4:32) Uu an uu yu kyan tingk bout? Miebi yu tingk bout di king we niem Manase. Da man de did a wan wikid man we du som torbl sitn we Jeuova iet. Im mek di piipl dem worship faalz gad. An im kil aaf im uona pikni dem fi bon sakrifais gi faalz gad. An pan tap a dat, im mek sitn we im se a gad an  tek it put iina Jeuova ous. Di Baibl mek wi nuo se im du uol iip a sitn we bad fi ort Jeuova. (2 Kr. 33:2-7) Afta aal a dis did gwaan, wi si se chuu Manase did sari an ton we fram im sin dem, Jeuova paadn im. An Jeuova aal mek im ton bak king agen. (2 Kr. 33:12, 13) Ar yu mait-a tingk bout di king we niem Dievid we did sin gens Jeuova kaa im sliip wid sumadi we im no marid tu an im en op kil sumadi tu. Bot wen Dievid uon op tu wa im du, an ton we fram im sin dem Jeuova paadn im tu. (2 Sam. 12:9, 10, 13, 14) Ye man, wi nuo se Jeuova wel waahn fi paadn piipl. Wi a-go luk pan ou wen Jeuova paadn piipl it difrant fram wen piipl paadn ada piipl.

8. Ou wi nuo se Jeuova a di bes Joj?

⁸ Jeuova a “di Joj fi evriting we de pan di ort.” (Jen. 18:25) Wan gud joj afi nuo di laa dem gud gud. An a riili so it go wid Jeuova, im no onggl nuo di laa dem, bot a im mek dem tu. (Aiz. 33:22) Nobadi no nuo wa rait fram wa rang muo dan Jeuova. An wen yu tingk bout it, sumadi we a wan gud joj afi nuo evriting bout wan kies bifuo im mek op im main bout wa im a du. A so wi nuo se nobadi kyaahn du dis beta dan Jeuova.

9. Wa a som a di sitn dem we Jeuova nuo bifuo im mek op im main fi paadn sumadi?

⁹ Piipl afi dipen pan wa dem si an ier fi joj wan kies, bot a no so it go wid Jeuova, kaa Jeuova nuo evriting. (Jen. 18:20, 21; Sa. 90:8) Im nuo wa mek sumadi gwaan di wie ou dem gwaan bies pan ou dem gruo op, an tingz we dem go chuu iina laif, an di wiez dem we dem get fram dem mada an faada. An im nuo wa a gwaan iina dem ed tu. Jeuova kyan aal riid wa a gwaan iina sumadi aat. So im nuo wa push dem fi go du sitn, ou dem fiil bout wa dem du, wa mek dem du wa dem du, an wa dem waahn fi du. Notn kyaahn aid fram Jeuova. (Iib. 4:13) Dat miin se wen Jeuova paadn wi, a kaa im nuo evriting bout wa gwaan.

10. Wa mek wi nuo se wen Jeuova joj wi im dwi’it iina wan fier wie? (Dyuutaranami 32:4)

¹⁰ Wen Jeuova joj wan kies im aalwiez du wa fier. Im no paashal. Im no paadn sumadi kaa a ou dem luk, ar umoch moni dem av, ar umoch piipl nuo dem, ar kaa a wa dem kyan du. (1 Sam. 16:7; Jmz. 2:1-4) Nobadi kyaahn presha Jeuova ar pie im aaf fi du notn. (2 Kr. 19:7) An di sitn dem we im du a no kaa im kyaahn bada wid wa a gwaan. An im no lov sitn ar sumadi so moch das im no du wa im fi du. (Ek. 34:7) So a no aks wi de aks, wi nuo se Jeuova a di bes Joj kaa im nuo evriting bout wi an wa a gwaan.​—Riid Dyuutaranami 32:4.

11. Wa a di difrens wid wen Jeuova figiv wi fram wen a sumadi paadn wi?

¹¹ Di man dem we did rait di Baibl buk dem iina di Iibruu langwij did si se wen Jeuova paadn piipl it difrant fram wen piipl paadn piipl. Wan a di Iibruu wod dem we dem yuuz fi shuo ou Jeuova figiv did difrant fram di wod dem we dem yuuz fi shuo wen a piipl a paadn piipl. So wi si se dem nuo se wen Jeuova paadn sumadi it difrant fram wen sumadi paadn sumadi, kaa wen Jeuova figiv wi, it don! A it dat. So wen Jeuova paadn wi, ou dat mek wi fiil?

12-13. (a) Ou it mek sumadi fiil wen Jeuova paadn dem? (b) Wen Jeuova paadn wi fi sitn, im a-go uol it gens wi agen? Wa mek yu se so?

 ¹² Wen Jeuova paadn yu an yu tek it fi wa it bi, it mek yu ‘fiil gud’ an yu kanchens naa go bada yu. Di wie ou yu fiil wen a ‘Jeuova paadn’ yu difrant fram di wie ou yu fiil wen a sumadi paadn yu. (Aks 3:19) Wen Jeuova paadn wi, wi an im ton gud fren agen an im no uol wi sin dem gens wi agen.

¹³ So wen Jeuova paadn wi, im naa go ponish wi fi dat de sin de agen. (Aiz. 43:25; Jer. 31:34) Jeuova put wi sin dem faar fram wi “jos laka ou wich paat di son kum op de faar fram wich paat it gu dong.” (Sa. 103:12) Wen wi tingk bout di wie ou Jeuova paadn wi, se wen im paadn wi a it dat, it mek wi tangk im an it mek wi fiil gud. (Sa. 130:4) Bot a uu Jeuova a-go paadn?

14. Wa a som a di sitn dem we wi lorn bout aredi we Jeuova luk pan fi nuo ef im a-go paadn wi ar im naa go paadn wi?

¹⁴ So wi don si se, wen Jeuova a mek op im main fi si ef im fi figiv wi, it na’av notn fi du wid ou bad wi sin bi. Kaa Jeuova a di wan we mek wi an a im mek di laa dem we im gi wi tu, an a im a-go joj wi, im nuo evriting. So im wi nuo ef im fi paadn wi ar ef im no fi paadn wi. Bot wa a som a di sitn dem we Jeuova luk pan bifuo im paadn sumadi?

15. Azkaadn tu Luuk 12:47, 48, wa a wan sitn we Jeuova luk pan fi si ef im a-go paadn sumadi?

¹⁵ Wan a di ting dem we Jeuova luk pan a ef di sumadi did nuo se wa im a du rang. Jiizas mek dis klier klier iina Luuk 12:47, 48. (Riid.) Di sumadi we plan fi du sitn bad an im nuo se it rang, a wan wikid sitn im du. Da sumadi de mait-a en op bi sumadi we naa go get paadn fi dem sin dem. (Maak 3:29; Jan 9:41) Bot ye, somtaim wi du sitn we wi nuo se rang. Wen dis ya apm, wi kyan get paadn fi’it? Ye man, wi kyan get paadn fi’it! An wi gweehn luk pan wan neda ting we Jeuova luk pan.

16. Wa it miin fi ton we fram wi sin dem, an wa mek wi afi du dat bifuo Jeuova paadn wi?

¹⁶ Wan neda ting we Jeuova luk pan a  fi si ef di sumadi we du wa rang ton we fram im sin dem. Wa dat miin? Dis miin se Jeuova a luk fi si ef di sumadi “chienj ou dem a tingk bout tingz, ou dem fiil bout tingz, an wa dem mek op dem main fi du.” It miin se im fiil sari an sad bad bout di tingz dem we im du ar we im neva du we kaaz im fi sin. Di sumadi we ton we fram dem sin no onggl sari bad se dem du sitn we rang, bot dem fiil it kaa dem did tap du di sitn dem we wuda kip dem kluos tu Jeuova. Memba se di king dem we did niem Manase an Dievid did sin bad, bot Jeuova did paadn dem kaa dem did riili sari fi di bad sitn dem we dem did du. (1 Ki. 14:8) So wi si se Jeuova afi si se di sumadi riili sari fi wa dem du bifuo im paadn dem. Bot a no onggl fi se dem sari, dem afi go du sitn bout it tu. * An dat a di neks ting we wi a-go taak bout we Jeuova luk pan.

17. Wa it miin fi ton we fram di bad sitn dem we wi a du, an wa mek wi afi du dat so wi no en op a du di bad sitn dem we wi yuus tu du agen? (Aizaiya 55:7)

¹⁷ Wan neda ting we Jeuova waahn fi si a ef di sumadi tap du di bad sitn dem we dem a du. So dis miin tu se dem a-go ton we fram di bad sitn dem we dem a du an du wa Jeuova waahn dem fi du. (Riid Aizaiya 55:7.) Dat miin tu se di sumadi a-go staat fi tingk iina wan nyuu wie. Dem a-go staat fi tingk iina di wie ou Jeuova waahn dem fi tingk. (Ruo. 12:2; Ifii. 4:23) Im afi mek op im main se im naa go a tingk di wie ou im yuus tu a tingk an im naa go du di bad sitn dem we im yuus tu a du. (Kol. 3:7-10) Chuu wi chos an biliiv se Gad sen im Son kom ded fi wi, a dat mek Jeuova kyan paadn wi a wi sin dem. So wen im si se wi a chienj op wi doti wiez dem an ton we fram wi sin dem, a da taim de im a-go paadn wi a wi sin dem kaaz a wa Jiizas kom du fi wi.​—1 Jan 1:7.

18. Wa a som a di sitn dem wi lorn bout wen Jeuova paadn wi?

¹⁸ Mek wi taak bout som a di mien sopm dem we wi dis luk pan. Wi did si se nobadi kyaahn paadn piipl laik ou Jeuova paadn piipl. Wa mek wi kyan se dat? Di fos ting, a das Jeuova eva redi fi paadn piipl. Di sekan ting, a das im nuo evriting bout wi. An kaa im nuo evriting bout wi, im a di bes sumadi fi nuo ef wi riili ton we fram wi sin dem. An di tord ting we wi luk pan, a das wen Jeuova figiv wi, a it dat! Im no yuuz dem bak gens wi. A so kom nou wi kanchens naa go bada wi an Jeuova a-go api wid wa wi a du.

19. Aalduo wi no porfek an wi a-go en op du som bad sitn somtaim, wa mek wi kyan stil api?

¹⁹ Kaa wi no porfek wi a-go eva a du sitn we rang. Wen wi riid di buk we niem Insight on the Scriptures, Volume 2, piej 771, it mek wi fiil beta kaa it mek wi nuo se: “Jeuova nuo se di piipl dem we a sorv im no porfek so dem na’afi aalwiez a biit op demself kaa dem du sitn rang. (Sa. 103:8-14; 130:3) Ef dem a chrai dem bes fi du wa Jeuova waahn dem fi du, dem kyan api wid dat. (Fil. 4:4-6; 1Jan 3:19-22).” Dis mek wi fiil gud, no chuu?

20. Wa wi a-go luk pan iina di neks lesn?

²⁰ Wen wi riili sari se wi du sitn we Jeuova no waahn wi fi du, wi tangk im se im redi fi paadn wi. Bot ou wi kyan du laik Jeuova an paadn piipl tu? Ou wen wi paadn piipl it komiin laik wen Jeuova paadn piipl? Bot wa a som wiez we wen wi paadn piipl it difrant fram wen Jeuova paadn piipl? Wa mek it gud fi nuo se wen Jeuova paadn piipl it difrant fram wen piipl paadn piipl? Wi a-go get di ansa fi dem kwestiyan ya iina di neks lesn.