UOL iip a piipl nuo se wen Jiizas did ded, dem niel im op wid tuu kriminal saida im. (Mat. 27:35-38) Piipl an piipl av nof difrant tingz fi se fram wa di Baibl se bout wa dem du wid Jiizas badi afta im ded.​—Maak 15:42-46.

Som piipl we aalwiez a chrai fi fain out ef wa di Baibl se a so it go fi chuu, neehn tingk se sumadi we dem did kil wen dem niel dem op pan wan puol wuda get wan gud beriyal iina wan tuum. Dem fiil se a sitn els dem wuda du wid dem. Ariel Sabar we rait iina di Smithsonian magaziin, mek wi nuo se a di wos kain-a piipl dem dem wuda kil an niel op pan wan puol. An dem se di Ruoman ruula dem wuda waahn dem kain-a kriminal ya fi get di wos kain-a beriyal. So dem wuda waahn dem ded badi fi tan pan di puol an lef de til jangkro an dem sitn de kom nyam it, an wa lef bak, dem mait-a tek it dash iina wan griev.

Bot di piipl dem we dig op uol taim tingz fi stodi it an fain out wa apm, get fi si se a no so it did go wid som a di Juu piipl dem we dem did kil. Iina 1968, dem fain di buon dem fi wan man we niem Yehochanan, we dem did kil wen dem niel im op pan wan puol, fram bout di taim wen di Kristiyan dem did de bout wen di Baibl did a rait. Dem fain im buon dem iina wan baks we de iina wan tuum wich paat di Juu piipl dem naamali beri dem ded piipl. Wan a di ting dem we dem si, a das im futbak av wan niel iina it we niel aan pan piis a buod. A wan fuor an a aaf inch niel did de iina it. An dis shuo se, iivn duo di Baibl se dem did kil Jiizas wen dem did niel im op pan wan puol, im did get wan gud beriyal fi chuu, kaa Yehochanan buon shuo se di Ruoman ruula dem did lou som a di Juu dem fi get wan gud beriyal, aalduo a wan puol dem did niel dem op pan fi kil dem.

Wen dem luk pan Yehochanan futbak, piipl an piipl mait-a av difrant difrant ting fi se wen it kom aan tu ou dem tingk Jiizas did set wen dem niel im op pan di puol. Bot a wan ting wi si klier klier, an a das som a di kriminal dem did get wan gud beriyal, an a no jos lef dem lef dem badi fi jangkro an dem sitn de kom nyam it an den dem jos dash wa lef iina wan tuum. Wa wi nuo fi shuor a se, wi kyan chos se wa di Baibl did tel wi wen it se Jiizas did get wan gud beriyal, a so it did go fi chuu, kaaz di sitn dem we dem fain shuo se a so it did go.

Bot muo dan dat, Jeuova did tel wi lang bifuo Jiizas ded, se Jiizas wuda get beri iina wan rich man tuum, an nobadi kudn did tap dat fram apm.​—Aiz. 53:9; 55:11.