Kaa di 70 falara dem neehn de de, it no miin tu se a lef dem did lef Jiizas. Jiizas did jos waahn fi de wid im 12 apasl dem da iivnin de.

Jiizas did pik im 12 falara dem an di ada 70 falara dem tu. Bot di 12 we im pik im kaal dem wan de im apasl dem. (Luuk 6:12-16) Im did iina Gyalalii wen im “kaal im twelv apasl dem” an “sen dem out fi tel piipl bout Gad kindom an fi kyuor di sik.” (Luuk 9:1-6) An afta dat wen Jiizas did dong a Judiya, im pik 70 a im ada falara dem “an sen dem out tuu tuu.” (Luuk 9:51; 10:1) So Jiizas did av falara iina difrant difrant plies we im kuda sen out go priich.

Di Juu piipl dem we did ton Jiizas falara wuda stil kip di Paasuova alidie wid dem fambili. (Ek. 12:6-11, 17-20) Wen Jiizas did suun fi ded, im an im apasl dem go a Jeruusilem bot im neehn kip wan big Paasuova alidie wid im falara dem we kom fram Judiya, Gyalalii an Periya. So wi si se Jiizas did onggl waahn fi kip di Paasuova alidie wid im apasl dem da taim ya. Im tel dem se: “Unu no nuo ou mi did wel waahn da taim ya kom so mi kuda nyam da Paasuova fuud ya wid unu bifuo mi sofa.”​—Luuk 22:15.

Jiizas did du aal a dis kaaz im did suun ded. Im a “Gad Biebi Shiip. . . . A im a di wan we a-go mash op an tek we sin fram outa di worl.” (Jan 1:29) An dis wuda apm iina Jeruusilem we dem a gi op sakrifais tu Gad. Di biebi shiip we di Izrelait dem wuda iit a Paasuova taim did mek dem memba ou Jeuova did frii dem outa Iijip. Bot wen Jiizas gi op im laif it wuda du nof muor fi wi, im wuda frii aal a wi fram sin an det. (1 Kor. 5:7, 8) A siek-a wa Jiizas did du mek di twelv apasl dem kuda ton di foundieshan fi di kanggrigieshan dem. (Ifii. 2:20-22) Matarafak, di uoli siti Jeruusilem “did bil op pan twelv big big stuon. An evri wan a di stuon dem did av di niem fi wan a di Biebi Shiip twelv apasl dem rait dong pan it.” (Rev. 21:10-14) So di twelv apasl dem did av wan big ting fi du iina wa Jeuova a-go du. So wi si wa mek Jiizas did waahn fi av dem wid im wen im a kip di laas Paasuova alidie bifuo im ded an wen im kip di Laad Sopa wid dem afta dat.

Aalduo Jiizas 70 falara dem an di ada wan dem neehn de de wid im wen im did kip di Laad Sopa wid di 12 apasl dem, wa Jiizas du da nait de wen im kip di Laad Sopa wuda elp aal a dem we stik tu im an du wa im se dem fi du. So evribadi we get pik fi go a evn wuda bi paat a di diil we Jiizas did mek wid im apasl dem da nait de fi ruul iina im kindom.​—Luuk 22:29, 30.