Injil Matius 4:1-25
4 Terus, Yésus dituntun roh suci menyang padhang belantara. Ing kana, Yésus digodha+ Iblis.+
2 Sakwisé pasa 40 dina 40 bengi, Yésus ngrasa ngelih.*
3 Bar kuwi, Iblis teka kanggo nggodha+ Yésus lan kandha, ”Nèk kowé pancèn anaké Gusti Allah, kongkonen watu-watu iki dadi roti.”
4 Ning Yésus njawab, ”Kitab Suci kandha, ’Manungsa kudu urip ora mung saka panganan* waé, ning saka saben omongan sing diucapké Yéhuwah.’”*+
5 Terus, Iblis nggawa Yésus menyang kutha suci,*+ ing bagéan témbok sing paling dhuwur ing bait.+
6 Iblis kandha, ”Nèk kowé pancèn anaké Gusti Allah, anjloga. Kitab Suci kan kandha, ’Dhèwèké bakal ngongkon malaékat-malaékaté,’ lan, ’Para malaékaté bakal nampani kowé nganggo tangané bèn sikilmu ora kena watu.’”+
7 Yésus njawab, ”Kitab Suci ya kandha, ’Aja nguji Yéhuwah* Gusti Allahmu.’”+
8 Terus, Iblis nggawa Yésus menyang gunung sing dhuwur banget lan nduduhké kabèh pamréntahané manungsa ing donya lan kemuliaané.+
9 Iblis kandha, ”Kabèh iki bakal tak wènèhké kowé nèk kowé sujud lan nyembah aku sepisan waé.”
10 Bar kuwi, Yésus njawab, ”Lungaa, Sétan! Merga Kitab Suci kandha, ’Mung Yéhuwah* Gusti Allahmu sing kudu mbok sembah,+ lan mung marang Dhèwèké kowé kudu ngabdi.’”*+
11 Terus, Iblis ninggalké Yésus,+ lan para malaékat teka kanggo nglayani Yésus.+
12 Wektu krungu nèk Yohanes wis ditangkep,+ Yésus lunga ing Galiléa.+
13 Sakwisé ninggalké Nazarèt, Yésus teka lan manggon ing Kapernaum,+ ing pinggir laut ing dhaérah Zébulon lan Naftali.
14 Mula, omongané Gusti Allah sing disampèkké liwat Nabi Yésaya kelakon, yaiku,
15 ”Hé tanah Zébulon lan Naftali, ing sepanjang dalan menyang laut, ing sabrangé Kali Yordan, Galiléa sing dienggoni bangsa-bangsa liya,
16 wong-wong sing lungguh ing petengan ndelok cahaya sing padhang,+ lan wong-wong sing lungguh ing panggonan sing ditutupi bayang-bayang kematian wis dipadhangi.”+
17 Kèt kuwi, Yésus mulai nginjil lan kandha, ”Mertobata, merga Kerajaan swarga wis cedhak.”+
18 Wektu mlaku ing pinggir Laut Galiléa, Yésus ndelok Simon, sing disebut Pétrus,+ lan Andréas. Wong loro kuwi kakang adhi. Wong loro kuwi lagi nguncalké jala menyang laut, merga wong loro kuwi nelayan.+
19 Yésus kandha, ”Mèlua aku. Kowé bakal tak dadèkké tukang njala manungsa.”+
20 Wong loro kuwi langsung ninggalké gawéané* lan mèlu Yésus.+
21 Sakwisé lunga saka kono, Yésus ndelok Yakobus lan Yohanes.+ Wong loro kuwi ya kakang adhi, lan bapaké jenengé Zébédéus. Wong loro kuwi lagi ndandani jala ing prau karo bapaké, lan Yésus ngundang* wong loro kuwi.+
22 Wong loro kuwi langsung ninggalké prauné lan bapaké, terus mèlu Yésus.
23 Bar kuwi, Yésus lunga ing kabèh dhaérah ing Galiléa,+ mulang ing sinagogé-sinagogé,*+ martakké kabar apik soal Kerajaané Gusti Allah, lan marèkké kabèh penyakit lan masalah keséhatan.+
24 Kabar soal Yésus akhiré nyebar ing kabèh wilayah Siria. Terus, wong-wong sing sengsara merga macem-macem penyakit,+ sing kesurupan,+ sing ayan,+ lan sing lumpuh digawa marang Yésus. Yésus marèkké kabèh wong kuwi.
25 Mula, ana akèh wong sing mèlu Yésus. Wong-wong kuwi asalé saka Galiléa, Dékapolis,* Yérusalèm, Yudéa, lan saka sabrangé Kali Yordan.
Katrangan Tambahan
^ Utawa ”luwé”.
^ Lit.: ”roti”.
^ Maksudé, Yérusalèm.
^ Utawa ”kudu mènèhi pelayanan suci”.
^ Lit.: ”jalané”.
^ Utawa ”nyeluk”.
^ Utawa ”panggonan-panggonan kanggo ngibadah”.
^ Utawa ”Wilayah Sepuluh Kutha”.
