Kabèh sing wis disinaoni saka Alkitab nganggo buku iki bisa mbantu panjenengan tambah tresna karo Gusti Allah. Katresnan kuwi kudu ditambah terus. (1 Pétrus 2:2) Yèn terus sinau Alkitab lan dadi kancané Gusti Allah, panjenengan bakal urip salawasé.​—Wacanen Yokanan 17:3; Yudas 21.

Yèn tambah akèh sinau bab Gusti Allah, iman panjenengan bisa tambah kuat lan bisa nyenengaké Gusti Allah. (Ibrani 11:1, 6) Iman kuwi mbantu panjenengan mertobat lan nindakaké sing luwih apik.​—Wacanen Para Rasul 3:19.

Panjenengan mesthiné kepéngin ngandhani wong liya bab sing wis disinaoni. Awaké dhéwé seneng yèn bisa crita bab kabar apik iki. Merga terus sinau, panjenengan bisa ngerti carané nggunakaké Alkitab supaya bisa crita karo wong liya yèn panjenengan percaya karo Yéhuwah lan kabar apik iku.​—Wacanen Rum 10:13-15.

Panjenengan bisa crita bab kabar apik iki karo kanca-kanca utawa sedulur-sedulur. Nanging, kudu ati-ati, aja nganti ngèlèk-èlèk agamané wong liya. Crita waé bab pengarep-arep saka Gusti Allah. Sing perlu diéling-éling, wong luwih nggatèkaké tumindak ketimbang omongané awaké dhéwé.​—Wacanen 2 Timotius 2:24, 25.

Yèn terus sinau Alkitab, iman panjenengan bakal tambah kuat. Terus, panjenengan bakal dadi kanca sing cedhak banget karo Yéhuwah. Panjenengan uga bisa mèlu dadi umat lan kulawargané Gusti Allah.​—Wacanen 2 Korinta 6:18.

Yèn terus sinau Alkitab, panjenengan bisa luwih ngerti carané ngetrapaké sing wis disinaoni. (Ibrani 5:13, 14) Mula, Seksi-Seksi Yéhuwah seneng terus mbantu panjenengan sinau Alkitab manèh nganggo buku Apa Wulangané Alkitab kanggo Panjenengan?. Tambah akèh sinau Alkitab, tambah kepénak urip panjenengan.​—Wacanen Jabur 1:1-3; 73:27, 28.

Kabar apik asalé saka Yéhuwah sing Mahamulya. Panjenengan bisa dadi kancané Yéhuwah yèn terus kumpul karo umaté. (Ibrani 10:24, 25) Yèn terus nyenengaké Yéhuwah, panjenengan bakal urip salawasé. Mula, dadi kancané Yéhuwah iku penting banget.​—Wacanen 1 Timotius 1:11; 6:19.