1, 2. Wong-wong péngin ngerti bab apa?

BENCANA tsunami ngrusak désa. Ana wong némbaki wong-wong sing lagi ing gréja, nyebabké akèh wong cilaka lan mati. Ana ibu mati merga kanker, lan ninggalké anak cacahé lima.

² Nèk ana kasusahan utawa kedadéan kaya ngono, akèh wong mikir, ”Kok isa?” Wong-wong péngin ngerti apa sebabé donya iki akèh wong jahat lan kasusahan. Apa panjenengan ya tau mikir kaya ngono?

3, 4. (a) Nabi Habakuk tau takon apa? (b) Piyé Yéhuwah njawab pitakonané Habakuk?

³ Ing Alkitab, wong-wong sing imané kuwat marang Gusti Allah ya tau takon kaya ngono. Contoné, Nabi Habakuk tau takon karo Yéhuwah, ”Punapaa déné Paduka nedahaken piawon dhateng kawula, satemah kawula ningali tindak ambeksiya? Panganiaya saha pangroda-peksa wonten ing ngajenging mripat kawula; paben saha pasulayan ingkang tumuwuh?”​—Habakuk 1:3.

⁴ Ing Habakuk 2:2, 3, Gusti Allah njawab pitakonané Habakuk lan janji arep nggawé kahanané dadi luwih apik. Yéhuwah tresna banget karo manungsa. Alkitab kandha, ”Panjenengané kang ngopèni kowé kabèh.” (1 Pétrus 5:7) Nèk dibandhingké karo awaké dhéwé, Yéhuwah sakjané luwih ora seneng pas ndelok kasusahan. (Yésaya 55:8, 9) Saiki ayo dirembug pitakonan, apa sebabé akèh kasusahan ing donya iki?

5. Apa sing diwulangké guru-guru agama nèk ana kasusahan? Apa sing diwulangké Alkitab?

⁵ Pastur, pendhéta, lan guru agama liyané kerep mulang nèk kasusahan kuwi kersané Gusti Allah. Ana sing kandha nèk kabèh sing dialami manungsa, klebu kasusahan, kuwi wis ditakdirké Gusti Allah lan awaké dhéwé ora isa ngerti alesané. Ana manèh sing kandha nèk ana wong sing mati, klebu bocah cilik, saiki ana ing swarga karo Gusti Allah. Ning, kuwi ora bener. Yéhuwah ora nyebabké kasusahané manungsa. Alkitab kandha, ”Nglengkara [utawa, ora mungkin] yèn Gusti Allah nindakaké piala, utawa yèn Kang Mahakwasa tumindak culika.”​—Ayub 34:10.

6. Apa sebabé wong-wong nyalahké Gusti Allah pas ana kasusahan?

⁶ Akèh wong nyalahké Gusti Allah merga akèh kasusahan ing donya. Wong-wong mikir nèk Gusti Allah sing nguwasani donya. Ning, awaké dhéwé wis sinau ing bab 3 buku iki, nèk sing nguwasani donya sakjané Sétan utawa Iblis.

7, 8. Apa sebabé akèh kasusahan ing donya?

⁷ Alkitab ngandhani awaké dhéwé nèk ”sajagad kabèh kawengku ing pangawak dursila”. (1 Yokanan 5:19) Iblis sing nguwasani donya iki, sipaté kejem lan jahat. Dhèwèké ”nasaraké saisining jagad”. (Wahyu 12:9) Akèh wong niru sipaté Iblis. Kuwi salah siji alesané wong-wong seneng ngapusi, sengit karo liyané, lan tumindak jahat.

⁸ Alesan liyané donya iki kebak kasusahan yaiku, manungsa éntuk warisan dosa saka Adam lan Kawa. Merga nduwé dosa, wong-wong nyebabké wong liya dadi susah. Wong-wong luwih mentingké awaké dhéwé. Dadi, akèh wong padu, perang, lan nindhes wong liya. (Kohèlèt 4:1; 8:9) Kadhang kala, wong ngalami kasusahan merga wektu  lan kedadéan sing ora dinyana-nyana. (Kohèlèt 9:11) Pas wong kuwi ana ing panggonan lan wektu sing salah, dhèwèké isa kena musibah lan masalah liyané.

9. Apa sebabé awaké dhéwé yakin nèk Yéhuwah nduwé alesan sing kuwat kena apa durung nyingkirké kasusahan?

⁹ Yéhuwah ora tau nyebabké kasusahan. Yéhuwah ora isa disalahké nèk ana perang, tumindak jahat, lan panganiaya. Gusti Allah ora nyebabké musibah, contoné lindhu, lésus, lan banjir. Ning, mbokmenawa panjenengan tau mikir, ’Nèk Yéhuwah Mahakuwasa, ngapa kok kasusahan ora dicegah sakdurungé kuwi kedadéan?’ Awaké dhéwé ngerti nèk Yéhuwah bener-bener perduli karo awaké dhéwé, dadi Yéhuwah mesthi nduwé alesan sing kuwat kena apa durung nyingkirké kasusahan.​—1 Yokanan 4:8.

10. Piyé Iblis nantang Yéhuwah?

¹⁰ Iblis ngapusi Adam lan Kawa ing Taman Èden. Iblis ngomong nèk Gusti Allah dudu panguwasa sing apik. Iblis nudhuh nèk Gusti Allah nduwé apa sing apik, ning ora diparingké kanggo Adam lan Kawa. Dadi, Iblis péngin Adam lan Kawa percaya nèk dhèwéké isa dadi panguwasa sing luwih apik ketimbang Yéhuwah, lan manungsa sakjané ora mbutuhké Yéhuwah.–Purwaning Dumadi 3:2-5; deloken Cathetan 27.

11. Pitakonan apa sing kudu awaké dhéwé jawab?

¹¹ Adam lan Kawa mbrontak lan ora manut karo Yéhuwah. Adam lan Kawa rumangsa isa mutuské dhéwé apa sing bener lan sing salah. Piyé Yéhuwah mbuktèkké nèk wong-wong sing mbrontak kuwi salah, lan piyé Yéhuwah nduduhké nèk sakjané Yéhuwah ngerti sing paling apik kanggo awaké dhéwé?

12, 13. (a) Apa sebabé Yéhuwah ora langsung nyingkirké kabèh sing mbrontak? (b) Apa alesané Yéhuwah maringi wektu kanggo Iblis dadi panguwasané donya iki, lan manungsa nggawé pamréntahané dhéwé?

 ¹² Adam lan Kawa ora langsung disingkirké karo Yéhuwah. Ning, dhèwèké tetep urip lan nduwé anak. Banjur, Yéhuwah maringi anak-anaké Adam lan Kawa kesempatan kanggo milih sapa sing dadi panguwasané. Kersané Yéhuwah bèn bumi dienggoni wong-wong sing sampurna, lan kuwi bakal tetep kelakon senajan Iblis ngalang-alangi.​—Purwaning Dumadi 1:28; Yésaya 55:10, 11.

¹³ Iblis nantang Yéhuwah ing ngarepé akèh malaékat. (Ayub 38:7; Dhanièl 7:10) Yéhuwah maringi Iblis wektu kanggo mbuktèkké tudhuhané bener apa ora. Yéhuwah uga maringi manungsa wektu kanggo nggawé pamréntahané dhéwé sing dituntun karo Iblis. Kuwi isa mbuktèkké asilé apik apa ora nèk manungsa urip tanpa tuntunané Gusti Allah.

14. Merga Yéhuwah wis maringi wektu, apa sing dibuktèkké saiki?

¹⁴ Wis éwonan taun manungsa nyoba nggawé pamréntahan dhéwé, ning mesthi gagal. Kuwi mbuktèkké nèk Iblis tukang ngapusi. Manungsa mbutuhké tuntunané Gusti Allah. Bener sing dikandhakké nabi Yérémia, ”Dhuh Sang Yéhuwah, kawula mangretos, bilih manungsa punika boten gadhah pangwaos netepaken marginipun piyambak, lan tiyang ingkang andon lampah boten gadhah pangwaos netepaken jangkahipun.”​—Yérémia 10:23.

15, 16. (a) Apa sebabé Yéhuwah durung nyingkirké kasusahan nganti saiki? (b) Apa sebabé Yéhuwah ora ngrampungké kabèh masalah sing disebabké Iblis?

¹⁵ Apa sebabé Yéhuwah durung nyingkirké kasusahan nganti saiki? Apa sebabé kasusahan ora dicegah  sakdurungé kuwi kedadéan? Merga butuh wektu kanggo mbuktèkké nèk pamréntahan saka Iblis kuwi gagal. Manungsa wis nyoba akèh pamréntahan, ning ora ana sing asilé apik. Senajan saiki ilmu pengetahuan wis maju, ning tetep akèh perang, wong-wong sing ora adil, jahat, lan mlarat. Manungsa ora isa nggawé pamréntahan tanpa tuntunané Gusti Allah.

¹⁶ Ning, nèk Yéhuwah ngrampungké kabèh masalah sing disebabké Iblis, kuwi tegesé Gusti Allah ndhukung pamréntahané Iblis. Ora mungkin Gusti Allah tumindak kaya ngono. Manungsa uga bakal rumangsa isa nggawé pamréntahan dhéwé sing asilé apik. Ning kuwi ora bener, lan Yéhuwah ora bakal ndhukung sing ora bener. Yéhuwah ora tau ngapusi.​—Ibrani 6:18.

17, 18. Apa waé sing bakal Yéhuwah tindakké kanggo ndandani apa waé sing wis dirusak Iblis?

¹⁷ Apa Gusti Allah isa nyingkirké kabèh kasusahan sing disebabké Iblis lan manungsa? Mesthi isa. Kanggoné Gusti Allah, ora ana sing ora isa. Yéhuwah ngerti kapan tudhuhané Iblis isa dijawab kabèh. Bar kuwi, Gusti Allah nggawé bumi dadi pirdus kaya sing dikersakké. Kabèh wong ing ”kubur” bakal diuripké manèh. (Yokanan 5:28, 29) Manungsa ora bakal lara lan mati. Yésus bakal ndandani apa waé sing wis dirusak Iblis. Yéhuwah nggunakké Yésus kanggo ”nglebur panggawéné Iblis”. (1 Yokanan 3:8) Awaké dhéwé ngucap sokur marang Yéhuwah merga nganti saiki isih sabar, mula awaké dhéwé isa kenal lan isa milih Yéhuwah dadi Panguwasa. (Wacanen 2 Pétrus 3:9, 10.) Pas ana masalah, Yéhuwah bakal mbantu awaké dhéwé ngadhepi masalah kuwi.–Yokanan 4:23; wacanen 1 Korinta 10:13.

¹⁸ Wong-wong ora dipeksa milih Yéhuwah dadi panguwasané.  Yéhuwah maringi manungsa kebébasan kanggo milih. Ayo dirembug apa tegesé kuwi kanggo awaké dhéwé.

19. Apa sing diparingké Yéhuwah kanggo awaké dhéwé? Apa sebabé awaké dhéwé kudu ngajèni kuwi?

¹⁹ Yéhuwah maringi manungsa kebébasan kanggo milih, kuwi sing mbédakké manungsa karo kéwan. Kéwan diatur Yéhuwah nganggo naluri, ning awaké dhéwé isa milih arep nggunakké uripé awaké dhéwé kanggo seneng-seneng utawa kanggo ngabdi marang Yéhuwah. (Wulang Bebasan 30:24) Awaké dhéwé uga ora kaya mesin sing wis diatur karo sing nggawé. Awaké dhéwé bébas nemtokké arep dadi kaya apa, sapa sing dadi kancané awaké dhéwé lan arep urip kaya apa. Yéhuwah péngin uripé awaké dhéwé kepénak.

20, 21. Piyé panjenengan saiki isa nggunakké kebébasan kanggo milih?

²⁰ Yéhuwah péngin awaké dhéwé tresna karo Yéhuwah. (Matéus 22:37, 38) Yéhuwah kaya bapak sing seneng nèk anaké ngomong saka ati, ”Aku sayang Bapak”, ora merga dipeksa. Awaké dhéwé bébas arep ngabdi karo Yéhuwah apa ora. Iblis, Adam, lan Kawa milih mbrontak nglawan Yéhuwah. Piyé panjenengan nggunakké kebébasan kanggo milih iki?

²¹ Gunakna kebébasan kanggo milih kuwi kanggo ngabdi marang Yéhuwah. Ana akèh wong sing wis milih dadi abdiné Gusti Allah lan nolak Iblis. (Wulang Bebasan 27:11) Apa sing kudu panjenengan tindakké saiki bèn isa urip ing Pirdus sing ora ana kasusahan? Bab sakbanjuré bakal ngrembug jawaban saka pitakonan iki.