Di kra n tmura yeţqeddimen ɣer zdat, iderɣalen ur ţţafen ara akk lmeḥwiǧat-nsen akken i tent-ţţafen wid yeţɛicin anda nniḍen di ddunit. Tikwal ɛezzlen-ten lɣaci, yerna ur sen-ţţaken ara lemɛawna i ḥwaǧen bac ad xedmen ula d nutni ayen i ḥesben wid i geţwalin d lxedma menwala. Ɣef lemtel, yeţţiwɛiṛ-asen lḥal ad ṛuḥen ɣer ssuq akken a d-qḍun, ad ṭṭfen lkaṛ neɣ ad ṣerrfen idrimen. Ula d leqraya tezmer a sen-tili d ugur: mačči d iderɣalen meṛṛa i gessnen a d-ɣren tira n iderɣalen, ma d wid i gessnen a d-ɣren, yeţţiwɛiṛ-asen lḥal ad afen tiktabin yuran s lluɣa-nsen.

Akteṛ n 100 iseggasen aya i d-ssufuɣen Inagan n Yahwa tizmamin ireṣṣan ɣef Wedlis Iqedsen i iderɣalen. Mačči aṭas aya, ceggɛen dduzan n weḍbaɛ akk-d welsaq si Huland ɣer Malawi bac a d-xedmen tizmamin s tčičiwaţ, yiwet n tutlayt i heddṛen di tmurt-agi.

Leo, i gqeddcen di lbiru aɣelnaw n Inagan n Yahwa n Brizil yesɛa tamusni deg usufeɣ n tezmamin s tira n iderɣalen. Iṛuḥ ɣer Malawi bac ad iɛiwen yiwet n terbaɛt n xemsa iɛeggalen ad ḥefḍen amek ara ssexdmen dduzan i sen-d-iţţunefken akk-d useɣẓan is i kettben tira n iderɣalen i d-snulfan Inagan. Bac ad yekteb useɣẓan-agi s tira n iderɣalen n tčičiwaţ, ilaq ad sserkben (ad ssekcmen di luṛdinatur) yiwen useɣẓan nniḍen ideg i llan leḥṛuf n tčičiwaţ akk-d leḥṛuf n tira n iderɣalen. Aseɣẓan-agi yeţţarra aḍris ɣer tira n iderɣalen yerna yeţwenniɛ tazmamt bac aţ-ţishil i leqraya. Wali d acu i d-nnan kra n imezdaɣ n Malawi ɣef tezmamin-agi i d-yeffɣen s tira n iderɣalen.

Munyaradzi d yiwet n tlemẓit taderɣalt i gxeddmen cwiṭ n lweqt kan, tesɛedday-ed di ṛṛadyu yiwet n nnuba yellan d ayla-s. Tesɛedday daɣen 70 sswayeɛ yal ccheṛ deg uselmed n Wedlis Iqedsen. Atan d acu i d-tenna: “Uqbel, llant ţţawḍent-iyi-d tezmamin n tira n iderɣalen s teglizit. Meɛna iɛǧeb-iyi mliḥ lḥal asmi i yi-d-wwḍent s lluɣa-inu. Ad cekkṛeɣ irfiqen-iw Inagan ɣef wayen akk i ṣerrfen d lmeǧhudat i xedmen bac a ɣ-d-ssufɣen tizmamin s tira n iderɣalen s lluɣa-nneɣ. Ayagi yeţbeggin-ed belli ur neţwaţţu ara yerna teţţunefk-aɣ lqima.”

Francis d yiwen Inigi aderɣal n tama ufella n Malawi. Uqbel, yella yeţṛaǧu wiyaḍ a s-d-ɣren. Asmi i s-wwḍent tezmamin s tira n iderɣalen n tčičiwaţ, yenna-d s lfeṛḥ: “A s-tiniḍ la ţţarguɣ. D ayen yetɛeddan!”

Loyce, ţ-ţaderɣalt daɣen, teţberriḥ lweqt kamel. Tɛawen 52 yemdanen ad wennɛen tudert-nsen. Amek? Tessexdam tizmamin s tira n iderɣalen bac aţ-ţesselmed yis-sent Adlis Iqedsen; ma d inelmaden-is ssexdamen tizmamin i d-iḍebɛen ɣef lkaɣeḍ. Tizmamin-agi meṛṛa d Inagan n Yahwa i tent-id-yessufɣen.

Leo, win akken yesseḥfaḍen i d-yusan si Brizil iɣef i d-nehdeṛ sgellin, yenna-d: “Yeţţeɛǧab-aɣ mliḥ lḥal, m’ara nefk i uderɣal tazmamt ireṣṣan ɣef Wedlis Iqedsen s tira n iderɣalen w’a nẓer acu ara iḥuss m’ara d-yerr s lexbaṛ belli teţwaxdem s lluɣa-ines. Aṭas i d-innan belli rran tajmilt i Yahwa yerna feṛḥen imi zemren ad ssewǧden iman-nsen weḥḥed-sen i uberreḥ akk-d inejmuɛen. Dayen, ur ḥwaǧen ara win ara sen-d-iɣren. Tura, win yeqqaren Adlis Iqedsen weḥd-es, yeqqar-it s ṣṣeḥ weḥd-es. Zemren daɣen ad ɛiwnen ula ţ-ţiwaculin-nsen ad iǧhident di leḥwayeǧ n ṛṛuḥ. S tezmamin-agi, ţqerriben ɣer Yahwa.”