Odval teţɛic di Mungulya. Ur teẓri ara swaswa acḥal di leɛmeṛ-is, meɛna tcukk belli tlul di 1921. Asmi meẓẓiyet tella tkess lmal n imawlan-is, daymi i teɣra di llakul yiwen useggas kan. Ur tessaweḍ ara aţ-ţissin aţ-ţɣer. Lameɛna, drus n lweqt aya, tɛawen-iţ yiwet n treẓẓit yeččuṛen d ţţewṣifat bac aţ-ţissin Ṛebbi w’aţ-ţẓer belli llant waṭas n leḥwayeǧ yelhan i geţṛaǧun ɣer zdat wid i s-yeţḥessisen. Annect-a iɛǧeb-as ayendin.

Inagan n Yahwa ssufɣen-d tareẓẓit-agi di 2011. Llan seg-s sin n leṣnaf. Yiwet tella deg-s cwiṭ n lektiba ɣef tayeḍ, lameɛna sɛant i snat ţţewṣifat icebḥen.

Tareẓẓit-nni yesɛan akteṛ n lektiba, yeɛni Ḥess i Ṛebbi—Aţ-ţɛiceḍ i lebda, ur teţɛeṭṭil ara a d-teffeɣ s 583 tutlayin; ma ţ-ţinna nniḍen, Ḥess i Ṛebbi, a d-teffeɣ s 483 tutlayin. (Ɣef lemtel, di ṭuber 2013, Tiṣerriḥt tagraɣlant izerfan n wemdan i teqbel Tuddsa n Leǧnas Yeddukklen teţwaṭerjem ɣer 413 tutlayin) Ar ass-a, azal n 80 imelyunen i d-yeţwaḍebɛen si snat treẓẓiyin-agi.

Di Brizil, yiwet tmeṭṭut yeddan di leɛmeṛ i gqeblen s lfeṛḥ tareẓẓit Ḥess i Ṛebbi tenna-d: “D ayen yessefṛaḥen m’ara nẓer belli llan wid yeţxemmimen ɣef lɛibad ur nessin ara ad ɣren, am nekk. Leɛmeṛ qbileɣ tisɣunin-nwen axaṭer ur ssineɣ ara ad ɣreɣ. Lameɛna, tareẓẓit-agi, bɣiɣ-ţ.”

Brigitte, yiwet tmeṭṭut ur neɣri ara, i geţɛicin di Fṛansa, tenna-d: “Ţmuquleɣ yal ass ţţeswiṛat yellan di treẓẓit-agi.”

Di Tefriqt n Wadda, yura-d yiwen Inigi: “Ulac tareẓẓit i ţ-icban i nezmer a nessexdem bac a nehdeṛ ɣef tideţ n Wedlis Iqedsen i Icinwaten. Hedṛeɣ d yal ṣṣenf n yemdanen: wid i d-yufraren, am wid yeɣran di tesdawiyin, neɣ wid yessnen cwiṭ kan ad ɣren. Tareẓẓit Ḥess i Ṛebbi—Aţ-ţɛiceḍ i lebda teţɛawan-iyi akken a sen-werriɣ bihfih kra n leḥwayeǧ yellan d lsas n wayen yesselmad Wedlis Iqedsen. Qqareɣ-asen ayen akk ilaqen deg wezgen n ssaɛa.”

Di Lalman, sin Inagan sselmaden Adlis Iqedsen i sin imezwaǧen yeɣran. Tareẓẓit-agi teɛǧeb-as mliḥ i wergaz-nni, dɣa yenna-yasen: “Iwacu yeɛni ur iyi-ţ-id-tefkim ara uqbel? Teţɛawan-iyi ad fehmeɣ ayen yesselmad Wedlis Iqedsen akk-d tedyanin iɣef i d-iheddeṛ.”

Di Usṭralya, yiwet tmeṭṭut ţ-ţaɛeẓẓugt tenna-d: “Ɛaceɣ aṭas n iseggasen akk-d tulawin i gzedɣen yerna qeddcent deg yiwen n lǧameɛ n imasiḥiyen. Ulac amkan akk ideg ara ssiwḍeɣ ad qerrbeɣ ɣer lḥekkam n ddin am wagi. Ɣas akken, leɛmeṛ iyi-sselmden d acu-ţ Tgelda n Ṛebbi. Ţţeswiṛat yellan di treẓẓit-agi ɛawnent-iyi ad fehmeɣ acu i gebɣa a d-yini s ṣṣeḥ Matta 6:10.”

Yura-d lbiru n Inagan n Yahwa n Kanada ayagi: “Xilla n lɣaci n Syeṛṛa Liyun i geţɛicen dagi, mi walan tareẓẓit Ḥess i Ṛebbi s tkriyuţ, idemmer-iten wul-nsen a d-inin: ‘Inagan n Yahwa ţţaken s ṣṣeḥ leɛtab i yiman-nsen iwakken ad mlen ayen yesselmad Wedlis Iqedsen i medden.’ Kra nnan-d daɣen: ‘Kenwi, temxallafem ɣef waṭas n lɛibad axaṭer teţxemmimem s ṣṣeḥ ɣef medden.’”