Di ɣuct 2013, Inagan n Yahwa fukken lebni n Tzeqqa n Tgelda tis 1 000; Tazeqqa n Tgelda d isem n wemkan-nsen n leɛbada. Tazeqqa-yagi bnan-ţ di tmurt n Filibin, xedmen-ţ ɛlaḥsab n yiwen n ṣṣenf n lebni ur nesɛi ara timitelt. Iɛeggalen n tjemmuyaɛ n tmurt n Filibin cuban ɣer wid n waṭas n tmura, xilla deg-sen ur sɛin la idrimen la lḥirfa bac ad bnun Tazeqqa n Tgelda iǧehden mebla ma nudan-d si beṛṛa wid ara ten-iɛiwnen. Kra n tjemmuyaɛ n Inagan, acḥal d aseggas nutenti xeddment inejmuɛen-nsent deg yexxamen neɣ di tzeɣwa timecṭaḥ yebnan s uɣanim.

Imi simmal irennu leḥsab n Inagan n Yahwa ama di Filibin ama deg waṭas n tmura nniḍen, simmal ţlaqent akteṛ n Tzeɣwa n Tgelda. Ɣef ddemma n wannect-a, Asqamu amwellah ihegga-d di 1999, yiwen wahil n lebni i tmura yellan di lexṣaṣ. Inagan yellan di yal yiwet si tmura-yagi rennun-d sɣur-sen ayen umi i zemren bac ad bnun Tazeqqa n Tgelda i yiman-nsen, yerna sfaydayen deg wahil-agi n lebni, si tukciwin n yerfiqen-nsen di ddin n tmura nniḍen. Xilla n iwaziwen yessnen ad bnun ţheggin-d iman-nsen ţ-ţirebbaɛ bac ad ɛiwnen iɛeggalen n kra n tjemmuyaɛ n tmura-yagi akken ad bnun i yiman-nsen Tazeqqa n Tgelda. Di tmurt n Filibin, ahil-agi agraɣlan n lebni yebda di wambeṛ 2001.

Iluminado d yiwen uɛeggal n tejmaɛt n Marilaw (di lǧiha n Bulakan), anda i tebna Tzeqqa n Tgelda tis alef. Yenna-d: “Tban-ed tegmaţ taḥeqqanit ger wid ixeddmen ccɣel-agi. Llan waṭas n iwaziwen: irgazen, tilawin, ilmeẓyen akk-d imeqranen. Nella nxeddem meṛṛa jmiɛ i yiṭij yerɣan. Kul m’ara ifakk wass n lxedma nɛeggu, meɛna nfeṛṛeḥ m’ara nẓer ayen i nessaweḍ a t-nexdem lwaḥid.”

Kra n lɛibad ur nelli ara d Inagan n Yahwa tɛeǧǧben deg wayen akk i xedmen iwaziwen. Yiwen wemdan ixeddmen s ukamyun i d-yessawḍen ṛṛmel d wegric ɣer wemkan-nni n lebni yenna-d: “Tgam s ṣṣeḥ am tweḍfin, acḥal yid-wen i tellam! Yerna yal yiwen seg-wen yeţţak-ed afus n lemɛawna. Leɛmeṛ ẓriɣ ayagi!”

Iwaziwen-agi bnan tazeqqa di seţţa smanat, segmi i bdan ssalayen leḥyuḍ armi tfukk. Imi i ţ-bnan di cwiṭ n lweqt, ayagi yefka tagniţ i tjemmuyaɛ a d-lhint akken ilaq d ccɣel yesɛan azal akteṛ, yeɛni aberreḥ n lexbaṛ n lxiṛ n Tgelda.—Matta 24:14.

Ellen, yiwet seg iɛeggalen n tejmaɛt n Marilaw tenna-d daɣen: “Xuṣṣen imukan di Tzeqqa n Tgelda i nesɛa zik; xilla i gellan ţɣaman di beṛṛa. Tazeqqa-nneɣ tajdiṭ n Tgelda tecbeḥ, yerna iɛǧeb-aɣ lḥal akteṛ deg-s. Akken ma nella nezmer a nesfaydi akteṛ seg wayen i d-nlemmed akk-d lewṣayat i ɣ-d-iţţunefkayen deg inejmuɛen-nneɣ.”