Xaṭi. Inagan n Yahwa d imasiḥiyen i geţţamnen s wayen yellan di Tira Iqedsen. Kra n ddyanat sselmadent belli tuɣalin n Iyahudiyen ɣer Falaṣṭin tcudd ɣer licaṛat n Tira Iqedsen. Inagan n Yahwa ur ţţamnen ara s wayagi. Ur ţţamnen ara belli Tira Iqedsen carent-ed ɣef tedyant-agi icudden ɣer tsertit. Di tin n ṣṣeḥ, Tira Iqedsen ur ddint ula d yiwet n lḥukuma yerna ur ţţarrant ula d yiwen n wegdud sennig n wayeḍ. Lbeṛǧ n Tɛessast, tasɣunt i d-ssufuɣen Inagan n Yahwa, tenna-d ɛinani belli ulac di Tira Iqedsen ayen i geddan si lǧiha n tṣehyunit.

 Amawal Le Grand Robert yessefhem-ed isem-agi Taṣehyunit akk-a: “D amussu n tsertit akk-d ddin ara yesbedden w’ad ireṣṣi Lḥukuma tayahudit (yeɛni Ṣiyun Tajdiṭ) di Falaṣṭin”. Yewwi-d aẓar si ddin akk-d tsertit. Inagan n Yahwa ur ţḥaraben ara ɣef tṣehyunit ama deg wayen yeɛnan ddin ama deg wayen yeɛnan tasertit.

 Tuddsa n Inagan n Yahwa teɛna kan ddin, ur teţɛawan ula d yiwen n umussu n tsertit. Ur tţeddu ara ihi si lǧiha n tṣehyunit. Inagan n Yahwa ţwassnen mliḥ belli xḍan i tsertit. Di kra n tmura, ţwaqehren mačči d kra imi qesden ad xḍun i tsertit. Inagan ţţuqennɛen belli ḥaca Tagelda n igenwan n Ṛebbi ara d-yawin lehna i lebda ɣef lqaɛa. Ɛlaḥsab-nsen, ulac amussu n tsertit neɣ lḥukuma n lɛibad i gzemren a d-awin lehna-yagi.

 Inagan n Yahwa ţqadaren leqwanen i d-texdem lḥukuma n tmurt ideg i zedɣen, akken tebɣu tili tmurt-nni. Ur ţxaṣamen ula d yiwet n lḥukuma yerna ur ţcaraken ula deg yiwen n ṭṭrad s leslaḥ.