1. Ayɣer i geḍleb ad yeţwaɣḍeṣ yiwen lewkil n tgelda n Ityubya?

 “ATNAN waman. D acu ara y-​iqeḍɛen ur ţwaɣḍaṣeɣ ara?” Asteqsi-​yagi, yefka-​t-​id di lqern amezwaru yiwen lewkil n tgelda n tmurt n Ityubya (Kuc). Imiren kan i s-​d-​ibeyyen yiwen umasiḥi, umi qqaren Filibus, belli Ɛisa d Lmasiḥ-​nni i gewɛed Ṛebbi a d-​yas. Ayen akka i d-​yelmed lewkil-​agi  si Tira Iqedsen, ikcem-​as qbala ɣer wul, dɣa ibeggen-​ed belli yebɣa ad iţwaɣḍeṣ.—Lecɣal 8:26-36.

2. Iwacu i glaq aţ-​ţxemmeḍ mliḥ i weɣḍaṣ?

² Ma yella tessenqdeḍ akken ilaq ixfawen iɛeddan n tektabt-​agi akk-​d Inigi n Yahwa, tḥusseḍ ahat belli tweǧdeḍ bac a d-​tiniḍ: ‘D acu ara y-​iqeḍɛen, i nekk, ur ţwaɣḍaṣeɣ ara?’ Tura, tɛelmeḍ belli Adlis Iqedsen iwɛed-​aɣ tamɛict i dima di Lǧennet. (Luqa 23:43; Aweḥḥi 21:3, 4) Tufiḍ daɣen belli wid yemmuten ur d-​ţţarran s lexbaṛ s wacemma, yerna yella usirem n ḥeggu n lmeggtin. (Amusnaw 9:5; Yuḥenna 5:28, 29) Izmer lḥal teţɛacaṛeḍ Inagan n Yahwa deg inejmuɛen-​nsen; teẓriḍ s wallen-​ik amek i xeddmen ddin n ṣṣeḥ. (Yuḥenna 13:35) Uyerna, tebdiḍ ahat tseɛɛuḍ lɛalaqa kečč d Yahwa Ṛebbi.

3. a) Acu i gumeṛ Ɛisa i inelmaden-​is? b) Amek i sseɣḍaṣen imasiḥiyen?

³ Amek i tzemreḍ a d-​tessekneḍ belli tebɣiḍ aţ-​ţqedceḍ ɣef Ṛebbi? Ɛisa yenna i imasiḥiyen: “Ṛuḥet, rret leǧnas meṛṛa d inelmaden; sɣeḍṣet-​ţen.” (Matta 28:19) Neţţa s timmad-​is yeǧǧa-​d lemtel imi i geţwaɣḍeṣ deg waman. Mačči d aṛuccu i t-​ṛuccen s cwiṭ n waman yerna ur s-​ten-​smaren ara kan ɣef uqerru. (Matta 3:16) Awal-​agi “ɣḍeṣ” iţwaṭerjem-​ed seg yiwen umeslay n tyunanit; lmeɛna-​s “bbeɣ deg waman”. Atan wamek yeţwaxdam ihi weɣḍaṣ amasiḥi: ad iţwabbeɣ walbeɛḍ, yeɛni a t-​ssekcmen s lekmal-​is, deg waman.

4. Acu ara d-​tbeggneḍ m’ara teţwaɣeḍṣeḍ deg waman?

⁴ Wigad meṛṛa yebɣan ad sɛun lɛalaqat akk-​d Yahwa Ṛebbi, ilzem fell-​asen ad ţwaɣeḍṣen. M’ara teţwaɣeḍṣeḍ, a d-​tbeggneḍ zdat n lɣaci belli tebɣiḍ aţ-​ţqedceḍ ɣef Ṛebbi. A d-​tbeggneḍ daɣen belli tḥemmleḍ aţ-​ţxedmeḍ lebɣi-​s. (Ahellil 40:8, 9) Acu kan, bac aţ-​ţeţwaɣeḍṣeḍ, llant kra n leḥwayeǧ i geţţucerḍen seg-​k.

5. a) D acu-​ţ lḥaǧa tamezwarut i k-​d-​iţţucerḍen iwakken aţ-​ţeţwaɣeḍṣeḍ? b) Acimi i sɛan lqima tameqrant inejmuɛen imasiḥiyen?

⁵ Tebdiḍ txeddmeḍ yakan lḥaǧa tamezwarut i k-​d-​iţţucerḍen. Ayɣer i nezmer a d-​nini akka? Axaṭer teţnadiḍ aţ-​ţissineḍ Yahwa Ṛebbi akk-​d Ɛisa Lmasiḥ. Ad yili txeddmeḍ ayagi s tɣuri n Wedlis Iqedsen akk-​d Inagan n Yahwa. (Ɣer-​ed Yuḥenna 17:3.) Lameɛna, ur tessineḍ ara kullec. Imasiḥiyen bɣan ad ‘ččaṛen ţ-​ţamusni n lebɣi n Ṛebbi.’ (Ikulusiyen 1:9) Bac aţ-​ţessiwḍeḍ ɣer waya, iwulem aţ-​ţḥeddṛeḍ i inejmuɛen n Inagan n Yahwa. D ayen yesɛan lqima tameqrant. (Iɛebṛaniyen 10:24, 25) Ma tezgiḍ teţṛuḥuḍ ɣer inejmuɛen-​a, aţ-​ţissineḍ akteṛ Ṛebbi.

6. Acu i glaq aţ-​ţissineḍ seg Wedlis Iqedsen bac aţ-​ţeţwaɣeḍṣeḍ?

⁶ Iwakken aţ-​ţeţwaɣeḍṣeḍ, ur iţţuḥettem ara fell-​ak aţ-​ţissineḍ ayen akk yellan deg Wedlis Iqedsen, wagi d ayen ibanen. Lewkil-​nni n tgelda n Ityubya yella yekseb cwiyya n tmusni, meɛna yeḥwaǧ lemɛawna akken ad yefhem kra n yeḥricen si Tira Iqedsen. (Lecɣal 8:30, 31) Ula d kečč, geddac n leḥwayeǧ i k-​d-​mazal aţ-​ţlemdeḍ. Di tin n ṣṣeḥ, aţ-​ţeţţissineḍ dima leḥwayeǧ ɣef Ṛebbi. (Amusnaw 3:11) Acu kan, uqbel aţ-​ţeţwaɣeḍṣeḍ, ilaq aţ-​ţissineḍ w’aţ-​ţqebleḍ ayen yellan d lsas n uselmed n Wedlis Iqedsen. (Iɛebṛaniyen 5:12) Ɣef lemtel, deg uselmed-​agi, tella tideţ yeɛnan wid yemmuten, tella daɣen lqima i gesɛa yisem n Ṛebbi ţ-​ţgelda-​s.

7. Ɣer wacu i glaq a k-​tdemmer tɣuri n Wedlis Iqedsen?

⁷ Lameɛna, tamusni-​yagi kan weḥd-​es drus, axaṭer “mebla liman, d lmuḥal ad iɛǧeb yiwen i Yillu.” (Iɛebṛaniyen 11:6) Adlis Iqedsen iḥekku-​d belli, asmi i slan kra n imezdaɣ n temdint n Kurintus i lexbaṛ i ţbecciṛen inelmaden n Ɛisa, “umnen dɣa ţwaɣeḍṣen.” (Lecɣal 18:8) Lukan d lebɣi, taɣuri n Wedlis Iqedsen ilaq a k-​d-​tefk ula i kečč liman belli Adlis Iqedsen d Awal i d-​iweḥḥa Ṛebbi.  Taɣuri-​yagi a k-​tɛiwen aţ-​ţamneḍ s lewɛud n Ṛebbi w’aţ-​ţamneḍ daɣen belli asfel n Ɛisa yeţsellik.—Yacuɛa 23:14; Lecɣal 4:12; 2 Timutawus 3:16, 17.

8. Acu ara k-​idemmren aţ-​ţhedṛeḍ ɣef wayen i tlemdeḍ i wid i k-​d-​yezzin?

⁸ Asm’ara yiǧhid liman deg wul-​ik, a k-​yiwɛiṛ aţ-​ţjemɛeḍ i yiman-​ik kan ayen i tlemdeḍ. (Irmiya 20:9) Aţ-​ţebɣuḍ s ṣṣeḥ aţ-​ţhedṛeḍ ɣef Ṛebbi akk-​d lmeqsud-​is i wid i k-​d-​yezzin.—Ɣer-​ed 2 Ikurintiyen 4:13.

9, 10. a) Di tazwara, i menhu i tzemreḍ aţ-​ţhedṛeḍ ɣef tideţ n Wedlis Iqedsen? b) Acu i glaqen a t-​txedmeḍ ma tebɣiḍ aţ-​ţcerkeḍ deg uberreḥ n Inagan n Yahwa?

⁹ Di tazwara, tzemreḍ aţ-​ţhedṛeḍ ɣef tideţ n Wedlis Iqedsen i iɛeggalen n twacult-​ik, i leḥbab-​ik, i lǧiran-​ik d wid ixeddmen yid-​ek. Hdeṛ-​asen s yiles aẓidan. Ɣer zdat, a k-​yili deg wul akken aţ-​ţcerkeḍ deg uberreḥ n Inagan n Yahwa. Ur ţkukru ara, xebbeṛ win i k-​isselmaden Adlis Iqedsen. Ma yella tessawḍeḍ ɣer wayen i geţţucerḍen seg-​k bac aţ-​ţcerkeḍ di leqdic n uberreḥ, ad iţwaxdem wayen ilaqen iwakken kečč akk-​d win i k-​isselmaden aţ-​ţemlilem d sin lecyux n tejmaɛt.

¹⁰ Ayagi a k-​yefk tagniţ akken aţ-​ţissineḍ akteṛ lecyux, i gkessen taqeḍɛit n Ṛebbi. (Lecɣal 20:28; 1 Buṭrus 5:2, 3) Ma walan belli tfehmeḍ yerna teţţamneḍ s leḥwayeǧ yellan d lsas n uselmed n Wedlis Iqedsen, belli teṭṭebbiqeḍ imenzayen n Ṛebbi, uyerna tebɣiḍ s ṣṣeḥ aţ-​ţeqqleḍ d Inigi n Yahwa, lecyux-​agi a k-​id-​xebbṛen belli tessawḍeḍ ɣer wayen i geţţucerḍen seg-​k bac aţ-​ţţekkiḍ di leqdic n uberreḥ. A k-​d-​inin belli tuɣaleḍ d aberraḥ ur neţwaɣḍeṣ n lexbaṛ n lxiṛ.

11. Acu n leḥwayeǧ i glaq ad beddlen kra uqbel ad cerken di leqdic n uberreḥ?

¹¹ Acu kan, uqbel aţ-​ţebduḍ leqdic n uberreḥ, ilaq-​ak  ahat aţ-​ţbeddleḍ kra n leḥwayeǧ i txeddmeḍ di temɛict-​ik neɣ i tesɛiḍ d lɛadda. Izmer lḥal, a k-​ilaq aţ-​ţeǧǧeḍ kra n lefɛayel i telliḍ txeddmeḍ s tuffra. Uqbel aţ-​ţḍelbeḍ akken aţ-​ţuɣaleḍ d aberraḥ, yelzem fell-​ak aţ-​ţexḍuḍ maḍi i ddnubat imeqranen, am lɛaṛ, ssekṛan akk-​d lkif.—Ɣer-​ed 1 Ikurintiyen 6:9, 10; Igalatiyen 5:19-21.

12. Ayɣer i gwulem aţ-​ţtubeḍ?

¹² Llan daɣen ccuruṭ i gelzem ad iṭebbeq walbeɛḍ uqbel ad yeţwaɣḍeṣ. Amceggeɛ Buṭrus yenna-​d: “Tubet [...], uɣalet-​ed, ad ţwamḥun ddnubat-​nwen.” (Lecɣal 3:19) Win ituben, d win inedmen seg wul ɣef lḥaǧa i gexdem. Yessefk ad isteɛṛef walbeɛḍ belli ilaq ad itub ma yella yesɛa yir tikli di tudert-​is. Lameɛna, ayagi iwulem ula i win i gesɛan tikli yelhan. Acimi? Axaṭer imdanen akken ma llan d imednuben yerna ḥwaǧen a sen-​isemmeḥ Ṛebbi. (Iṛumaniyen 3:23; 5:12) Uqbel aţ-​ţeɣreḍ Adlis Iqedsen, ur telliḍ ara tessneḍ lebɣi n Ṛebbi. Ihi, mebla tamusni-​yagi, ur nezmir ara a d-​nini belli telliḍ teţɛiceḍ ɛlaḥsab n lebɣi-​yagi kamel. Ɣef wayagi i k-​iwulem aţ-​ţtubeḍ.

13. Acu i d abeddel?

¹³ Mbeɛd mi ttubeḍ, ilaq-​ak a ‘d-​tuɣaleḍ’, yeɛni aţ-​ţbeddleḍ. Mačči d nndama kan ara tnedmeḍ. Ilaq-​ak daɣen aţ-​ţexḍuḍ i tikli i tesɛiḍ zik w’aţ-​ţqesdeḍ, si tura d asawen, aţ-​ţxeddmeḍ ayen yellan d lewqam. Ţţuba akk-​d ubeddel, d ccuruṭ i glezmen uqbel aţ-​ţeţwaɣeḍṣeḍ.

14. D acu-​ţ lḥaǧa yesɛan azal ameqran i geţţucerḍen seg-​k uqbel aţ-​ţeţwaɣeḍṣeḍ?

¹⁴ Tella lḥaǧa nniḍen yesɛan azal ameqran i geţţucerḍen seg-​k uqbel aţ-​ţeţwaɣeḍṣeḍ. Ilaq-​ak aţ-​ţbuddeḍ taṛwiḥt-​ik i Yahwa Ṛebbi.

15, 16. Acu i d lmeɛna n ubuddu n teṛwiḥt i Ṛebbi? Acu ara idemmren albeɛḍ ad ibudd iman-​is i Ṛebbi?

 ¹⁵ Ass ideg ara tbuddeḍ taṛwiḥt-​ik i Yahwa Ṛebbi s yiwet n tẓallit, ara s-​tiniḍ s leḥṛaṛa, a s-​tweɛdeḍ belli d neţţa kan ideg ara teṭṭfeḍ i lebda. (Asmekti 6:15) Meɛna d acu ara k-​idemmren aţ-​ţxedmeḍ lweɛd-​agi? A d-​nefk lemtel: xemmem ɣer yiwen iwumi teɛǧeb teqcict. Skud yeţţissin-​iţ yerna yeţwali ṣṣifat-​is, skud teţţeɛǧab-​as akteṛ. M’ara iɛeddi kra n lweqt ad iḥuss ahat belli d lawan a ţ-​id-​yexḍeb. D ṣṣeḥ, tamɛict n wid izewǧen teṭṭalab-​ed akteṛ n lmeǧhud, lameɛna, leḥmala aţ-​ţdemmer argaz-​agi ad yezweǧ yid-​es.

¹⁶ M’ara tissineḍ Yahwa yerna tḥemmleḍ-​t, aţ-​ţḥusseḍ amzun yella wayen i k-​iţdemmiren akken a t-​tɛebdeḍ w’aţ-​ţqedceḍ fell-​as mebla cceḥḥa. Kra n win yebɣan ad yetbeɛ Ɛisa Lmasiḥ, Mmi-​s n Ṛebbi, ilaq-​as “ad inkeṛ iman-​is.” (Marqus 8:34) Win inekṛen iman-​is d win ixeddmen lmeǧhud bac ur yeţţaǧǧa ara ccehwat-​is akk-​d lmeqsud-​is a s-​ḥeṛṛmen ad yaɣ awal akken ilaq i Ṛebbi. Ihi, uqbel aţ-​ţeţwaɣeḍṣeḍ, ilzem fell-​ak aţ-​ţesɛuḍ leqsed-​agi d amenzu di tudert-​ik: aţ-​ţxeddmeḍ lebɣi n Yahwa Ṛebbi.—Ɣer-​ed 1 Buṭrus 4:2.

17. Acuɣer i ţkukrun kra ad budden tiṛwiḥin-​nsen i Ṛebbi?

¹⁷ Kra ţkukrun ad budden tiṛwiḥin-​nsen i Yahwa axaṭer ugaden ad ṭṭfen leqrar ameqran yecban wagi. Ţţagaden a ten-​iḥaseb Ṛebbi. Imi ugaden ad ccḍen neɣ ad sneɣnin (sseḥznen) Yahwa, qqaren-​as: ‘Axiṛ kan ur s-​neţbuddu ara tiṛwiḥin-​nneɣ.’

18. D acu ara k-​d-​yefken lebɣi akken aţ-​ţbuddeḍ taṛwiḥt-​ik i Yahwa?

¹⁸ M’ara teţnadiḍ aţ-​ţḥemmleḍ Yahwa, aţ-​ţebɣuḍ a s-​tbuddeḍ taṛwiḥt-​ik yerna aţ-​ţxedmeḍ ayen akk ilaqen bac aţ-​ţɛiceḍ ɛlaḥsab n lweɛd-​agi. (Amusnaw 5:4) Ma ifat tbuddeḍ-​as iman-​ik, bla ccekk, aţ-​ţebɣuḍ “[aţ-​ţleḥḥuḍ] s tikli yebɣa Sidi Ṛebbi iwakken a [s-​tɛeǧbeḍ] di kullec.”  (Ikulusiyen 1:10, Awal n tudert) Imi tḥemmleḍ Ṛebbi, ur teţḥussuḍ ara belli yewɛeṛ mliḥ aţ-​ţxedmeḍ lebɣi-​s. Aţ-​ţeţxemmimeḍ ahat am wemceggeɛ Yuḥenna, i d-​yennan: “Leḥmala n Yillu, d aḥraz n lumuṛ-​is, yerna lumuṛ-​is ur ẓẓayit ara.”—1 Yuḥenna 5:3.

19. Iwacu ur ilaq ara aţ-​ţagadeḍ aţ-​ţbuddeḍ taṛwiḥt-​ik i Ṛebbi?

¹⁹ Ur teḥwaǧeḍ ara aţ-​ţiliḍ tkemleḍ bac aţ-​ţbuddeḍ taṛwiḥt-​ik i Ṛebbi. Yahwa yeẓra belli tesɛiḍ lexṣaṣ yerna d lmuḥal a k-​d-​iḍleb nnig n wayen umi tzemreḍ. (Ahellil 103:14) Yebɣa aţ-​ţessiwḍeḍ ɣer wannect-​a yerna a k-​iɛiwen. (Ɣer-​ed Icɛaya 41:10.) Ɣas tḥeqqeq belli ma tţekleḍ fell-​as seg wul-​ik meṛṛa, “neţţa ad issemsawi iberdan-​ik.”—Lemtul 3:5, 6.

20. Ma ibudd yiwen taṛwiḥt-​is i Yahwa, ayɣer i glaq a t-​id-​isbeggen?

²⁰ Xemmem ɣef wayen akka i d-​neɣra. Annect-​a a k-​iɛiwen ahat aţ-​ţbuddeḍ taṛwiḥt-​ik i Yahwa s tẓallit. Ilaq i yal amdan i gḥemmlen s ṣṣeḥ Ṛebbi a d-​ifk zdat n lɣaci ‘cchada ara t-​yawin ɣer leslak.’ (Iṛumaniyen 10:10) I kečč, amek ara d-​tefkeḍ cchada-​yagi?

21, 22. Amek i tzemreḍ a d-​tefkeḍ cchada ɣef liman-​ik zdat n lɣaci?

 ²¹ Xebbeṛ yiwen si lecyux n tejmaɛt-​ik belli tebɣiḍ aţ-​ţeţwaɣeḍṣeḍ. Neţţa ad ixdem ţţawil iwakken kra n lecyux ad ssenqden yid-​ek kra n yesteqsiyen yellan d lsas n wayen yesselmad Wedlis Iqedsen. Ma yella lecyux-​agi walan belli txeddmeḍ ayen i d-​iţţucerḍen, a k-​d-​inin belli tzemreḍ aţ-​ţeţwaɣeḍṣeḍ. a Kul m’ara d-​iḥdeṛ weɣḍaṣ, teţţili yiwet n lxeṭba i d-​ismektayen lmeɛna-​s. Win ara ţ-​id-​ifken ad iḍleb i wigad i d-​iheggan iman-​nsen i weɣḍaṣ a d-​rren leǧwab ɣef sin yesteqsiyen isehlen. S wannect-​a a d-​fken zdat n lɣaci cchada ɣef liman-​nsen.

²² D aɣḍaṣ ara d-​isseknen zdat n lɣaci belli tbuddeḍ taṛwiḥt-​ik i Ṛebbi yerna tuɣaleḍ ssyin d asawen d Inigi n Yahwa. Wid i d-​iheggan iman-​nsen i weɣḍaṣ ssekcamen-​ten s lekmal-​nsen deg waman iwakken a d-​beggnen zdat n lɣaci belli budden tiṛwiḥin-​nsen i Ṛebbi.

23. Acu i d lmeɛna-​s ad iţwaɣḍeṣ walbeɛḍ ‘s yisem n Ubabat, n Umemmit akk-​d ṛṛuḥ iqedsen’?

²³ Ɛisa yenna-​d belli inelmaden-​is ad ţwaɣeḍṣen ‘s yisem n Ubabat, n Umemmit akk-​d ṛṛuḥ iqedsen.’ (Matta 28:19) Ayagi yesskanay-​ed belli win akken ara yeţwaɣeḍṣen yesteɛṛef s wemkan ɛlayen n Yahwa Ṛebbi akk-​d Ɛisa Lmasiḥ. (Ahellil 83:19; Matta 28:18) Yesteɛṛef daɣen s wayen i gxeddem ṛṛuḥ iqedsen n Ṛebbi, yeɛni lqewwa yessexdam Ṛebbi.—Igalatiyen 5:22, 23; 2 Buṭrus 1:21.

24, 25. a) Acu i d-​iţmettil weɣḍaṣ? b) Acu-​t westeqsi i d-​yegran?

²⁴ Lameɛna, aɣḍaṣ mačči d acucef kan. Yeţmettil-​ed lḥaǧa yesɛan lqima tameqrant. M’ara k-​ssekcmen deg waman, amzun d lmut i temmuteḍ deg wayen yeɛnan tamɛict-​ik n zik. M’ara d-​teffɣeḍ seg waman, amzun  tuɣaleḍ-​d ɣer tudert bac aţ-​ţxedmeḍ lebɣi n Ṛebbi. Ur teţţu ara belli tbuddeḍ taṛwiḥt-​ik i Yahwa Ṛebbi s timmad-​is, mačči i kra n leqdic, mačči i yemdanen neɣ i yiwet n tuddsa. Abuddu n teṛwiḥt-​ik akk-​d weɣḍaṣ-​inek ţbegginen-​d belli tebda tdukli-​inek d Ṛebbi, yeɛni lɛalaqa iǧehden yid-​es.—Ahellil 25:14.

²⁵ Aɣḍaṣ ur iḍemmen ara leslak. Ɛisa yenna-​d: “Win ara yeṭṭfen alamma ţ-​ţaggara ad iţţusellek.” (Matta 24:13) Aɣḍaṣ d aqeddim (asurif) kan amezwaru i geţţawin ɣer leslak. Yegra-​d ihi westeqsi-​yagi: amek ara tḥerzeḍ iman-​ik di leḥmala n Ṛebbi? A naf leǧwab deg yixef aneggaru n tektabt-​a.