Ɛisa (Yasuɛ) yemxallaf ɣef yemdanen nniḍen: uqbel a d-ilal ɣef lqaɛa, yella d ṛṛuḥ yeţɛici deg igenni. (Yuḥenna 8:23) D neţţa i d-yexleq Ṛebbi d amenzu, yerna iɛawen Ṛebbi asmi i d-yexleq leḥwayeǧ akk nniḍen. D neţţa kan i d-yexleq Yahwa s timmad-is. Ɣef wayagi i geţţusemma, deg Wedlis Iqedsen, Mmi-s “awḥid.” Yeţţusemma daɣen “Awal”, axaṭer yella d win i d-iţmeslayen s yisem n Ṛebbi; Yahwa yessexdem-it bac a ɣ-d-yessiweḍ lehduṛ-is.​—Yuḥenna 1:14.​—Ɣer Lemtul 8:22, 23, 30; Ikulusiyen 1:15, 16.

 Ṛebbi iceggeɛ-ed Mmi-s ɣer lqaɛa; ineqqel-ed tudert-is seg igenni ɣer tɛebbuṭ n yiwet n tlemẓit Tayahudit yellan ţ-ţaɛezrit, isem-is Meryem. Ihi, Ɛisa ur isɛi ara ababat am yemdanen. (Luqa 1:30-35) Yusa-d ɣer lqaɛa iwakken: 1) ad yesselmed tideţ ɣef Ṛebbi, 2) a ɣ-d-yessken s lemtel-ines amek ara nexdem lebɣi n Ṛebbi ɣas ma nesɛa iɣeblan, 3) ad yefk tudert-is ikemlen “d lefdiya.”​—Ɣer Matta 20:28.

 Lefdiya (lefdi) d lexlaṣ ara yeţţunefken iwakken a d-yeţţusellek walbeɛḍ si lmut. (Tuffɣa 21:29, 30) Ass-agi, neţţiwsir yerna neţmeţţat. Meɛna, mačči d ayagi i geqsed Ṛebbi i lɛibad. Amek i neẓra annect-agi? Ṛebbi inna-yas i wergaz amezwaru, Adam, belli m’ur s-yuɣ ara awal, ad yemmet. Ihi, lukan Adam ur iɛuṣa ara, yeɛni lukan ur yednib ara, tili d lmuḥal ad yemmet. (Laṣel n ddunit 2:16, 17; 5:5)  Adlis Iqedsen yesselmad belli d Adam i d ssebba imi “i d-tekcem” lmut ɣer ddunit. Yeǧǧa-d i tarwa-s meṛṛa ddnub akk-d lɛiqab is i d-igellu ddnub-agi, yeɛni lmut. Neḥwaǧ ihi lefdiya ara ɣ-d-issukksen si lɛiqab n lmut i d-newṛet sɣur Adam.​—Ɣer Iṛumaniyen 5:12; 6:23.

 Anwa i gzemren ad ixelleṣ lefdiya-yagi w’a ɣ-d-isellek si lmut? M’ara yemmet walbeɛḍ, d ddnubat-is kan i gxelleṣ. Ihi, ulac lɛebd i gzemren ad ixelleṣ ɣef ddnubat n wiyaḍ axaṭer lɛibad ur kmilen ara.​—Ɣer Ahellil 49:8-10.

 Ɛisa yella yekmel, mačči am nekni. Neţţa leɛmeṛ yednib. Ihi, ur yeḥwaǧ ara ad yemmet ɣef ddnubat-is. Ɣef ddnubat n wiyaḍ i gemmut. Ṛebbi ibeggen-ed belli iḥemmel mliḥ lɛibad: iceggeɛ-ed Mmi-s ɣer lqaɛa bac ad yemmet ɣef ddemma-nneɣ. Ɛisa daɣen ibeggen-ed belli yeţḥibbi- yaɣ: yuɣ awal i Baba-s yerna yefka tudert-is ɣef lǧal n ddnubat-nneɣ.​—Ɣer Yuḥenna 3:16; Iṛumaniyen 5:18, 19.

 Wali bidyu Acimi i gemmut Ɛisa?

 Asmi i gella Ɛisa ɣef lqaɛa, yesseḥla imuḍan, yessker-ed lmeyytin, iɛawen daɣen imdanen i d-yeţmagaren iɣeblan. Swakka, yessken-ed d acu ara yexdem ɣer zdat i lɛibad meṛṛa yeţţaɣen awal i Ṛebbi. (Matta 15:30, 31; Yuḥenna 5:28) Mbeɛd lmut-is, Ṛebbi yesseḥya-t-id d ṛṛuḥ. (1 Buṭrus 3:18) Mbeɛd, yeqqim ‘ɣer tama tayeffust n Ṛebbi’, yuṛǧa almi d asmi i s-yefka Ṛebbi tazmert ad yeḥkem ɣef lqaɛa meṛṛa. (Iɛebṛaniyen 10:12, 13) Ass-a, atan d Agellid deg igenni. Inelmaden-is ţberriḥen lexbaṛ-agi yessefṛaḥen di ddunit irkulli.​—Ɣer Danyil 7:13, 14; Matta 24:14.

 Qrib ad yessexdem Ɛisa tazmert-is n Ugellid bac ad yekkes akk lemḥayen d wid yellan d ssebba-nsent. Wid meṛṛa yesɛan liman di Ɛisa yerna ţţaɣen-as awal ad ɛicen di lǧennet ɣef lqaɛa.​—Ɣer Ahellil 37:9-11.