ASMI i yuɣal Bulus d amasiḥi, iberreḥ s leḥṛaṛa lexbaṛ n lxiṛ n Tgelda n Ṛebbi. Argaz-​agi yellan zik d axṣim ilaq tura ad iqabel aqhar qessiḥen ula d neţţa. Bulus iṣufer tlata iberdan akken ad iberreḥ, yerna yexdem aya mebla ma yefcel. Yelḥa acḥal d amecwaṛ akken ad iberreḥ lexbaṛ n lxiṛ ɣef Tgelda ara yesseḍrun leqsed n tazwara n Ṛebbi yeɛnan imdanen.

Deg yinig-​ines (uṣafer-​ines) amezwaru, yexdem neţţa d wemdakkel-​is Barnabas, Bulus isseḥla di temdint n Listra yiwen wergaz yellan d aquḍar seg wasmi i d-​ilul. Dinna, lɣaci ɛeggḍen belli Bulus d Barnabas llan d iṛebbiten, dɣa bɣan a sen-​mudden iseflawen. Acḥal i sen-​yewɛeṛ ad ḥebsen lɣaci-​yagi! Ssyin, ixṣimen n Bulus demmren ahdum-​agi akken a t-​ṛejmen. Ɣas akken qrib i t-​nɣan, Bulus yuɣal-​ed ɣer temdint-​agi akken ad iṣebber inelmaden s lehduṛ isseǧhaden.

Imasiḥiyen i d-​yekkan si laṣel n Iyahudiyen qqaren belli lmumnin ur nelli ara d Iyahudiyen ilaq-​asen ad tebɛen kra n yeḥricen n Lqanun n Musa. Ihi, Bulus iṛuḥ ɣer Yarucalim ad iciweṛ imceggɛen d imasiḥiyen nniḍen iccurfen ɣef temsalt-​agi. S usenqed lqayen n Tira Iqedsen akk-​d uwelleh n ṛṛuḥ iqedsen n Ṛebbi, irgazen-​agi uran i tjemmuyaɛ ad xḍunt i leɛbada n lmeṣnuɛat, i zzna, i tissit n idammen akk-​d wučči n weksum ur nemzil ara. Lameɛna, ɣas lumuṛ-​agi d “ayen ilaqen”, win ara ten-​itebɛen ur yelzim ara a s-​yini belli ilaq ad iḍfer Lqanun n Musa.—Lecɣal 15:28, 29.

Deg yinig-​ines wis sin, Bulus iṛuḥ ɣer temdint n Biri (i d-​iṣebḥen ass-​agi di Lyunan). Iyahudiyen n temdint-​a qeblen s lfeṛḥ aselmed-​ines. Ssenqaden yal ass Tira Iqedsen akken ad walin ma iṣeḥḥa uselmed-​agi neɣ ala. Lameɛna, ula syenna ilaq-​as ad iṛuḥ axaṭer yeţwaqher. Ihi yeṭṭef abrid ɣer temdint n Atinya. Zdat n yiwet n terbaɛt n wat Atinya yeɣran xilla, Bulus ixdem lxeṭba yesɛan lqewwa. Yehdeṛ s sshala, s lemḥadra d leɛqel. Swakka iǧǧa-​d lemtel ifazen.

Ɣer taggara n yinig-​ines wis tlata, Bulus yuɣal ɣer Yarucalim. Mi yella di lemqam, kra n Iyahudiyen demmren lɣaci a d-​kkren ɣer Bulus akken a t-​nɣen. Acu kan, iɛsekṛiwen n Ṛuma ḥudden-​t, mbeɛd wwin-​t akken a t-​steqsin. Imi yesɛa Bulus laṣel aṛumani, yezmer ad idafeɛ ɣef yiman-​is zdat n lḥakem aṛumani Filiks. Iyahudiyen ur zmiren ara a d-​fken ţţbut ɣef wayen i s-​sbabben. Ɣer zdat, d Fistus i guɣalen d aneḥkam deg umur n Filiks. Iwakken ur t-​iţsellim ara Fistus-​agi ger ifassen n Iyahudiyen, Bulus yenna: “Ad rẓeɣ ccṛeɛ ɣer Qayṣer!” Fistus yerra-​yas: “Aţ-​ţeţţucaṛɛeḍ zdat Qayṣer!”—Lecɣal 25:11, 12.

Wwin ihi Bulus ɣer Ṭelyan s lbabuṛ akken ad iţţucaṛeɛ. Meɛna, lbabuṛ iɣef yerkeb yeɣreq, dɣa iţţuḥettem ad isɛeddi ccetwa di tegzirt n Malṭa. Di Ṛuma yeqqim ɛamayen deg yiwen wexxam i d-​yekra. Ɣas akken iɛuss-​it yiwen uɛsekṛiw aṛumani, amceggeɛ Bulus ikemmel s leḥṛaṛa aberreḥ ɣef Tgelda n Ṛebbi i kra n win i d-​yusan a t-​iẓer.

—Ayagi yers ɣef Lecɣal 11:22–28:31.