ṚEBBI icar-​ed belli ad yextiṛ Lmasiḥ akken ad yili d Amwellah n yegduden meṛṛa. Imi yeẓra anwa aneḥkam i ɣ-​ilaqen, yextaṛ win yellan d lemxeyyeṛ. Amek iga wemwellah-​agi? D aneḥkam ameqran n lɛeskeṛ? D argaz ixeddmen s leqfaza di tsertit (lbulitik)? D lɛalem ameqran yeţfelsifen? Ɛlaḥsab n Tira Iqedsen, Lmasiḥ, yeţţusemman Ɛisa, yella d nnbi ixulfen akk wiyaḍ.​—Matta 23:10.

Ṛebbi yexdem kullec akken a d-​ilal Ɛisa yekmel yerna d imqeddes. Cciṭan ixdem xilla n leḥwayeǧ akken ad issefsed Ɛisa. Ɣas akken, Ɛisa iqubel-​itent meṛṛa. Ama deg wawal, ama di lefɛayel, issexdem tazmert-​is akken i ţ-​yessexdem Ṛebbi, mebla ma nessukkes-​as-​d kra. Iɛuned diɣen s lekmal lḥeqq, lekyasa d leḥmala n Ṛebbi. A nwali d acu i nezmer a nelmed si lemtel n Ɛisa.

Ɛisa iɛawen wiyaḍ s tezmert i s-​yefka Ṛebbi. Yeţḥebbiṛ s ṣṣeḥ ɣef lɣaci yerna yessexdem tazmert-​is bla cceḥḥa akken ad isseqneɛ lmeḥwiǧat-​nsen. Yiwet n tikkelt, yenna-​d: “Tejreḥ tasa-​w ɣef lɣaci-​agi [axaṭer] ulac ayen ara ččen.” (Marqus 8:2) Umbeɛd, s lbeṛhan yessečč wid akk i d-​iṛuḥen ad ḥessen i uselmed-​ines.

Ɛisa yelḥa aṭas, yesselmad yerna “isseḥlay yal aṭan d yal leɛyubat n lɣaci.” (Matta 4:23) Nefhem tura acimi i t-​ttabaɛen xilla n yemdanen. “Lɣaci meṛṛa ţqelliben a t-​nalen (a t-​massen) axaṭer teţţeffeɣ-​ed seg-​s tezmert i ten-​isseḥlayen akk.” (Luqa 6:19) Akken i d-​iban lḥal, Ɛisa “ur d-​yusi ara iwakken ad qedcen fell-​as, meɛna yusa-​d iwakken ad yili d aqeddac, yerna ad isebbel tudert-​is [d lefdi, MN] iwakken ad isellek aṭas n yemdanen.” (Matta 20:28) a Acḥal n ineḥkamen ara iqeblen ad sebblen nnfeɛ-​nsen ɣef liǧal n wegdud?

Ɛisa iɛuned lḥeqq n Ṛebbi. Ur yuɣ ara kan awal i lqanun n Ṛebbi, iqbel ula d ssebbat i ɣef i d-​iţţunefk lqanun-​a. Akken i t-​id-​carent Tira Iqedsen, amzun yenna-​d: “Ţţafeɣ lfeṛḥ m’ara xeddmeɣ lebɣi-​k, a Ṛebbi-​inu, yerna lqanun-​ik izdeɣ iẓuran n wul-​iw.” (Ahellil 40:8) Am Ṛebbi, Ɛisa ibeggen lḥeṛma d leqder ama i imeṛkantiyen d igellilen, ama i yergazen ţ-​ţlawin, ama i imecṭaḥ d imeqranen yerna ur yexdim ara lxilaf gar-​asen. Yiwen wass, inelmaden-​is lummen kra n imawlan imi d-​wwin arraw-​nsen i Ɛisa. Meɛna neţţa yenna-​yasen: “Anfet i warrac a d-​asen ɣuṛ-​i! Ur ten-​ţţarrat ara, axaṭer tagelda n Ṛebbi i wid yellan am nutni.”​—Marqus 10:14.

Ɛisa iɛuned lekyasa n Ṛebbi. Yeẓra mliḥ amek i geţwaxdem wemdan. “Yessen ayen yellan deg wulawen” n lɛibad. (Yuḥenna 2:25) Ula d wid i d-​ceggɛen yeɛdawen-​is akken a t-​ṭṭfen nnan: “Di leɛmeṛ ur nesli i yiwen iheddeṛ am neţţa.” Ansi i s-​d-​tekka lekyasa-​yagi i Ɛisa? Yessefhem-​ed: “Ayen i sselmadeɣ  mačči s ɣuṛ-​i i d-​yekka, yekka-​d s ɣuṛ win i yi-​d-​iceggɛen.”​—Yuḥenna 7:16, 46.

Ɛisa iɛuned leḥmala n Ṛebbi. Ţɣiḍin-​t mliḥ medden. Yiwet n tikkelt, yiwen wergaz “ihelken lbeṛs” iḥellel-​it: “A Sidi, ma tebɣiḍ, tzemreḍ a yi-​tesseḥluḍ.” Ɛisa tegzem tasa-​s, “yeẓẓel afus-​is innul-​it, yenna-​yas: ‘Bɣiɣ, ili-​k teḥliḍ!’ Imiren kan, yeḥla si lbeṛs-​nni.” (Luqa 5:12, 13; Marqus 1:41, 42) Ɛisa yebɣa seg wul ad isnefsusi taɛkemt n wergaz-​agi ameɣbun.

Ɛisa yeţḥebbiṛ fell-​ak ula d kečč? Atan wacu i d-​yerra s yiman-​is: “Aset-​ed ɣuṛ-​i a wid akk yeɛyan, iɛebban taɛekkumt ẓẓayen, a wen-​fkeɣ talwit d westeɛfu. Refdet ɣef tuyat-​nwen azaglu-​inu tlemdem s ɣuṛ-​i, axaṭer ul-​iw yeččuṛ d ṛṛeḥma yerna d aḥnin, aţ-​ţafem talwit i teṛwiḥin-​nwen.”​—Matta 11:28, 29.

Ɛisa d Amwellah yifen akk wiyaḍ. Daymi i ɣ-​d-​inna s lḥanna: ‘Lemdet sɣur-​i.’ Aţ-​ţqebleḍ ayen akka i ɣ-​d-​yenna? Ma tqebleḍ ayagi, aţ-​ţafeḍ sseɛd di tudert-​ik.