Daw 8
Ruyak Jamjau Hte Nhkru Ai Lam Ni Hpe Karai Kasang Hpa Majaw Byin Na Ahkang Jaw Da A Ta?
1. Nhkru ai lam ni gara hku byin wa ai rai?
Masha shada da uphkang ai gaw, masha ni a manghkang ni hpe, n hparan ya lu ai hpe sakse madun na matu Karai Kasang aten jaw
Satan masu ai aten kaw na, mungkan hta nhkru ai lam byin hpang wa ai. Shawng nnan hta, Satan gaw hkum tsup ai lamu kasa re. Raitim, shi gaw “teng man ai lam hta n nga” ai. (Yawhan 8:44) Shi gaw, Karai Kasang sha, nawku hkam ging ai ahkaw ahkang hpe, ra marin wa ai. Satan gaw Ewa hpe masu nna, Karai Kasang a ga madat na malai, shi a ga hpe madat na matu gunglau ai. Adam gaw Ewa a ga madat nna, Karai Kasang a ga n madat ai. Adam dai hku dawdan ai majaw, ruyak jamjau hte si hkrung si htan byin pru wa ai.—Ningpawt Ninghpang 3:1-6, 19 hpe hti u.
Karai Kasang a ga n madat na matu Ewa hpe Satan tsun ai gaw, Karai Kasang uphkang ai lam hpe gumlau nga ai re. Masha law malawng mung, Satan hpang hkan nna, Karai Kasang hpe shanhte a Uphkang Madu hku nna, n hkap la ma ai. Dai majaw, Satan gaw “mungkan ga a Du” byin wa ai.—Yawhan 14:30; 1 Yawhan 5:19 ni hpe hti u.
2. Karai Kasang hpan ai lam hta ra rawng ai lam nga ai kun?
Karai Kasang galaw ai amu yawng gaw hkum tsup ai. Lamu kasa ni hte masha ni hpe Karai Kasang gaw shi a ga hpe, ra n rawng hkra madat lu ai atsam hte, hpan da ai. (Tara Jahprang 32:4, 5) Karai Kasang gaw anhte hpe, kaja ai, nkaja ai hpe tinang myit ra ai hku, lata na ahkang jaw nna hpan da ai. Dai hku ahkang jaw da ai majaw, Karai Kasang hpe anhte tsawra ai lam madun dan lu ai.—Yaku 1:13-15; 1 Yawhan 5:3 ni hpe hti u.
3. Ruyak jamjau ni hpe Karai Kasang hpa majaw ya du hkra byin na ahkang jaw da ai rai?
Yehowa gaw, shi a uphkang ai lam hpe, gumlau ai ni a ntsa, kalang ta ari n jaw ai gaw, hpa majaw kun? Karai Kasang n lawm ai sha, uphkang na matu shakut ai gaw, akyu n nga ai hpe madun mayu ai majaw re. (Hpaji 7:29; 8:9) Masha ni a labau, shaning 6,000 na ai hpang, dai lam gaw grau nna danleng wa ai. Masha uphkang ai gaw, majan, nhkru ai lam, n tara ai hte ana zinli ni hpe, n yeng seng kau ya lu ai.—Yeremia 10:23; Roma 9:17 ni hpe hti u.
Masha uphkang ai hte nbung ai sha, Karai Kasang uphkang ai hpe hkap la ai ni gaw, akyu lu la na re. (Esaia 48:17, 18) Kade n na yang, Yehowa gaw masha asuya yawng hpe, jahtum kau sana re. Karai Kasang uphkang ai hpe hkap la ai ni sha, ndai mungkan ga e lu nga na re.—Esaia 11:9; Daniela 2:44 hpe hti u.
Ruyak Jamjau Ai Lam Hpe Karai Kasang Hpa Majaw Byin Na Ahkang Jaw Da A Ta? ngu ai video hpe yu u.
4. Karai Kasang myit galu ai majaw anhte hpa galaw na ahkang lu a ta?
Yehowa hpe masha ni nawku ai gaw, akyu lu taw ai majaw re ngu nna Satan hkrak tsun ai. Dai ga shut ai hpe nang sakse madun lu na kun? Karai Kasang myit galu ai majaw, Karai Kasang uphkang ai hte masha uphkang ai hta, gara hpe ra sharawng ai lam madun mai ai. Anhte a nga sat nga sa gaw, anhte gara lam lata ai hpe madun ai.—Yoba 1:8-12; Ga Shagawp 27:11 ni hpe hti u.
5. Karai Kasang hpe anhte a Uphkang Madu hku nna gara hku lata lu na kun?
Anhte lata ai lam gaw, Karai Kasang hpe anhte a Uphkang Madu hku nna hkap la mayu ai kun, ngu ai hpe madun dan
Chyum Laika hta madung tawn ai, nawku daw jau ai lam hpe tam nna, dai hta shang lawm ai hte, Karai Kasang hpe anhte a Uphkang Madu hku nna lata mai ai. (Yawhan 4:23) Yesu zawn, mung masa, hpyen amu ni hte san san nga nna, Satan uphkang ai hpe ningdang kau mai ai.—Yawhan 17:14 hpe hti u.
Satan gaw, shi a dagu hte, akyang hten ai, shoihpa nga ai akyang lailen ni galaw na matu, n-gun jaw nga ai. Dai lam ni hpe anhte n galaw ai majaw, jinghku ni hte manang nkau mi gaw, jahpoi asawng na, shing nrai, ninghkap na re. (1 Petru 4:3, 4) Dai majaw anhte lata ra ai. Karai Kasang hpe tsawra ai masha ni hte kanawn na kun? Tsawra myit hte hpaji rawng ai, shi a ga shaka ni hpe madat mara na kun? Anhte dai hku galaw yang, yakhkak ai aten hta Karai Kasang tsun ai hku galaw na nre, nga nna Satan tsun ai gaw shut ai hpe sakse madun ai re.—1 Korinhtu 6:9, 10; 15:33 hpe hti u.
Karai Kasang gaw masha ni hpe tsawra ai majaw, nhkru ai hte ruyak jamjau ni hpe, jahtum ya na ngu ga sadi jaw ai. Karai Kasang a ga sadi hpe, kam sham ai lam hpe amu hte madun ai ni gaw, mungkan ga ntsa hta, htani htana asak lu la na re.—Yawhan 3:16 hpe hti u.
