TARA tawt lai ai marai lahkawng a ka-ang hta, Yesu hpun shadaw ntsa jen da hkrum ai Chyum Laika labau hpe masha law law chye ma ai. (Mat 27:35-38) Raitim, Yesu a moi mang hpe makoi mayang na matu hkyen jalang ai lam, lupsung hku hta makoi mayang ai lam hpe Chyum Laika hta tup hkrak n tsun da ai nga nna nkau tsun ma ai.​—Mrk 15:42-46.

Si dam hkrum ai tara tawt lai ai wa hpe lup hta makoi mayang na ahkang hte seng nna, Kabu Gara Shiga Chyum Laika hpe mara tam ai masha nkau ntsen ma ai. Hpa majaw kun? Shingdu labau hpe Samitsonian magazine kaw laika ka ai shiga sara Eriye Saba ndai hku tsun dan ai: “Hpun shadaw hta sat ai gaw, shawa hpawng kaw na kau da hkrum ai ni a matu ari jaw ai lam re. Dai zawn masha ni hpe, Roma ni gaw hkungga ai hku nna lup hta makoi mayang na ahkang jaw ai gaw, hpaji du ni a matu mani hpa byin nga ai.” Roma ni gaw si dam hkrum ai tara tawt lai ai wa hpe jahtum du hkra kaya jahkrum mayu ai. Dai majaw, moi mang hpe dusat dumyeng ni sha kau na matu, kabai da nna, ngam ai adaw achyen ni hpe sha, lup langai ngai kaw sa kabai ma ai.

Raitim, labau htu sagawn hpaji gaw, si dam hkrum ai Yuda nkau a nra hte seng nna lak lai ai madi madun lam madun lu wa ai. Tsa ban langai kaw si dam jaw hkrum ai marai langai a nra hpe 1968 hta, tam mu wa ai. Yerusalem mare makau na Yuda dinghku langai a lup kaw mu wa ai re. Shi a nra ni hpe nra sutdek hta bang da ai. Dai nra ni hta lagaw lahtin nra lawm ai. Hpun pyen hpe lagaw lahtin hte shakap da nna, lekma 4.5 (11.5 cm) galu ai hpri hte kayat da ai. Saba ndai hku tsun ai: “Dai gaw Yehohkanan ngu ai la langai a lagaw lahtin re. Lup hta Yesu makoi mayang hkrum ai ngu tsun da ai Kabu Gara Shiga Laika gaw teng ai lam dai lagaw lahtin gaw sakse madun nga ai. Yesu prat hta, hpun hta jen nna sat hkrum ai nkau hpe Yuda htung hku lup hta makoi mayang na matu, Roma ni ahkang jaw ai ngu ai madi madun lam re.”

Dai lagaw lahtin a majaw, hpun shadaw hta Yesu gara hkrang hte jen da hkrum ai hpe ningmu amyu myu nga chye ai. Raitim, si dam hkrum ai tara tawt lai ai nkau hpe lup hta makoi mayang ai ngu ai lam gaw tup hkrak jaw ai gaw dan dawng nga ai. Yesu a moi mang gaw, lup kata hta makoi mayang hkrum ai ngu ai Chyum Laika hta tsun da ai lam gaw tup hkrak jaw ai. Dai madi madun lam gaw sakse re.

Grau ahkyak ai gaw, sahti langai a lup hta Yesu makoi mayang hkrum na ngu Yehowa tau hkrau tsun da ai. Dai ga n hpring tsup hkra kadai mung n lu pat shingdang ai.​—Esa 53:9; 55:11.