AKYU hpyi ai gaw anhte a matu akyu nga ai kun? Akyu nga ai ngu nna Chyum Laika hta tsun da ai. Karai Kasang hpe sadi dung ai ni a akyu hpyi ga gaw shanhte hpe gaja wa akyu jaw wa ai. (Luka 22:40; Yaku 5:13) Akyu hpyi ai gaw Karai Kasang hte hku hkau nihtep shangun ai sha n-ga, hkum hkrang hte myit masin ra kadawn lam hpe mung jahpring shatsup ya ai. Gara hku na kun?

Na a ma hpe marai langai ngai gaw kumhpa jaw ai ngu saga. Na a ma hpe chyeju dum ai myit nga hkra shairn ya na kun? Shing n rai chyeju dum ai lam tsun dan chye na matu sharin ya na kun? Hkamsha lam ni hpe hpaw tsun dat ai shaloi, hkamsha lam ni gaw grau dan leng wa nna grau lachyum sung wa ai. Karai Kasang hpe akyu hpyi ai shaloi hta mung dai hte maren sha rai na re. Ga shadawn nkau mi hpe dinglik yu ga.

Chyeju Dum Ai Akyu Hpyi Ga Ni. Anhte a matu galaw da ya ai mai kaja lam ni a matu chyeju dum ai hku nna, Karai Kasang kaw akyu hpyi ai shaloi, anhte lu da ai shaman chyeju ni hpe myit maju jung wa ai. Dai hku nna grau chyeju dum chye wa, grau ngwi pyaw wa na, grau nna kaja ai ningmu ni mung nga wa na re.​—Hpilipi 4:6.

Ga shadawn: Tinang akyu hpyi ai hpe Karai Kasang madat ya nna mahtai jaw ya ai hpe chyeju dum ai lam, Yesu hpaw tsun dan wa ai.​—Yawhan 11:41.

Mara Raw Ya Na Matu Hpyi Shawn Ai Akyu Hpyi Ga Ni. Karai Kasang a mara raw dat ai hkrum na matu anhte akyu hpyi ai shaloi, anhte a myit nsam gaw san seng wa nna myit majing hte myit malai la ai hta n-ga, mara a shut hpyit ai lam hpe mung grau nna sadi hkrup wa na re. Dai sha n-ga, mara nga ai ngu ai hkamsha lam mung tsang mat wa na re.

Ga shadawn: Dawi gaw akyu hpyi ai shaloi, shi a myit malai hte yawn hkyen lam hpe hpaw madun dan wa ai.​—Shakawn 51.

Lam Matsun Hte Nyan Hpaji Hpyi Shawn Ai Akyu Hpyi Ga Ni. Kaja ai dawdan lam ni jahkrat lu hkra, anhte hpe lam matsun ya na matu (sh) ra rawng ai nyan hpaji jaw na matu Yehowa hpe akyu hpyi ai gaw, anhte hpe jet ai shagrit shanem myit nga shangun ai. Bai nna, anhte hta shadawn sharam sha nga ai ngu ai hpe myit dum shangun ai sha n-ga, Karai Kasang hpe grau nna kamhpa myit nga shangun ai.​—Ga Shagawp 3:5, 6.

Ga shadawn: Israela mungdan hpe uphkang lu na matu, nyan hpaji hte lam matsun jaw ya rit ngu nna Hkawhkam Shawlumon gaw shagrit shanem let akyu hpyi wa ai.​—1 Hkawhkam 3:5-12.

Myitru Myit Tsang Lam Hkrum Ai Shaloi Na Akyu Hpyi Ga Ni. Myitru myit tsang nga ai aten hta, Karai Kasang hpe myit hpaw nna akyu hpyi dat na nga yang, myit simsa nna tinang hkum hta Karai Kasang hpe grau kamhpa wa na re.​—Shakawn 62:8.

Ga shadawn: Hkrit na zawn re ai hpyen ni hte gasat ra ai shaloi, Hkawhkam Asa akyu hpyi wa ai.​—2 Hkawhkam Labau 14:11.

Karum Shingtau Ra Ai Ni A Matu Akyu Hpyi Ga Ni. Dai zawn akyu hpyi ga ni gaw anhte hpe tingkyeng myit n nga ai sha, tsawra matsan dum myit nga shangun ai.

Ga shadawn: Yesu gaw shi a sape ni a matu akyu hpyi ya wa ai.​—Yawhan 17:9-17.

Shakawn Kungdawn Ai Akyu Hpyi Ga Ni. Yehowa Karai Kasang a mauhpa bungli ni hte atsam ningja ni hpe, anhte shakawn kungdawn ai shaloi, shi hpe hkungga ai myit hte chyeju dum ai myit grau nna paw pru wa na re. Dai zawn akyu hpyi ga ni gaw Karai Kasang hte grau nna hku hkau wa shangun ai.

Ga shadawn: Karai Kasang a hpan da lam ni a matu, Dawi gaw sharawng awng let shakawn kungdawn wa ai.​—Shakawn 8.

Akyu hpyi ai hte matut manoi ai kaga shaman chyeju langai gaw “chye chyang ai nyan yawng hta grau lai ai Karai Kasang a ngwi pyaw ai” lam re. (Hpilipi 4:7) Yakhkak jamjau lam law la ai ndai mungkan hta, myit simsa lam lu la ai gaw mauhpa shaman chyeju re. Dai gaw hkamja lam hpe pyi grau kaja wa shangun ai. (Ga Shagawp 14:30) Raitim, dai shaman chyeju ni gaw tinang a shakut shaja lam langai a majaw sha lu la ai rai kun? Shing n rai dai hta grau ahkyak ai lam langai ngai a majaw kun?