KADAI hpe mi hpyi hpyi akyu hpyi ga yawng gaw, shara mi de sha du mat ai rai kun? Du ai ngu nna masha law malawng shadu da ma ai. Makam masham kayau ai hpe ra sharawng ai ni, n bung ai lam ni nga tim nawku htung yawng hpe hkap la lu ai ni a matu, lahta hta tsun da ai lam gaw ra sharawng hpa re. Raitim, dai hku sawn la ai gaw shut ai ngu yang mai byin na kun?

Masha ni gaw, teng man ai Karai Kasang hpe akyu n hpyi ai gaw lang grau law ai ngu nna Chyum Laika hta tsun da ai. Chyum Laika prat hta masha ni gaw, law malawng hku nna sumla ni hpe akyu hpyi wa ma ai. Raitim, Karai Kasang gaw dai hte seng nna jahkring hkring sadi jaw wa ai. Ga shadawn, gawk ngu sumla ni gaw “na tu ti mung n na lu ma ai” ni re ngu nna Chyum Laika hta tsun da ai. (Shakawn 115:4-6) Dai lam gaw asan sha re. Hpa nsen mung n na lu ai wa hpang de akyu hpyi ai gaw, hpa akyu mung lu na n re.

Dai lam hte seng nna asan sha tsun dan da ai Chyum Laika labau langai nga ai. Teng man ai myihtoi Elia gaw, shi nawku daw jau ai Karai Kasang hpe akyu hpyi ngut ai hpang, Bala nawku daw jau ai ni hpe mung shanhte a hpara hpe akyu hpyi shangun ai. Teng man ai Karai gaw mahtai jaw na rai nna, shut shai ai wa gaw mahtai jaw na n re ngu nna Elia gaw shanhte hpe tsun ai. “Nsen ngoi ai mi n na, htan ai wa mung kata, sawn nawn ai wa mung kadai n pra nga ai” ngu nna Chyum Laika hta tsun da ai. (1 Hkawhkam 18:29) Elia akyu hpyi ai aten hta gaw gara hku byin wa ai kun?

Elia akyu hpyi ngut ai hpang, shi nawku ai Karai Kasang gaw kalang ta mahtai jaw ya ai. Lamu kaw na wan hkrat wa nna, Elia nawng da ai hkungga hpe nat kau ya ai hku nna mahtai jaw wa ai. Shai ai lam gaw hpa rai kun? 1 Hkawhkam 18:36, 37 hta tsun da ai Elia a akyu hpyi ga hta ahkyak ai lam langai tsun dan da ai. Dai akyu hpyi ga gaw kadun sha re. Raitim, dai zawn kadun ai akyu hpyi ga hta pyi, Elia gaw Karai Kasang a mying Yehowa ngu ai hpe, masum lang shaga wa ai.

Hkanan amyu ni nawku ai hpara Bala hta, “madu” ngu lachyum nga nna, buga ginra hkan nna amyu myu shaga ma ai. Raitim, Karai Kasang a amying Yehowa ngu ai gaw kadai hte mung n bung nna, ninggawn tawa hta shi langai sha madu ai amying re. “Ngai gaw Yehowa rai nga nngai; dai nye a amying shingteng rai nga ai: nye a hpung shingkang masha wa hpe, nye a arawng sadang hpara sumla ni hpe, ngai jaw na n rai.”​—Esaia 42:8.

Elia hte Bala myihtoi ni a akyu hpyi ga ni gaw shara mi hta sha du mat ai nga yang, dai zawn byin na lam nga na kun? Nga na n re. Bala nawku daw jau ai lam hta, htunghking hku nna shawa num galaw sha ai, masha hpe hkungga nawng ai hku nna shinggyim masha ni hpe grit nem hkra galaw ma ai. Yehowa Karai Kasang hpe nawku ai chyawm gaw, Israela masha ni hpe yu kaba shangun ai sha n-ga, grit nem ai lam kaw na mung lawt lu shangun ai. Ndai lam hpe dinglik yu ga: Nang grai hkungga ai jinghku wa hpang de, laika langai sa hkyen ai nga yang, na a jinghku hte mying n bung ai wa (sh) na jinghku gaw ahkyak ai ngu sawn la da ai lam ni hpe nhtan shai ai hku myit ai wa hpang de, na laika hpe du shangun mayu na kun? Tsep kawp du shangun mayu na n re.

Yehowa Karai Kasang hpe akyu hpyi ai nga yang, nang gaw Hpan Madu, shinggyim masha yawng a Kawa hpang de akyu hpyi nga ai re. * “Yehowa e, anhte a Wa rai nga ndai” ngu nna myihtoi Esaia akyu hpyi wa ai. (Esaia 63:16) Yesu gaw shi a sape ni hpe “ngai gaw nye a Wa hte nanhte a Kawa, nye a Karai Kasang hte nanhte a Karai Kasang hpang de lung wa sa na” ngu nna tsun ai aten hta, Yehowa a lam tsun nga ai re. (Yawhan 20:17) Yehowa gaw Yesu a Kawa re. Yesu akyu hpyi wa ai Karai Kasang gaw Yehowa rai nna, shi hpang akyu hpyi na matu sape ni hpe Yesu sharin ya wa ai.​—Mahte 6:9.

Yesu, Mari, chyoi pra ai masha ni hte lamu kasa ni hpang de akyu hpyi na matu, Chyum Laika hta matsun da ai kun? N matsun da ai. Yehowa Karai Kasang langai hpe sha akyu hpyi na matu matsun da ai. Lam lahkawng hpe dinglik yu ga. Langai, akyu hpyi ai gaw nawku dawjau ai lam langai rai nna, Yehowa Karai Kasang langai hpe sha myit masin mahkra hte nawku ra na ngu nna Chyum Laika hta tsun da ai. (Pru Mat 20:5) Lahkawng, “akyu hpyi ai ga madat mara ai wa” ngu ai amying ningsang hpe Yehowa hkam la da ai ngu nna Chyum Laika hta tsun da ai. (Shakawn 65:2) Karai Kasang gaw kaga masha ni hpe lit ni garan shatsam ya tim, akyu hpyi ai ga ni hpe madat ai lit hpe gaw kadai hpe mung n jaw da ai. Anhte a akyu hpyi ga hpe madat ya na ngu nna ga sadi jaw da ai Karai gaw Yehowa re.

Dai majaw, akyu hpyi ga hpe Karai Kasang madat ya shangun mayu yang, “madu a mying ningsang hpe gang shaga ai masha kadai mung, Hkye hkrang la ai kaw du na ma ra ai” ngu tsun da ai ndai chyum daw hpe myit dum u. (Kasa 2:21) Raitim, akyu hpyi ga yawng hpe Yehowa madat ya ai kun? Anhte a akyu hpyi ga hpe madat ya shangun mayu ai nga yang, kaga hpa naw galaw ra ai kun?