Yesu mungkan ga ntsa nga ai aten hta, shi a Kawa Yehowa a atsam ningja ni hte galaw ai lam ni hpe hpring tup madun dan wa ai. Yesu ndai hku tsun wa ai: “Ngai gaw nye myit hte hpa mung n galaw ai sha, nye Wa ngai hpe sharin nngai hte maren, dai ga ngai tsun nga nngai . . . shi sharawng awng ai amu hpe, ngai tut nawng e a galaw nga nngai.” (Yawhan 8:28, 29; Kolose 1:15) Dai majaw, num ni a ntsa Yesu a mu mada lam hte kanawn mazum ai lam hpe sawn dinglik ai hku nna, Karai Kasang gaw num ni hpe gara hku mu mada ai, shanhte hpe gara hku kanawn mazum ging ai ngu ai lam ni hpe chye wa na re.

Kabu Gara Shiga laika ni hpe ka ai aten hta, num ni hpe masha ni a mu mada lam hte Yesu a mu mada lam gaw, tsawmra shai nga ai hpe Chyum Laika hpaji du law law gaw hkap la ma ai. Gara lam hku nna shai nga ai kun? Yesu a sharin achyin ai lam ni gaw, dai ni aten na num ni a matu akyu naw nga ai kun?

Num ni hpe akyang lailen hte seng ai tsang madang ni hpe jahten sharun ai ni ngu nna n mu mada wa ai. Ngang n bung ai wa hte tsun shaga ai gaw, ngang kayut ai myit nga wa shangun ai nga nna Yuda nawku htung ningbaw nkau sawn la ma ai. Num ni hkalem na hpe hkrit tsang ai majaw, shanhte hpe masha hpawng ni hta la ni hte ga shaga na ahkang n jaw ai (sh) myiman n magap ai sha shinggan pru na ahkang n jaw wa ai. Raitim Yesu chyawm gaw, la ni hpe shanhte a hkum shan ra marin ai myit hpe hkang na matu, num ni hpe kaga san san n da ai sha sari rawng ai hku tsun shaga na matu hpaji jaw wa ai.​—Mahte 5:28.

Yesu ndai hku mung naw tsun wa ai: “Tinang a madu jan hpe shabawn kau nhtawm, num kaga hpe hkungran ai wa kadai mung, shi a madu jan hpe shut ai wa tai nga ai.” (Marku 10:11, 12) Dai hku nna “hpa mara hpe mung hkan nna” tinang a madu jan hpe hka na ahkang jaw ai Yuda nawku htung ningbaw ni a sharin achyin lam hpe Yesu ninghkap wa ai. (Mahte 19:3, 9) Tinang a madu jan hpe shut ai gaw num shaw la shaw ai amu re ngu ai lam gaw, Yuda masha law malawng a matu laklai nga na re. Madu wa gaw tinang a madu jan hpe galoi mung sadi run na n re, madu jan mahtang she sadi run na re ngu nna Yuda nawku htung ningbaw ni tsun wa ai. Dai hte seng nna ga htai chyum langai hta ndai hku tsun dan da ai: “Madu wa ni hpe madu jan hte maren mara tsang madang ni hkan sa shangun ai hku nna, Yesu gaw num ni a sari sadang hpe shagrau ya wa ai.”

Yesu a sharin achyin ai lam ni gaw dai ni aten du hkra akyu rawng: Yehowa Sakse Ni a nawku zuphpawng ni hta, num ni gaw la ni hte wanglu wang lang tsun shaga ma ai. Raitim, Hkristan la ni gaw “hpawmi ni hpe kanu zawn, mahkawn ni hpe kajan zawn, san seng ai myit ting hte” kanawn mazum ai majaw, num ni hpe n htap htuk ai hku yu na (sh) n hkungga ai hku kanawn mazum na hpe tsang n ra ai.​—1 Timohti 5:2.

Num ni hpe sharin achyin ya na matu Yesu aten la wa. Num ni hpe n chye masu su da ra na ngu ai Yuda nawku htung ningbaw ni a sharin achyin lam hte nhtan shai nna Yesu gaw, num ni hpe sharin achyin ya wa ai sha n-ga, shanhte a lam shanhte nan tsun dan chye wa hkra mung n-gun jaw wa ai. Yesu gaw shi a sharin achyin lam hpe sharawng awng let madat hkam la nga ai Mari hpe n gawt shapraw kau ai sha, num ni gaw nta bungli ni hte sha amu law nga ra na n re ai hpe madun dan wa ai. (Luka 10:38-42) Lazaru si mat ai hpang Mari a kana Marhta gaw Yesu san ai hpe hpaji rawng ai hku htai mat ai hpe yu yang, shi mung Yesu a sharin achyin ai lam ni kaw na akyu lu wa ai hpe chye na lu ai.​—Yawhan 11:21-27.

Num ni a ningmu ni hpe Yesu myit lawm ai lam madun wa ai. Ngwi pyaw lam lu mai ai madung lam gaw kashu kasha ni lu da ai, mai byin yang myihtoi zawn re ai shadang sha lu da ai re nga nna Yesu aten na Yuda num law malawng hkam la da ma ai. Kalang mi hta Yesu hpe num langai gaw, “nang hpe gun ai hkritung hkriwang hte, nang chyu ai madoi chyu hpang gaw, a nga lit dai” ngu nna tsun wa ai. Dai hta grau kaja ai lam nga ai lam dai num hpe tsun dan na matu Yesu ahkaw ahkang la wa ai. (Luka 11:27, 28) Karai Kasang a ga hpe madat na matu grau ahkyak ai lam tsun dan ai hku nna, num ni hkan sa nga ra ai htunghking ni htan grau ahkyak ai lam hpe Yesu madun dan wa ai.​—Yawhan 8:32.

Yesu a sharin achyin ai lam ni gaw dai ni aten du hkra akyu rawng: Yehowa Sakse Ni a nawku hpung hta sharin achyin ya ai ni gaw, zuphpawng ni hta num ni mahtai shang lawm ai hpe hkap kabu la ma ai. Kung hpan ai num ni gaw masha man hta mung, masha hpang hta mung kaja ai arawn alai ni madun ai hku nna “mai kaja ai lam sharin achyin” ya nga ai. De a majaw, Hkristan la ni a hkungga lara ai lam lu la ma ai. (Titu 2:3) Dai sha n-ga, Karai a Mungdan kabu gara shiga hpe hkaw tsun ai hta mung num ni hpe mai kam ai.—Shakawn 68:11; Laika man 9 hta lawm ai  “Ga N Shaga Na Matu Num Ni Hpe Kasa Pawlu Pat Shingdang Wa Ai Kun?” ngu ai lawk hpe yu u.

Num ni hpe Yesu lanu lahku wa. Chyum Laika prat hta shayi sha ni gaw shadang sha ni daram manu shadan n hkrum wa ai. Dai ningmu hpe Tamut laika hta ndai hku tsun da ai: “Shadang sha lu da ai ni gaw kabu gara ai wa rai nna, shayi sha lu da ai ni gaw yawn ra ai wa re.” Shayi sha a matu ningrum ningtau tam ya ai, num maga na ni gaw hpu bang ra ai, asak kaba wa yang shayi sha ni gaw karum shingtau n lu jaw ai majaw, nkau kanu kawa ni nga yang shayi sha ni hpe lit hku nna mu mada wa ma ai.

Na-in mare na gaida jan a shadang sha hpe asak bai jahkrung ya wa ai zawn, Ya-iru a shayi sha hpe mung asak jahkrung ya wa ai hpe yu yang, num ni a asak gaw la ni a asak zawn sha manu dan ai hpe Yesu madun dan wa ai. (Marku 5:​35, 41, 42; Luka 7:11-15) “Shi matsat ning tup machyi jahkrum nat kap ai numsha langai” hpe Yesu tsi tsi ya ngut ai hpang shi hpe “Abraham a shayi sha” ngu shaga wa ai. Dai ga si hpe Yuda ni a laili laika ni hta nmu na daram re. (Luka 13:10-16) Dai zawn tsawra myit hte hkungga ai hku tsun shaga ai hku nna, dai numsha mung kaga ni zawn sha ahkyak ai wa re ngu nna Yesu mu mada wa ai sha n-ga, shi a makam masham hpe mung hkap la ya wa ai.—Luka 19:9; Galati 3:7.

Yesu a sharin achyin ai lam ni gaw dai ni aten du hkra akyu rawng: “Shayi sha langai hpe bau maka ai gaw, htingbu wa a sun hpe hka jaw ya ai hte bung ai” ngu ai Asha Dan na ga malai langai nga ai. Hkristan kawa ni gaw dai zawn ga malai a shingkang ka-up n hkrum ai sha, tinang a kashu kasha yawng hpe maren mara lanu lahku ging ai. Hkristan kanu kawa ni gaw kashu kasha ni hpe jawng hpaji sharin ya nna, shanhte a hkamja lam hpe bau maka ya ra ai.

Num ni hpe Yesu kamhpa wa. Yuda tara rung ni hta, num ni a sakse ga hpe mayam langai a ga hku nna mu mada ma ai. Tsaban langai na labau sagawn hpaji du Jawsihpat ndai hku tsun wa ai: “Num ni a shingra masa a majaw shanhte hpe kamhpa n mai ai.”

Yesu chyawm gaw shi hkrung rawt wa sai hpe sakse madun na matu num ni hpe lata wa ai. (Mahte 28:1, 8-10) Dai zawn sadi dung ai num ni gaw Yesu sat hkrum ai, lup hta makoi mayang ai ni a myi mu sakse raitim, shanhte a ga hpe la ni n kam ya wa ma ai. (Mahte 27:55, 56, 61; Luka 24:10, 11) Raitim, hkrung rawt wa ai Yesu gaw num ni a shawng hta shawng nnan hkum shadan dan ai hku nna, shanhte hpe mung kaga sape ni zawn sha sakse hkam ging ai ni hku nna mu mada wa ai.—Kasa 1:8, 14.

Yesu a sharin achyin ai lam ni gaw dai ni aten du hkra akyu rawng: Yehowa Sakse ni a nawku hpung ni hta lit nga ai la ni gaw, num ni a mu mada lam ni hpe myit ya ai hku nna shanhte hpe madi shadaw ai lam madun ma ai. Madu wa ni mung shanhte a madu jan a ga ni hpe atsawm madat ya ai hku nna shanhte hpe “hkungga lara” ma ai.—1 Petru 3:7; Ningpawt 21:12.

Hkristu hpe la ni kasi la ai nga yang, num ni gaw Karai Kasang a madung yaw shada lam hte maren, hkungga lara ai lam hte lawt lu lam hpe hkamsha shangun ai. (Ningpawt 1:27, 28) La ni gaw num ni htan grau ai ngu ai ladu lai myit tsaw ai hpe Hkristan la ni gaw n madi shadaw ai sha, Chyum Laika npawt tara ni hpe hkan sa ai hku nna tinang a madu jan hpe ngwi pyaw shangun ai.—Ehpesu 5:28, 29.

Renila ngu ai numsha langai gaw Chyum Laika hkaja hpang ai aten hta, madu wa a gayat zingri ai lam hpe hkamsha wa ra ai. Shi a madu wa gaw tinang ra ai num hpe myit hkrum ai lam n nga ai sha, atik anang hkungran la nna roi rip ai grup-yin hta nga kaba wa ai wa re. “Chyum Laika kaw na chye na la wa ai lam ni a majaw, ngai grai n-gun lu mat ai. Ngai hpe tsawra ai, manu shadan ai, lanu lahku ai marai langai naw nga nga ai hpe ngai chye dat ai. Nye madu wa sha Chyum Laika hkaja na nga yang, nye ntsa myit galai shai mat na re ngu nna mung chye na dat ai” ngu nna Renila tsun dan ai. Hpang hta shi madu wa mung Chyum Laika hkaja na matu myit hkrum ai. Dai hpang, Yehowa Sakse hku nna hkalup hkam la ngut ai aten hta gaw, Renila myit dik mat ai. “Nye madu wa gaw myit hpe hkang lu wa ai. Langai hte langai mara raw chye hkra mung sharin la lu wa ai” ngu nna Renila tsun dan ai. Shi hpang jahtum tsun wa ai gaw hpa kun? “Nye a dinghku hta ngai gaw ahkyak ai wa, makawp maga hkrum ai wa ngu nna hkamsha lu wa hkra, Chyum Laika npawt tara ni gaw ngai hpe karum ya wa ai.”​—Kolose 3:13, 18, 19.

Renila a mahkrum madup gaw grai laklai ai gaw n re. Wan hku law ai Yehowa Sakse num ni gaw ngwi pyaw nga ma ai. Hpa majaw nga yang, shanhte hte arau shanhte a madu wa ni mung, Chyum Laika npawt tara ni hpe shakut nna hkan sa nga ai majaw re. Makam masham bung ai ni a lapran hta mung, hkungga lara ai lam, shalan shabran lam hte lawt lu lam ni hpe hkamsha lu nga ma ai.​—Yawhan 13:34, 35.

Shinggyim masha ni gaw sali wunli hku nna mara hpe lu da ai majaw, mara galaw hkrup chye ai hpe Hkristan num, la yawng hkap la da ma ai. Raitim, Yehowa Karai Kasang hte hkuhkau na matu shakut ai nga yang, mara nga ai masa kaw na “shalawt dat ai hkrum” nna, hkum tsup ai asak aprat hpe madu lu na lam shanhte kam ma ai. Dai gaw Karai Kasang a lanu lahku ya ai lam npu hta, num, la yawng lu la na myit mada lam re.​—Roma 8:20, 21.