Yukaring majan hte seng nna mying gumhkawng ai nawku htung ningbaw ni ndai hku tsun ai:

•   “Rasha Awtadok Church a ningbaw re ai Patrik Kire gaw, Rasha ni shang gasat ai lam hte seng nna, mara shagun ai ga n tsun ai. . . . Shi a Church gaw, Yukaring hte seng nna masu ga ni shabra ya ai. Putin gaw majan gasat ai hte seng nna, makawp maga na matu dai ga ni hpe lang nga ai.”​—EUobserver, March 7, 2022.

•   “Ndai majan gaw, yubak mara hpe gasat lu hkra shakut ai lam re ngu tsun ai hku nna, Patrik Kire gaw . . . Yukaring hpe Rasha ni shang gasat ai hpe hkap la wa ai.”​—AP News, March 8, 2022.

•   “Hakit mare kaw na Yukaring Awtadok Church a ningbaw re ai Epihpanet I gaw, Rasha hpyen la ni hpe sat ai gaw, mara n nga ai . . . ‘Rasha ni hpe gasat ra ai’ ngu tsun nna, shi masha ni hpe shaman ya wa ai.”​—Jerusalem Post, March 16, 2022.

•   “Anhte (UCCRO) [hte Ukrainian Council of Churches and Religious Organizations] gaw, Yukaring hpyen dap hpe madi shadaw ai. Anhte mungdan a matu gasat ya nga ai yawng hpe madi shadaw ai. Yukaring a hpyen ni hpe gasat ya nga ai yawng a matu anhte akyu hpyi ya ai. Shanhte a shakut shaja ai lam hpe shaman ya ga ai.”​—UCCRO a Statement, February 24, 2022.

 Nang gara hku shadu ai? Yesu a hpang hkan ai ngu tsun ai nawku htung ni gaw, hpung masha ni hpe majan de sa na matu n-gun jaw ging ai kun? Chyum Laika hta gara hku tsun da ai kun?

Nawku htung ni majan hta shang lawm wa ai labau

 Nawku htung ni gaw, simsa lam a matu shakut nga ninglen pyi, majan gasat ai hpe hkap la ai, majan gasat ai gaw tara rap ra ai, majan gasat ra ai ngu tsun ai hpe labau hta mu lu ai. Shaning ni laman, Yehowa Sakse ni gaw, dai zawn hpyi hpun ai nawku htung ni a lam hpe shapraw dan ai. Anhte a laili laika ni hta lawm ai lam nkau hpe yu yu ga.

•   Roman Kahtawlik Church ni gaw, Karai Kasang hte Hkristu mying a matu ngu tsun nna, masha wunawg wuwa hpe sat ai hta lit nga ai hpe “Hkrusit Majan (Crusades)​—‘Yawn Hpa Mabyin’” (Inglik) hta madun da ai.

•   Nawku htung ni gaw, myusha majan, amyu nawng sat ai majan ni hpe n jahkring wa ai mabyin hpe “Ahprika Kaw Na Kahtawlik Church” (Inglik) ngu ai hta madun da ai.

•   “Nawku Htung Ni A Mara Kun?” (Myen) “Majan Ni Hta Na Nawku Htung Ni A Daw” (Inglik) hte “Nawku Htung Ni Majan Hta Shang Lawm” (Inglik) ngu ai sumhpa ni hta, Kahtawlik, Awtadok, Protestin nawku htung ningbaw ni gaw, majan law law hta lahkawng maga hpe madi shadaw ya wa ai lam hpe sanglang da ai.

Hkristan nawku htung ni gaw majan hpe madi shadaw ging ai kun?

 Yesu sharin ya ai lam: “Na a htingbu wa hpe, na a hkum hte maren nang tsaw ra lu na ndai.” (Mahte 22:39) “Nanhte a hpyen ni hpe tsaw ra mu.”​—Mahte 5:44-47.

 Yesu tsun ai lam: “Nye a mungdan gaw ndai mungkan ga na n rai li ai; nye a mungdan ndai mungkan ga na re ai rai yang gaw, . . . nye a ali ama ni gasat na ma sai.” (Yawhan 18:36) “Nhtu hpe shaw ai ni yawng mayawng hte gaw, nhtu hte hten bya hkrum na ma ra ai.”​—Mahte 26:47-52.

 Myit yu ga: Hkristan ni gaw, Yesu hpe makawp maga na matu pyi n mai gasat ai nga yang, kaga lam ni a matu gasat ging ai kun? Shawng nnan na Yesu a sadi dung ai Hkristan ni a kasi ningli hte sharin achyin ai lam ni hpe chye na matu, “Hkristan Ni Gaw Hpyen Majan Hte Seng Ai Kun?” (Myen) ngu ai sumhpa hpe hti yu u.

Majan hpe n-gun jaw ai nawku htung ni hpa byin mat na kun?

 Yesu hpang hkan ai ngu hkrak tsun tim, shi a sharin achyin ai lam ni hpe n hkan sa ai nawku htung ni hpe Karai Kasang n hkap la ai lam Chyum Laika hta tsun da ai.​—Mahte 7:21-23; Titu 1:16.

•   “Ga ntsa e sat kau hkrum mahkrum ni” yawng a matu, dai zawn nawku htung ni hta lit nga ai ngu Karai Kasang mu mada ai lam hpe Shingran Laika hta tsun da ai. (Shingran 18:21, 24) Hpa majaw re ai hpe chye na matu, “Galu Kaba Ai Babelon Ngu Ai Gaw Hpa Rai Kun?” (Myen) ngu ai sumhpa hpe hti u.

•   N kaja ai asi si ai hpun hpe “kran daw kau nna wan hta kabai bang kau” ai zawn, nawku htung ni a n kaja ai amu bungli ni hpe Karai Kasang jahten kau ai hku nna, nawku htung yawng hpe nyet kau na ngu Yesu tsun ai. (Mahte 7:15-20) Dai zawn gara hku byin wa na hpe chye na matu, “Shut Shai Ai Nawku Htung Ni A N Kaja Ai Amu Bungli Ni Htum Mat Na Kun?” (Myen) ngu ai sumhpa hpe hti yu u.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images