Yehowa Sakse Ni gaw, lawu na lam ni a majaw majan hta n shang lawm ma ai.

1.   Karai Kasang hpe madat mara ai. Karai Kasang hpe nawku ai ni gaw, “nhtu ni hpe najawn, . . . dup kau na ma ra ai” “htawm hpang e hpyen majan sharin sa na, n rai” nga nna Chyum Laika hta tsun da ai.​—Esaia 2:4.

2.   Yesu hpe madat mara ai. Kasa Petru hpe Yesu ndai hku tsun ai: “Na a nhtu hpe de a shara e bang da u; nhtu hpe shaw ai ni yawng mayawng hte gaw, nhtu hte hten bya hkrum na ma ra ai.” (Mahte 26:52) Shi a sape ni gaw, hpyen laknak ni lang na n re ai hpe ndai ga ni hte Yesu tsun wa ai.

    Yesu a sape ni gaw, mung masa lam hta tsep kawp n shang lawm ai. Dai gaw “mungkan ga hte n seng” na matu tsun da ai, Yesu a ga hpe madat ai lam re. (Yawhan 17:14, Kabu Gara Shiga Chyum Laika) Shanhte gaw, hpyen amu gun ai (sh) hpyen la galaw mayu ai ni hpe pat shingdang ai lam n galaw ai.

3.   Kaga masha ni hpe tsawra ai. Yesu gaw “shada da tsaw ra nga mu” ngu shi a sape ni hpe htet da ai. (Yawhan 13:34, 35) Yesu a sape ni gaw, mungkan grup hpunau nauna ni re ai majaw, shada da gasat ai majan ni hta galoi mung shang lawm na n re.​—1 Yawhan 3:10-12.

4.   Moi na hkristan ni a kasi hpe hkan sa ai. Encyclopedia of Religion and War ngu ai laika buk hta ndai hku tsun da ai: “Yesu a shawng n nan na sape ni gaw, hpyen gasat na matu hte hpyen amu gun ai lam n galaw wa ma ai.” Hpa majaw nga yang, ndai gaw “Yesu a tsawra myit hte hpyen wa hpe tsawra u ngu ai shi a ga hte nhtan shai ai majaw re.” Yesu a moi na sape ni gaw, “hkristan hte hpyen la galaw ai gaw, tsep kawp nhtap htuk ai ngu, hkam la ma ai” ngu nna, German chyum hpaji du Pita Minho tsun ai.

 Yehowa Sakse Ni gaw, mung shawa hpe akyu jaw ai ni re. Shanhte nga ai mungdan a, shim lum lam hpe dingbai dingna n jaw ai. Lawu hta lawm ai, Chyum Laika matsun ni hte maren, asuya a daru magam hpe ta npu hkam ai:

•   “Daru magam ahkang aya lu ai ni a npu e a taw nga mu ga.”​—Roma 13:1.

•   “Kehta hte seng ai hpe gaw, Kehta hpe ya mu; Karai Kasang hte seng ai hpe mung, Karai Kasang hpe ya mu.”​—Mahte 22:21.

 Dai majaw, anhte gaw mungdan a upadi hpe madat mara ai. Ahkun hkanse ni hpe mung jaw ai. Mung shawa a akyu matu asuya galaw ai lam ni hta jawm galaw ai.