Chyum Laika a lam matsun ni hte tara ni gaw, Karai Kasang ra sharawng ai hku daw dan lu hkra karum ya nna tinang a matu mung akyu nga ai ngu Yehowa Sakse ni kam ma ai. (Esaia 48:17, 18) Dai majaw, dai tara ni hpe anhte hkan sa ai. Sumtsaw shada hkrum hkat ai hte seng nna lam matsun nkau mi hpe yu yu ga. a

•   Hkungran ai gaw prat tup arau nga na ngu ai lachyum re. (Mahte 19:6) Yehowa Sakse Ni gaw sumtsaw shada hkrum hkat ai hpe, ahkyak ai lam langai hku mu mada ai. Hpa majaw nga yang, dai gaw dinghku de na matu, nnan hpang ai hte bung ai majaw re.

•   Dinghku de na matu asak aprat ram sai ni sha, hkrum hkat ging ai. Shanhte gaw “ram prat lai wa” ai ni rai ra ai. Shing n rai, hkum shan myit marin htum, aten hpe lai wa sai ni rai ra ai.​—1 Korinhtu 7:36.

•   Hkrum hkat ai ni gaw, ningrum ningtau n nga ai ni rai ra ai. Raitim, hka da ai ni gaw gara hku kun? Chyum Laika hta hpye ai amu galaw yang sha hka na matu mai ai ngu tsun da ai. Dai majaw, nkau mi gaw tara shang hka da tim, dinghku bai de na matu Karai Kasang a man hta n mai ai ni re.​—Mahte 19:9.

•   Dinghku de mayu ai Hkristan ni gaw makam masham bung ai shada da sha mai la ai ngu Chyum Laika hta matsun da ai. (1 Korinhtu 7:39) Makam masham bung ai, ngu ai gaw, hkalup hkam ngut sai Yehowa Sakse langai hpe tsun mayu ai re ngu hkam la ai. (2 Korinhtu 6:14) Makam masham bung ai shada sha dinghku de u ngu, Karai Kasang gaw shi a mayam ni hpe, lam matsun jaw wa ai. (Ningpawt Ninghpang 24:3; Malahki 2:11) Ndai matsun ga gaw, kaja wa hkrak ai ngu, dai ni aten na dinghku hpaji sara ni tam mu ma ai. b

•   Ma ni gaw Kanu yan Kawa a ga hpe madat ra ai. (Ga Shagawp 1:8; Kolose 3:20) Dai majaw, nta hta naw nga ai ma ni gaw, sumtsaw tawn na hte seng nna Kanu yan Kawa a ga hpe madat ra ai. Dai hta, ma ni a asak kade rai yang she sumtsaw tawn na, hpa ni hpe gaw koi ra na ngu ai lam matsun ni lawm ai.

•   Yehowa Sakse ni gaw, sumtsaw shada hkrum hkat ai hte seng wa yang, Chyum Laika lam matsun hta madung nna tinang nan sha dawdan ai. Dai hku dawdan ai gaw, ‘langai hte langai tinang a lit gun hpai shajang na rai nga ai’ ngu ai Chyum daw hpe hkan sa ai re. (Galati 6:5) Raitim, sumtsaw shada hkrum hkat na hte seng nna hpaji lu na matu gaw, shanhte a akyu hpe ra sharawng ai kunghpan ai hkristan ni kaw na karum hpyi ma ai.​—Ga Shagawp 1:5.

•   Sumtsaw shada hkrum hkat ai shaloi galaw ai lailen nkau mi gaw mara kaba byin chye ai. Ga shadawn, Hpye ai amu hpe koi na matu Chyum Laika hta matsun da ai. Dai matsun ga hta n hkungran shi ai yan hkum shan kanawn ai, kaga masha a gindai hpe masawp nna hkum shan myit sharawt ai, n-gup hte hpye ai amu galaw ai (oral sex), maidang hku hte hpye ai amu galaw ai (anal sex) ni lawm ai. (1 Korinhtu 6:9-11) Hpye ai amu galaw ai gaw n raitim, n hkungran shi ai shaloi hkum shan myit rawt wa hkra galaw ai gaw Karai Kasang nju ai “n san n seng” ai lailen re. (Galati 5:19-21) Hkum shan myit hte seng nna shada da tsun hkat ai mung “matsat shabat ga”[NW] tsun ai hta lawm nna, Chyum Laika hta dai hpe koi na matu tsun da ai.​—Kolose 3:8.

•   Myit masin gaw, grai n hkru ai. (Yeremia 17:9) Shut ai ngu tinang chye da ai lam hpe pyi, galaw shangun wa chye ai. Sumtsaw shada hkrum hkat ai shaloi n kaja ai lailen ni hpe koi lu na matu, kadai mung n nga ai shara de n sa gin ai. Hkrum hkat ai ni gaw masha mu lu ai shara hta hkrum hkat ai (sh) manang langai ngai hpe shaga sa mai ai. Dai hku galaw nna, n kaja ai lailen ni n galaw hkrup hkra tau hkrau makawp maga mai ai. (Ga Shagawp 28:26) Dinghku n de shi ai Hkristan ni gaw, online hta Ningrum ningtau tam nna hkrum hkat na nga yang shoi hpa nga ai. Grau nna gaw, kaga masha a lam atsawm n chye ai sha hpyi hpun ai ni hte tsaw myit sumri git hkang mat chye ai.​—Shakawn Kungdawn 26:4.