Mbivilia yaĩtye kana tũyaĩle kũya nthakame. Kwoou tũyĩtĩkĩlaa nthakame yĩ nima, kana ila ilungu inya nene sya nthakame, twĩthĩwe twĩnewa ta lĩu, kana kwĩkĩwa mĩkivanĩ. Kwasũanĩĩa maandĩko aa maatĩĩe:

•   Mwambĩlĩlyo 9:4. Ngai nĩweetĩkĩlilye Noa na mũsyĩ wake maĩsae nyama ĩtina wa ĩla mbua ya kĩwʼũ kingĩ, ĩndĩ amea maikaaye nthakame. Ngai eeie Noa atĩĩ: “Nyama ĩ na thayũ wayo, nĩwʼo nthakame yayo, mũtikaye.” Mwĩao ũsu waaĩlĩte kũatĩĩwa nĩ andũ onthe nũndũ onthe nĩ ũsyao wa Noa.

•   Alivai 17:14. “Mũtikaye nthakame ya nyama o na yĩva yonthe, nũndũ thayũ wa mĩĩ yonthe nĩ nthakame yayo: o ũla wĩmĩya akavetwe.” Ngai oonaa thayũ wa kĩndũ wĩ nthakamenĩ yakyo, na wĩ wake. O na kũtwʼĩka mwĩao ũsu wanengiwe mbaĩ ya Isilaeli, wĩonanyʼa ũndũ Ngai wonaa wĩ ũndũ mũito mũndũ kũya nthakame.

•   Meko ma Atũmwa 15:20. ‘Ĩvathanei na nthakame.’ Ngai anengie Aklĩsto mwĩao o ũla wanengete Noa. Isitoli yonanĩtye kana Aklĩsto ma ĩvinda ya atũmwa mayeetĩkĩlaa kũya nthakame, kana kũmĩtũmĩa maũndũnĩ ma ũiiti.

Nĩkĩ Ngai ũtũnengete mwĩao wa kwĩvathana na nthakame?

 Ve na ũĩkĩĩthyo mũseo kuma kwa ala masomeete maũndũ ma ũiiti ũkwonanyʼa kana kwĩkĩwa nthakame no kũtume mũndũ akwatwa nĩ mathĩna ma mwĩĩ. Ĩndĩ ũndũ ũla wa vata nĩ kana Ngai endaa twĩvathane na nthakame nũndũ kĩla nthakame yonanasya nĩ kya vata mũno kwake.—Ali. 17:11; Ako. 1:20.