Mbivilia ĩwetete ĩũlũ wa kwĩvana mwĩĩ o vandũ vamwe ĩandĩkonĩ ya Alivai 19:28, vala Aisilaeli meeiwe kana mayaaĩlĩte ‘kwĩvana ũvano mĩĩnĩ yoo.’ Ngai anengie mbaĩ ya Isilaeli mwĩao ũsu, nĩ kana amavathũkanyʼe na andũ ala mamathyũlũlũkĩte ala mavanaa mĩĩ yoo na masyĩtwa kana na movano ma ngai syoo. (Kũtũngĩlĩlwa Kwa Mĩao 14:2) O na kũtwʼĩka Aklĩsto mai ungu wa mĩao ĩsu yanengetwe mbaĩ ya Isilaeli, nũseo kũsũanĩa kwa ũliku mwolooto ũla watumie Yeova aumya mwĩao ũsu.

Yo Mũklĩsto nĩwaĩle kwĩkĩwa movano kana kũsolwa mwĩĩnĩ wake?

 Mĩsoa ĩno ĩatĩĩe ya Mbivilia nĩtonya kũũtetheesya kũsũngĩa ĩkũlyo yĩu:

•   Aka “meyanakavye . . . na kĩlĩko.” (1 Timotheo 2:9) Mwolooto ũsu waĩle kũatĩĩwa nĩ aũme na aka. Twaĩlĩte kũnenga ala angĩ ndaĩa kwa kũsũanĩa ũndũ mekwĩwʼa vandũ va kwĩsũanĩa ithyĩ ene.

•   Andũ amwe mevanaa mwĩĩnĩ nĩ kana mamanyĩke na ũvano ũsu, namo angĩ mekaa ũu nĩ kana monanyʼe maĩlĩte kwĩkana na mwĩĩ woo ũndũ mekwenda. Ĩndĩ Mbivilia yĩkĩaa Aklĩsto vinya atĩĩ: “mwĩnengane mĩĩ yenyu ĩthĩwe nthembo ĩ thayũ, ntheu, ya kũmwendeesya Ngai, nawʼo nĩ ũthaithi wenyu waĩlaa [mũtũmĩĩte ũtonyi wenyu wa kũsũanĩa, New world Translation].” (Alomi 12:1) Tũmĩa ‘ũtonyi waku wa kũsũanĩa’ ũmanye nĩkĩ ũkwenda kwĩvana mwĩĩnĩ. Ethĩwa wĩenda kũatĩĩa mũtindo mũna wĩkwʼo, kana kwonanyʼa wĩ wa kĩkundi kĩna, lilikana kana no wĩse kũalyũla woni waku, ĩndĩ ũvano ũsu ndũtonya kuma. Kũsũanĩa kĩtumi kyaku kya kwĩvana no kũtume wĩka ũtwi mũseo.—Nthimo 4:7.

•   “Mosũanĩo ma ala athingu maelete wingĩnĩ wa syĩndũ; Ĩndĩ kĩla mũndũ ũla wĩkalaataa ekalaataa kũvika akaĩwe tũ.” (Nthimo 21:5). Ũtwi wa kwĩvana mwĩĩnĩ mavinda maingĩ wĩkawa nĩ mũndũ ekalaatĩte kana atanamba kũsũanĩa, ĩndĩ no wanange ngwatanĩo ya mũndũ na andũ, na ũkamwanangĩa wĩa. O na ĩngĩ, kumya movano asu nĩ mbesa mbingĩ, na kwĩ woo mwingĩ. Ũkunĩkĩli, vamwe na viasala ya kumya movano asu mwĩĩnĩ, sionanyʼa kana andũ aingĩ ala mevanĩte mĩĩnĩ, ĩtina mesaa kwĩlila nũndũ wa ũtwi ũsu meekie.