Ĩĩ, akasũngĩa. Mbivilia vamwe na maũndũ angĩ monekete sionanyʼa kana Ngai nũsũngĩaa mboya. Mbivilia yaĩtye: “Akeanĩsya kwenda kwa ala mamũkĩaa; O na akeewʼa kũkaya kwoo, na kũmatangĩĩa.” (Savuli 145:19) Ĩndĩ, nĩ kana Ngai asũngĩe mboya syaku no nginya wĩke maũndũ mana.

Nĩ kyaũ Ngai wendaa ala meũmũvoya meke?

•   Endaa mamũvoye we, ĩndĩ ti Yesũ, Malia, atheu, alaĩka, kana mĩvwʼanano. Yeova e weka nĩ we “Ũla wĩwʼaa mboya.”​—Savuli 65:2.

•   Endaa mamũvoye kwosana na kwenda kwake, na myolooto ĩla yĩ nthĩnĩ wa Mbivilia.​—1 Yoana 5:14.

•   Endaa monanyʼe nĩmesĩ ũkũmũ wa Yesũ kwa kũvoya kwĩsĩla kwake. Yesũ aisye: “Vai mũndũ wũkaa kwa Asa, atesĩle kwakwa.”​—Yoana 14:6.

•   Endaa mavoye na mũĩkĩĩo, na ethĩwa mai na mũĩkĩĩo maivoya manengwe.​—Mathayo 21:22; Luka 17:5.

•   Endaa methĩwe me auu na maneenaa ũla wʼo. Mbivilia yaasya: “Yeova e ĩũlũ, no wonaa ala enyivya.”​—Savuli 138:6.

•   Endaa mavoye mate kũnoa. Yesũ aisye: “Endeeai kũvoya, na mũkanengwa.”​—Luka 11:9, New World Translation.

Kĩla Ngai ũtasiasya

•   Mbaĩ ya mũndũ kana vala wumĩte. “Ngai ti mwendeesya wa andũ; ĩndĩ mbaĩnĩ syonthe ũla ũmũkĩaa we, na kwĩka ũlũngalu, nĩwĩtĩkĩlawa nĩwe.”​—Meko ma Atũmwa 10:34, 35.

•   Ũndũ mũndũ ũkũvoya ailyĩ. No ũmũvoye Ngai ũilyĩ nthĩ, ũkumenyʼe mũtwe, ũtulĩtye ndu, kana ũũngeme.​—1 Mavinda 17:16; Neemia 8:6; Ndanieli 6:10; Maliko 11:25.

•   Ndasiasya wĩvoya na wasya kana ũkilĩtye. Yeova nũsũngĩaa mboya o na ila mũndũ wavoya akilĩtye.​—Neemia 2:1-6.

•   Ndasiasya ũnene wa vata waku. Ngai atwĩĩte ‘tũmwiĩe kwĩmakĩa kwitũ kwʼonthe, nũndũ nĩwe ũtũsũvĩaa.’​—1 Vetelo 5:7.