Ve ĩvinda yĩmwe andũ ma saenzi masũanĩaa kana kasevela (kamũnywʼa malaa) katũmĩaa ũĩmĩ wako kũkusya mũloo malaanĩ katũmĩĩte vinya mũna ũla ũtumaa syĩndũ ta kĩwʼũ syambata tũmĩvaivonĩ tũtheke. Ĩndĩ o mĩtũkĩ, andũ ma saenzi nĩmanamanyie kana kasũni kau katũmĩaa nzĩa ĩngĩ nzeango ya kũtava mũloo (fluid trap).

 Kwasũanĩa ũndũ ũũ: Yĩla ũĩmĩ wa kasevela walika mũloonĩ, nĩwĩyĩaanasya ũkaseũvya mĩthya ĩlĩ. Vala kĩla mũthya ũthelele, vethĩawa na kaindo kailye mũtaũ. Tũindo tũu twĩthĩawa twĩvingĩte. Yĩla mĩthya ĩsu yalika mũloonĩ, tũindo tũu nĩtwĩvingũaa, na ĩla mĩthya ĩlĩ ya ũĩmĩ ĩkekũnzũa. Kĩu kĩtumaa kasũni kau katava mũloo, vandũ va kũũkusya. Yĩla kasevela katũnga ũĩmĩ wako, mĩthya ĩsu nĩyĩvingaa na mũloo ũivinganĩwʼa nthĩnĩ.

 Alejandro Rico-Guevara, Tai-Hsi Fan, na Margaret Rubega, ala mekaa ũkunĩkĩli, maĩtye kana kasevela no keke maũndũ asu onthe kwa ĩvinda yĩ “ĩtheo wa nusu sekendi.” Masyokete makasya atĩĩ: “Mũthya wa ũĩmĩ wako nĩ ta masinĩ yĩ vinya ya kũtava kĩwʼũ ĩla ĩalyũlaa . . . wũmbo wayo na mĩtũkĩ yĩla ĩkũlika na kuma syĩndũnĩ ta kĩwʼũ.”

 O na ĩngĩ, kasũni kau kanini kaitũmĩaa vinya wako kayĩka ũu. Vandũ va ũu, mĩthya ya ũĩmĩ wako yĩkũnzũaa na ĩyĩvinga nũndũ wa vinya mũna wa mwanya ũla ũthũkũmaa nthĩnĩ wayo yĩla ĩendeee kũlika na kuma mũloonĩ.

 Nĩkwĩthĩwa ũĩmĩ wa kasevela nũtonya kũtava nesa mũloo ũla wĩ malaanĩ, ala mekaa ũkunĩkĩli masũanĩaa kana no maatĩĩe maũndũ ala meĩmanyĩsya kumana na ũndũ ũsu maũndũnĩ makonetye ndawa, robots, na maũndũnĩ angĩ. O na ĩngĩ, nzĩa ĩsu no ĩtũmĩwe kũseũvya mĩio ya kũthesya syĩndũ ila syetĩka kana mauta ala metĩka.

 We wĩona ata? Ũĩmĩ wa kasevela ũla ũseũvĩtwʼe kwa nzĩa ya mwanya mũno weekie kwĩyumĩlya? Kana ve ũla woombie?