Ĩĩ. Ngũsĩ sya Yeova niĩkĩĩaa kana ũandĩko wʼonthe wĩ Mbivilianĩ “nĩwaveveewe nĩ Ngai, nawʼo nĩwaĩle.” (2 Timotheo 3:​16) Ũandĩko ũsu mũveveee nĩ maandĩko onthe nthĩnĩ wa Ũtianĩo Mũkũũ na Ũtianĩo Mweũ. O na kau andũ aingĩ matũmĩaa ndeto “Ũtianĩo Mũkũũ” na “Ũtianĩo Mweũ,” Ngũsĩ sya Yeova syĩtaa ilungu isu ilĩ “Maandĩko ma Kĩevelania” na “Maandĩko ma Kĩkiliki ma Kĩklĩsto.” Tũsyĩtaa ũu nĩ kana wĩthĩe mũndũ ndanona ta ve kĩlungu kĩmwe kya Mbivilia kyavĩtiwe nĩ ĩvinda kana ta kĩtesa kũtũtethya ũmũnthĩ.

 Mũtũmwa Vaulo, ũla waĩ Mũklĩsto, nĩwaveveewe aandĩka atĩĩ: “Maũndũ o na meva ala mambie kũandĩkwa, nĩmaandĩkiwe nũndũ wa kũtũmanyĩasya.” (Alomi 15:4) Kwoou, Maandĩko ma Kĩevelania me na ũvoo wa vata mũno ũtonya kũtũtethya. Maandĩko asu nĩmatũnengete motao matwaĩle na makatũtavya maũndũ meekĩkie tene matonya kũtũtethya. Na ti ũu wĩ wʼoka, ve maũndũ angĩ maingĩ.

•   Maũndũ meekĩkie tene matonya kũtũtethya. Maandĩko ma Kĩevelania nĩmawetete nesa ũndũ syĩndũ syoombiwe na ũndũ mũndũ walikile naĩnĩ. Takethĩwa maandĩko asu mai vo, tũyĩsa kũkwata mosũngĩo ma makũlyo ta: Twaumie va? Nĩkĩ andũ makusaa? (Mwambĩlĩlyo 2:7, 17) O na eka ũu, Maandĩko ma Kĩevelania nĩmawetete ũndũ Yeova Ngai weekanaa na andũ, na andũ asu mailyĩ o taku na maĩ na mathĩna o taku.​—Yakovo 5:​17.

•   Motao matwaĩle. Ĩvuku ya Nthimo na ya Mũtavanʼya me na motao matakesa kũvĩtwa nĩ ĩvinda. Mavuku asu elĩ me nthĩnĩ wa Maandĩko ma Kĩevelania. Kwa ngelekanyʼo, nĩmatũtavasya ũndũ mĩsyĩ yitũ ĩtonya kwĩkala nesa (Nthimo 15:17), ũndũ tũtonya kũtanĩa wĩa ũla tũtethasya (Nthimo 10:4; Mũtavanʼya 4:6), na ũndũ amũika matonya kwĩka makekalaa me atanu (Mũtavanʼya 11:9–12:1).

 O na ĩngĩ, kwĩmanyĩsya ĩũlũ wa ĩla Mĩao ya Mose no kũtũtethye. Mĩao ĩsu yĩ nthĩnĩ wa Torah (ala mavuku atano ma mbee Mbivilianĩ). O na kau Aklĩsto mayovetwe nĩ Mĩao ya Mose, mĩao ĩsu yĩ na maũndũ ma vata matonya kũtũtetheesya twĩkale nesa.​—Alivai 19:18; Kũtũngĩlĩlwa Kwa Mĩao 6:​5-7.