Nĩkĩ Ngũsĩ sya Yeova Itatanĩaa Kĩlisimasi?

THAŨKA

Maũndũ mate ma wʼo ala mawetangawa nĩ andũ

Ũndũ ũte wa wʼo: Ngũsĩ sya Yeova iitanĩaa Kĩlisimasi nũndũ iimũĩkĩĩaa Yesũ.

Ũwʼo: Twĩ Aklĩsto. Tũĩkĩĩaa kana vai ũtangĩĩo ate o kwĩsĩla Yesũ Klĩsto e weka.—Meko ma Atũmwa 4:12.

Ũndũ ũte wa wʼo: Nĩtwaanasya mĩsyĩ kwa kũmanyĩsya amwe nthĩnĩ wa mũsyĩ kana mayaĩle kũtanĩa Kĩlisimasi.

Ũwʼo: Tũthĩnĩkĩaa mĩsyĩ mũno, na tũtũmĩaa Mbivilia kũtetheesya ala me nthĩnĩ wa mĩsyĩ methĩwe na ngwatanĩo ndũmu.

Ũndũ ũte wa wʼo: Mũitanĩaa maũndũ ala andũ mendete kwĩka ĩvinda ya Kĩlisimasi ta kwonanyʼa ũlau, kwenda kwĩthĩwe mũuo ĩũlũ wa nthĩ, na kwĩka andũ nesa.

Ũwʼo: Tũtataa mũno kwĩthĩwa alau na kwĩthĩwa andũ ma mũuo kĩla mũthenya. (Nthimo 11:25; Alomi 12:18) Kwa ngelekanyʼo, twĩkaa maũmbano maitũ na kũtavanyʼa tũatĩĩe ũtao ũũ wa Yesũ: “Nĩmwosete mana, nenganai mana.” (Mathayo 10:8) O na ĩngĩ, tũtavasya andũ kana Ũsumbĩ wa Ngai nowʼo ũtonya kũete mũuo wa wʼo ĩũlũ wa nthĩ.—Mathayo 10:7.

Nĩkĩ Ngũsĩ sya Yeova itatanĩaa Kĩlisimasi?

Yesũ eeaĩie aatĩĩi make malilikanae kĩkwʼũ kyake, ĩndĩ ti mũthenya wa kũsyawa kwake.—Luka 22:19, 20.
Atũmwa ma Yesũ na amanyĩwʼa ma ĩvinda ya tene mayatanĩaa Kĩlisimasi. Ĩvuku yĩtawa New Catholic Encyclopedia yaĩtye kana “sikũkũ ya kũtanĩa kũsyawa kwa Yesũ yaambĩĩiwʼe ĩtina wa mwaka wa 243 [Yesũ aminĩte kũsyawa],” na myaka 100 yaĩ mbĩtu kuma mũtũmwa wa mũthya akwʼa.
Vai ũndũ ũtonya kũĩkĩĩthya kana Yesũ asyaiwe matukũ 25, Mwei wa 12. O na mũthenya wake wa kũsyawa ndũandĩkĩtwe Mbivilianĩ.
Tũĩkĩĩaa kana kũtanĩa Kĩlisimasi ti ũndũ ũtonya kwĩtĩkĩlwa nĩ Ngai nũndũ nĩ sikũkũ yumanĩte na syĩthĩo sya andũ matamũthaithaa Ngai.—2 Akolintho 6:17.

Yo kũtanĩa Kĩlisimasi nĩ ũndũ waĩle kwoswa kwa ũito?

Andũ aingĩ nĩmatanĩaa Kĩlisimasi o na kau nĩmesĩ kana yumanĩte na andũ matamũthaithaa Ngai na kana Mbivilia ndĩkwataa mbau sikũkũ ĩsu. Ala mekaa ũu no mekũlye atĩĩ: No nginya Aklĩsto makatwʼa kwĩka kĩvathũkanyʼo na andũ ala angĩ? Kũtanĩa Kĩlisimasi nĩ ũndũ waĩle kwoswa kwa ũito?

Mbivilia ĩtwĩkĩaa vinya tũsũanĩe maũndũ ala tũkwenda kwĩka, na ‘tũyĩoasya maũndũ onthe.’ (1 Athesalonika 5:21) Ĩtũmanyĩasya kana nĩtwaĩle kwona ũwʼo wĩ wa vata. (Yoana 4:23, 24) O na kau tũyendaa andũ maitwosa naĩ, tũatĩĩaa myolooto ya Mbivilia o na ethĩwa ũu wĩtuma twoneka twĩ kĩvathũkanyʼo na andũ ala angĩ.

O na kau ithyĩ nĩtũnyuvaa kũlea kũtanĩa Kĩlisimasi, nĩtũnengae ndaĩa ũthasyo wa ala angĩ wa kwĩnyuvĩa kĩla maĩle kwĩka. Tũilikĩlĩĩlaa maũndũ ala angĩ mekwĩka ĩvindanĩ yĩla mekũtanĩa Kĩlisimasi.