Nasyaĩwe taoninĩ nene ya Canada yĩtawa Montreal, ĩla yĩ kĩsionĩ kĩnene kya Quebec. Nyie na ala nĩsyaanĩw’e namo twaeiwe nĩ asyai matwendete, na tweanĩe ũtũinĩ wĩtawa Rosemont. Twekalanasya nesa na tũuĩtye twĩ vamwe.

Nĩnendete Mbivilia nĩ mũnini. Nĩngũlilikana nĩ wa myaka 12 ngĩsoma ĩũlũ wa Yesũ nthĩnĩ wa Ũtianĩo Mweũ. Natanĩie mũno ngewa yake. Na nĩneewie naĩle kwenda ala angĩ na kũmew’ĩaa ĩnee o take. Ĩndĩ yĩsilya yĩu yaendie o yũlĩte o ũndũ naendeeie kwĩana nũndũ wa kũtindany’a na andũ mate aseo.

Tata akũnaa wathi aitũmĩa mũio ũkwenda kwĩkala soo wĩtawa saxophone. Nĩwandiĩe mũio ũsu, o na angwatya wendi mwingĩ wa kũkũna wathi. Vai kĩndũ kĩngĩ nesie kwenda ta wathi. Nũndũ wa ũu, nĩneemanyĩisye kũkũna ngitaa. O na nĩnakwatanie na aũme angĩ kauta twaĩ ndũũ twaseũvya mbandi ya kũkũna wathi. Nĩtwakũnĩie andũ wathi mavinda meana ũna. Kĩu nĩkyatumie nĩmanyĩka nĩ andũ amwe me nguma ya kumĩthya wathi, na mangũlya kana no nende kũthũkũma namo. Nĩneetĩkĩlanile na kambunĩ ĩmwe nene ya kumĩthya wathi tũthũkũmane. Andũ nĩmendie mbathi syakwa mũno, na wĩ Quebec ndwaleaa kũsyĩw’a sinĩte letiũnĩ.

Noonekaa ta naĩ na kyonthe kĩla nendaa. Nĩasya ũu nũndũ naĩ o wa mũika, ĩndĩ naĩ nguma, na natethasya wĩa ũla nendete na wandeteaa mbesa mbingĩ. Mũthenya naendaa kũla kwĩkĩawa masoesi ma mwĩĩ (gym), ngethĩwa na ilungu sya kũkũlw’a makũlyo nĩ ala manyaĩĩkasya maũvoo, ngetwa kũndũ nĩthi kwĩkĩĩa andũ saii wakwa kũla mekwenda, na ngonanw’a televiseninĩ. Nayo ũtukũ naendaa kũkũnĩa andũ wathi na kwĩtanĩthya. Ĩndĩ nĩ kana nĩvote kumĩla andũnĩ ndeũkĩa, nĩnambĩĩe kũnyw’a mũno nĩ o mũnini, na mũthya nesa kwĩthĩa nambĩĩe kũtũmĩa ndawa sya kũmila. O na ndyamakaw’a nĩ maũndũ na naĩ na mwĩkalĩle mũthũku.

Amwe nĩmambĩw’ĩaa kĩwĩu nũndũ moonaa ta nĩ mũtanu. Ĩndĩ ngoonĩ neew’aa nĩ vathei vyũ, na mũno mũno yĩla nĩ weka. Neew’aa nĩkw’ĩte ngoo na naĩ na kĩmako kingĩ. Na kũthũkya ũvoo, yĩla maũndũ makwa maendeee nesa vyũ nĩw’o aũme elĩ katĩ wa ala maumĩthasya mbathi syakwa moowaiwe nĩ UKIMWI. Natelemile mũno! O na kau nĩnendete wathi, neew’aa naĩ mũno nasũanĩa mĩkanĩlye ĩla akũni ma wathi meethĩawa nayo.

O na kau naendeee nesa kĩ-mwĩĩ, nĩneene nthĩ yĩ na thĩna mũnene mũno wĩ vandũ. Neekũlasya nĩkĩ kũte ũsili wa katĩ o na vanini. Na naseng’aw’a mũno nĩ Ngai nũndũ ndyoonaa ayosa ĩtambya o na yĩmwe. O na kaingĩ nĩnamũkũlasya andetheesye kũkwata mosũngĩo. Ĩvinda yĩmwe ĩtina wa kũkũna wathi kũndũ kwĩana ũna nĩnoosie mwanya nĩthyũmũe, na nambĩĩa kũsoma Mbivilia ĩngĩ. O na kũtw’ĩka ndyaakwatya maũndũ maingĩ, kĩla nakwatisye nĩ kana nthĩ yĩ vakuvĩ kũthela.

Nĩnasomie vandũ vamwe Mbivilianĩ kana ve ĩvinda Yesũ watĩĩe kũya mĩthenya 40 e weũnĩ. (Mathayo 4:1, 2) Nĩvo nasũanĩie tene ngeka o take-ĩ, we Ngai tyo ambony’e nĩwe ũũ? Nĩnavanie matukũ ala ngwambĩĩa kũtĩĩa kũya. Ĩndĩ syumwa ilĩ itiele, aũme elĩ, Ngũsĩ sya Yeova, nĩmakũnangie mũomo wakwa, na namathokya nesa ta twĩĩ kyathĩ. Ũmwe eetawa Jacques. Namũketeeie na namũkũlya, “Tũtonya kũmanya ata tũtwĩe mĩthenyanĩ ya mũminũkĩlyo ya nthĩ ĩno?” Avuie Mbivilia yake na anzomea ĩandĩko ya 2 Timotheo 3:1-5. Namakũlilye makũlyo angĩ mate ĩsavu, na nĩnatanie kwĩw’a mosũngĩo moo. Maumĩte Maandĩkonĩ, moosanĩte na kĩlĩko, na nĩmatumie nĩanĩwa. Ĩtina wa mo kũka kwakwa mavinda kauta, nĩneethĩie o na vai vata wa kũtĩĩa kũya.

Nĩneekie mũvango mũseo wa kwĩmanyĩsya na Ngũsĩ. Nũndũ wa ũu, nĩnesie kwenza nzw’ĩĩ yakwa nũndũ yaĩ ndaasa mũno, na nambĩĩa kũthi maũmbanonĩ ma ũthaithi Nyũmbanĩ ya Ũsumbĩ ndeũtĩĩa. Nũndũ nĩmanthokisye nesa, kĩu nĩkyandĩkĩĩthisye vyũ kana yu nĩngwatie ũw’o.

Vate nzika, nĩnaaĩlĩte kwĩka moalyũku manene nĩ kana nonany’e nĩngũatĩĩa kĩla ngwĩmanyĩsya Mbivilianĩ. Mbee, naaĩle kwĩkya ndawa sya kũmila ĩtheka, na ngĩekana na mwĩkalĩle mũthũku. O na nĩnaaĩle kũtata nĩeke kwĩyenda mũno, na ndyambĩĩa kũthĩnĩkĩaa ala angĩ. O na kau ndyaĩ na kĩveti, naĩ na syana ilĩ, na kwoou nĩnaaĩle kwambĩĩa kwĩmanyĩsya kũithĩnĩkĩa na kũimanyĩsya ĩũlũ wa Ngai. Kwoou nĩnakolile wĩa wakwa wa kũkũna wathi na namantha wĩa ũtaĩvaa mũno vandũ kambunĩnĩ.

Kwĩka moalyũku asu kũyaĩ laisi. Nĩnambĩĩie kũthĩnw’a nĩ mwĩĩ nũndũ wa kũekana na ndawa sya kũmila, na mavinda amwe neethĩaa nĩsyokeie ĩngĩ ndawa isu. (Alomi 7:19, 21-24) Kĩndũ kĩngĩ kyaĩ vinya mũno nĩ kũekana na mwĩkalĩle mũthũku. O na wĩa ũla naandĩkĩtwe waĩ mĩnoo ki, na neew’aa naĩ mũno nasisya tũvesa tũla ngũkwata. Nakuie myei ĩtatũ ndyĩsa kũkwata mbesa ianene na ila nakwataa tene nakũna wathi o masaa elĩ.

Kũvoya nĩkwanengie vinya wa kũendeea kwĩka maendeeo ndeũnoa. O na kũsoma Mbivilia ndeũtĩĩa nĩkwandethisye mũno. Ve maandĩko kauta mambĩkĩie vinya mũno. Yĩmwe nĩ 2 Akolintho 7:1, yĩla yĩtwĩkĩaa vinya ta twĩ Aklĩsto “twĩthesye kumana na kĩla ũvuku wa mwĩĩ na wa veva.” Ĩandĩko yĩngĩ yandĩkĩĩthisye kana no nĩekane na imanyĩo nthũku nĩ Avilivi 4:13. Yaĩtye: “Nĩndonya maũndũ onthe nũndũ wa vinya wa ũla ũndonyethasya.” Yeova Ngai nĩwasũngĩie mboya syakwa na andethya mũvaka nesa kũelewa ũw’o wa Mbivilia na kũũatĩĩa. Kĩu nĩkyatumie nĩyumya nĩmũthũkũmae. (1 Vetelo 4:1, 2) Navatisiwe na natw’ĩka ũmwe wa Ngũsĩ sya Yeova mwaka wa 1997.

Nĩĩkĩĩaa kana takeka ndyaalyũka, yu tũĩ ndyĩthĩwa thayũ. Ĩndĩ yu nĩkalaa nĩ mũtanu vyũ! Nĩnatwaie kĩveti kĩseo mũno kĩtawa Elvie, na kĩthĩĩtwe kĩ ũathimo mũnene. Ithyelĩ twĩ atavany’a ma ĩvinda yonthe, na nĩtũtanĩaa kũmanyĩsya angĩ Mbivilia. Kĩu kĩtumaa nĩkala nĩ mwĩanĩe na nĩ mũtanu mũno. Nĩmũtũngĩaa Yeova mũvea mwingĩ nũndũ wa kũngusya nũke kwake.—Yoana 6:44.