Nasyaĩwe kĩsionĩ kĩtawa Gomba nthĩ ya Uganda. Andũ aingĩ kũu maĩ ngya. Kũyaĩ sitima taoninĩ yitũ, na kwoou wĩoo twatũmĩaa taa wa kyavunĩ.

 Asyai makwa mathamĩĩe Uganda maumĩte Rwanda, na maĩ aĩmi. Mavandaa kaawa na maiũ, na matũmĩaa a maiũ kũseũvya ũkĩ wĩsĩkĩe mũno wĩtawa waragi. O na nĩmaĩthasya ngũkũ, mbũi, ngũlũe, na ngʼombe. Kĩthĩo kitũ na mũeele wakwa watumie nĩĩkĩĩa kana kĩveti kyaĩle kwĩwʼa mũũme mavinda onthe, na kĩyaĩle kumya mawoni o na vanini.

 Yĩla naĩ na myaka 23, nĩnathamĩĩie Rwanda, vala naendaa ilavu kũsũnga nĩ na angĩ ma ĩika yakwa. Ve kĩlavu kĩmwe nakothaa kũthi mũno nginya mwene anenga kaati ĩmbĩtĩkĩlĩtye kũlikaa mana. O na nĩnatanĩaa kwĩloela sinema sya kaũ na ikwonanyʼa ũngʼendu ũtheinĩ. Maũndũ ala manthyũlũlũkĩte o vamwe na maũndũ ma kwĩtanĩthya ala neeloelaa matumie nĩthĩwa nĩ mũngʼendu, nĩ na mwĩkalĩle mũthũku, na nĩ mũthengi.

 Mwakanĩ wa 2000, nĩnambĩĩie kwĩkalanyʼa na mwĩĩtu wĩtawa Skolastique Kabagwira, na twasyaa syana itatũ. Neekwatasya kana kĩveti kyakwa kĩkatulasya ndu yĩla kĩũngethya kana yĩla kĩũngũlya kĩndũ, nũndũ ũu nĩwʼo neanie nĩsĩ. O na navangaa kana syĩndũ syonthe ila syĩ vau mũsyĩ nĩ syakwa, na kwoou no nĩitũmĩe ũndũ ngwenda. Nĩnakothaa kumaala wĩoo na ndisyoka saa kenda sya kũikya, na kaingĩ nasyokaa nĩ mũmile. Nasyokethya nakũnangaa mũomo, na Skolastique akua ĩvinda yĩasa aitwʼĩka nĩwambingũĩa, nĩnamũvũaa.

 Ĩvindanĩ yĩu, ninyie naũngamĩe athũkũmi kambuninĩ ĩmwe ya kũsunga, na kwoou naĩvawa nesa. Skolastique nĩwatatie kũnthingʼĩĩsya nĩendae kanisa ũla waendaa wa Pentecostal aisũanĩa nĩngũalyũka. Ĩndĩ ndyendaa kũthi. Vandũ va ũu, nĩnatumie ndũũ na mũndũ mũka ũngĩ. Nũndũ nakuaa Skolastique naĩ na naĩ na mwĩkalĩle mũthũku, nĩwakuie syana sitũ na asyoka kwa asyai make.

 Mũnyanyawa ũmwe mũkũũ nĩwaneenie nakwa ĩũlũ wa mwĩkalĩle wakwa. Ambĩkĩie vinya nĩsyokeanĩe na Skolastique. O na ambĩie kana syana syakwa iyaĩle kwĩkala ite na ĩthe wasyo. Nũndũ wa ũu, mwaka wa 2005 nĩnaekie kũnywʼa, natiana na ũla mũndũ mũka twaĩ ndũũ, na nasyokeanĩa na Skolastique. Mwakanĩ wa 2006 nĩtwatwaanie. Ĩndĩ o na vailye ũu, no namũkuaa naĩ.

 Mwakanĩ wa 2008, mũndũũme ũmwe wĩtawa Joël wa Ngũsĩ sya Yeova nĩwatũthokeie aitavanyʼa na namwĩthukĩĩsya. Kwa myei kauta, we na mwana-a-asa ũngĩ wĩtawa Bonaventure nĩmanthokeaa mateũtĩĩa, na nĩtwaneeneaa Mbivilia mũno. Namakũlasya makũlyo maingĩ, na mũno mũno makonetye ĩvuku ya Ũvuanyʼo. O na nĩnatataa kũmonethya kana Ngũsĩ syĩthĩawa mavĩtyo. Kwa ngelekanyʼo, namakũlilye nĩkĩ mavangaa kana yĩla “ĩkomano ĩnene” ya andũ yĩwetetwe Ũvuanyʼo 7:9 yĩkekala kũũ nthĩ, nawʼo mũsoa ũsu waasya kana “maũngamĩte mbee wa kĩla kĩvĩla kya ũsumbĩ [kya Ngai] na mbee wa kala Kalondu,” ũla nĩ Yesũ Klĩsto. Joël nĩwasũngĩaa makũlyo makwa na nĩwambũmĩĩasya mũno. Kwa ngelekanyʼo, nĩwambonisye ĩandĩko ya Isaia 66:1, vala Ngai wĩtĩte nthĩ ‘kavĩla kake ka nyaĩĩ.’ Kwoou yĩla ĩkomano ĩnene yĩ kũũ nthĩ yĩũngye mbee kwa kĩvĩla kya ũsumbĩ kya Ngai. O na nĩnasomie ĩandĩko ya Savuli 37:29, yĩla yaasya kana ala alũngalu makekala ĩũlũ wa nthĩ tene na tene.

 Mũthya, nĩneetĩkĩlile kũmanyĩwʼa Mbivilia. Kwoou Bonaventure nĩwambĩĩie kũmanyĩsya nĩ na Skolastique. O ũndũ naendeeie kwĩmanyĩsya, nowʼo nambĩĩie kwĩthĩwa na wendi wa kũalyũla mwĩkalĩle wakwa. Nĩneemanyĩisye kũnengae mũka wakwa ndaĩa. Ndyendaa atulye ndu yĩla ũkũngethya kana yĩla ũkũngũlya kĩndũ, o na nĩnaekie kũvanga kana kĩla kĩndũ twaĩ nakyo vau mũsyĩ nĩ kyakwa nĩ nyioka. Eka ũu, nĩnaekie kwĩloela sinema syĩ na ũngʼendu. Kwĩka moalyũku asu kũyaĩ laisi o na vanini, na kwoou nĩnendekaa kwĩthĩwa na nguma ya wĩnyivyo na kwĩsiĩĩa.

 Myaka mĩvũthũ mĩvĩtu, nĩnatwaĩte mwana witũ ũla mũkũũ wĩtawa Christian akekalae na andũ makwa ma mũsyĩ nthĩ ya Uganda. Ĩndĩ ĩtina wa kũsoma ĩandĩko ya Kũtũngĩlĩlwa Kwa Mĩao 6:4-7, nĩnamanyie kana Ngai endaa nyie na kĩveti kyakwa tũsũvĩe syana sitũ, na ũndũ ũmwe twaĩle kwĩka nĩ kũimanyĩsya myolooto yake. Ithyonthe twatanie ta kĩ yĩla mwana witũ wasyokie mũsyĩ!

 Nĩnamanyie kana Yeova nĩ Ngai wĩ tei, na ndi na nzika kana nĩwandekeie nũndũ wa mwĩkalĩle wakwa wa tene. Nĩndanaa mũno nũndũ Skolastique nĩweetĩkĩlile kwĩmanyĩsya Mbivilia takwa. Nĩtweeyumisye tũmũthũkũme Yeova, na ithyelĩ twavatiswa Matukũ 4, Mwei wa 12, 2010. Yu nĩtũĩkĩĩanĩe, na nĩtũtanĩaa kũatĩĩa myolooto ya Mbivilia mũsyĩnĩ witũ. Kĩveti kyakwa kĩtanaa mũno nũndũ yu nauma wĩanĩ nĩnũkaa ĩmwe kwa ĩmwe. O na nĩkĩtanaa kwona ndikĩkua nesa na ndikĩnenga ndaĩa, na kwona natwie kũekana na ũkĩ. Eka ũu, yu nĩnaekie kwĩthĩwa nĩ mũndũ ũte tei. Mwaka wa 2015, nĩnanyuviwe nĩthĩwe mũtumĩa nĩ kana nĩtetheesye kũsũvĩa malondu ma Yeova kĩkundinĩ. Oyu twĩ na sya itano, na itatũ katĩ wasyo nivatisĩtwe.

 Yĩla nambĩĩie kwĩmanyĩsya Mbivilia na Ngũsĩ sya Yeova, ndyeetĩkĩlaa kĩla syandavya oou kĩtumbo. Ĩndĩ nĩnatanĩthiwʼe nĩ kwona ũndũ syatũmĩaa Mbivilia kũsũngĩa makũlyo makwa. O na ĩngĩ, nĩ na Skolastique nĩtwamanyie kana ala maasya kana mamũthũkũmaa Ngai ũla wa wʼo maĩle kũatĩĩa mĩao yake yonthe, ĩndĩ ti o kwĩkaa kĩla mekwenda. Ndanaa mũno kwona Yeova angusisye kwake, na yu nĩ ũmwe wa athaithi make aĩkĩĩku. Nasũanĩa vala numĩte, ndyĩthĩawa na nzika kana Ngai no atetheesye mũndũ o na wĩva wĩ na ngoo nzeo kwĩka moalyũku ala mekwendeka nĩ kana amwendeesye.