Kĩla mwaka, athũkũmi meana ũna ma ĩvinda yonthe ma mwanya kuma nthĩ yonthe nĩmathokawʼa Sukulunĩ ya Mbivilia ya Ngileati, ĩla yĩthĩawa Watchtower Educational Center, Patterson, New York. a Sukulunĩ ĩsu, amanyĩwʼa nĩmamanyĩawʼa ũndũ matonya kwĩanĩsya nesa ianda syĩ kĩvathũkanyʼo ila manengwa ũseũvyonĩ wa Yeova. Sukulu ĩĩ nĩmatetheeasya kũlũlũmĩĩlya ikundi na movisi ma ũvonge nthĩ yonthe.

 Kwa wʼo, Ngileati nĩ sukulu yĩthĩawa na amanyĩwʼa kuma nthĩ yonthe. Kwa ngelekanyʼo, kĩlasi kya 147 kĩla kyeekiwe 2019 kyaĩ na amanyĩwʼa 56, na maumĩte nthĩ 29. Amanyĩwʼa ala mathokawʼa Ngileati nĩ ala methĩĩtwe ũthũkũminĩ wa mwanya wa ĩvinda yonthe, ta ala mathũkũmaa Mbetheli, asyaĩĩsya ma mũthyũlũlũko, amisonalĩ, kana mavainia ma mwanya.

 Mĩvango kwondũ wa sukulu yĩkawa tene vyũ o na masomo matanambĩĩa. Kwa ngelekanyʼo, Mũvĩa wa Kũvangĩthya Maũndũ Yĩla Athũkũmi ma Ĩvinda Yonthe ma Mwanya Meũthi Kũndũ, ũla wĩthĩawa ovisinĩ ũla mũnene, nĩwʼo ũĩvaa tikiti wa ndeke wa ala mathoketwʼe. Kĩlasi kya 147 kĩyĩkwa, ndola ta 1,075 sya Amelika nĩsyatũmĩiwe nĩ kana kĩla mũmanyĩwʼa umĩte nthĩ ĩngĩ avike Patterson na aisyoka kwoo. Kwa ngelekanyʼo, amanyĩwʼa ala maumĩte Solomon Islands moosie ndeke inya mayĩsa kũvika Patterson, na ingĩ itatũ sya kũsyoka mũsyĩ, na savalĩ ĩsu yonthe yaĩ ya kĩlomita mbee wa 35,400 (maili 22,000)! Tikiti wa ndeke wa kĩla mũmanyĩwʼa waĩ ndola sya Amelika 2,300. Mũvĩa ũla ũũngamĩaa wĩa ũsu ũtũmĩaa vulongulamu ya kombiũta kũmantha kana ve ndeke ikũĩvya laisi, na kĩu nĩkĩsũvĩaa mbesa mbingĩ. O na makwata ĩkũĩvya laisi, vulongulamu ĩsu nĩyĩendeeaa kũsisya vandũ va syumwa kana o na myei kauta yone kana tikiti nũkũtheea. O na ĩngĩ, mũvĩa ũsu nũtũmĩaa kaati kambunĩ sya ndeke inengae makasitoma matũmĩe kũthooa tikiti vandũ va kũĩva matũmĩĩte mbesa (airline credits), ila syĩthĩawa syumĩtwʼe ta mĩvothi nĩ ana-a-asa.

 Amanyĩwʼa aingĩ methĩawa maĩle kwĩthĩwa na visa nĩ kana metĩkĩlwʼe kũlika nthĩ ya Amelika. Kwoou, Mũvĩa wa Maũndũ ma Mĩao wa Ovisi Ũla Mũnene nũmatetheeasya kũkwata visa isu. Kĩla mũmanyĩwʼa aĩvaa ta ndola 510 sya Amelika nĩ kana akwate visa na ayĩyĩandĩkĩthya.

 Ĩndĩ kyo kĩsomo kĩla amanyĩwʼa asu makwataa kĩtũtethasya ata? Mũtumĩa ũmwe wa kĩkundi wĩtawa Hendra Gunawan wa Asia nũwetete ũndũ ũmwe wa vata. Kĩkundinĩ kĩla wĩthĩawa ve mwana-a-asa na mũka maendie Sukulu ya Ngileati. Hendra aĩtye: “Navu tenange, kĩkundi kitũ kĩinaĩ na vainia wa kĩla ĩvinda o na ũmwe. Ĩndĩ yĩla mwana-a-asa ũsu na mũka mookie, kĩthito kyoo na veva woo wa kwĩyumya nĩwatumie angĩ kĩkundinĩ mambĩĩa kũvainia. Ĩtina wa ĩvinda, mwĩĩtu-a-asa ũmwe kĩkundinĩ kitũ nĩwaendie Sukulu ya Atavanyʼa ma Ũsumbĩ!”

 Nake Sergio Panjaitan athũkũmaa Mbetheli yĩ Asia na methĩawa na amwe maendie Ngileati. Aĩtye: “Kĩla meemanyĩisye kĩimatethasya me oka; o naitũ nĩkĩtũtethasya. Nĩmeemanyĩisye maũndũ maingĩ mũno! Ĩndĩ vandũ va kwĩyonanyʼa, mamanyĩasya angĩ kĩla meemanyĩisye. Kĩu nĩkĩtwĩkĩaa vinya mũno, na kĩkatuma o naitũ twĩkĩa angĩ vinya.”

 Syo ngalama sya sukulu ĩsu iũngamĩawa ata? Iũngamĩawa nĩ mĩvothi ĩla yumawʼa kwondũ wa wĩa wa nthĩ yonthe, na mingĩ yayo yumawʼa kwĩsĩla nzĩa ĩmwe yĩ nthĩnĩ wa donate.mt1130.com. Nĩtũũkũtũngĩa mũvea mũno nũndũ wa mĩvothi yaku ya ũlau, ĩla ĩtũmĩawa kwondũ wa sukulu ĩĩ yĩthĩawa na amanyĩwʼa kuma nthĩ yonthe.